Read Chimborazo Highland Quichua LUCAS 14 Bible Online

LUCAS 14 - Chimborazo Highland Quichua bible

LUCAS 14

¹Jesusca samana punllapimi, fariseocunata pushaj fariseopaj huasipi micugrirca. Chaipi micucujpica, shujtaj fariseocunaca Jesusta imapi juchachingapaj nishpami chaparacurcacuna.

²Chaipica tucui aicha punguishca runami Jesuspaj ñaupajpi tiyacurca.

³Chaipimi Jesusca, mandashcacuna ima nisha nishcata yachachijcunata, fariseocunatapish: — ¿Samana punllapica ungushcataca alliyachinachu, manachu alliyachina? — nishpa tapurca.

⁴Ashtahuanpish pi imata mana nijpimi Jesusca, ungushcata cayashpa alliyachishpaca rilla nishpa cacharca.

⁵Chaipi cajcunapajman tigrarishpaca: — ¿Pi cancunataj cancunapaj burro cashpa, huagra cashpa mai jutcupi huashicujpica, samana punlla cajpipish mana llujshichinguichijman? — nircami.

⁶Jesús chashna nijpica, paicunaca imata mana cutichi tucurcacunachu.

⁷Bodaman cayashcacuna puntapi tiyaringapaj mashcacujta ricushpami, yuyachij shuj parlota cashna nishpa parlarca:

⁸“Maijan bodayuj cayajpi rishpaca, ama ashtahuan alli tiyarinapi tiyaringui. Ñataj canta yalli alli nishcata, bodayuj cayashca tiyanman.

⁹Paitapish, cantapish, cayaj bodayuj shamushpa: “Cai tiyarinata paiman cupai” nishpa jatarichijpica, pingai tucushpa huasha tucuri tiyarinapi tiyarigringuiman.

¹⁰Chaipaj randica maijan bodayuj cayajpi rishpaca, bodayuj shamushpa: “Riqui amigo, cai ñaupajman tiyari” ningacama tucuri tiyarinapi tiyaringui. Bodayujllataj chashna rurajpimi, canca tucui chaipi cajcuna alli nishca cangui.

¹¹Maijanpish jatun tucujtaca, pingachishcami canga. Mana jatun tucujtaca, jatunyachishcami canga” nircami.

¹²Bodayujtapish Jesusca cashnami nirca: — Bodapi micuchun cayashpaca, canhuan alli apanacujcunallata, huauquicunallata, familiacunallata, c'uchullapi causaj achcata charijcunallataca ama cayanguichu. Paicunaca canta tigra cayashpa chashnallataj tigrachingallami.

¹³Jatun micuita rurashpaca, huajchacunata, mancocunata, cojocunata, mana ricujcunata cayangui.

¹⁴Paicuna mana tigrachi tucushcamantaca Taita Diosmi cantaca cushichinga. Ashtahuanpish cashcata rurajcuna causari punllapimi can cushcamantaca Taita Diosca cunga — nircami.

¹⁵Chaita uyashpaca, Jesushuan micushpa tiyacujcunamanta shujca: — ¡Taita Dios mandacujpi jatun micuipi micujca, cushichishcami canga! — nijpi,

¹⁶Jesusca: “Shuj runami jatun micuita rurasha nishpa achcacunata cayarca.

¹⁷Ña micuna hora tucujpica, paipajta rurajtaca: “Cayashcacunata, ñami tucui allichishca shamuichijlla nigrichunmi” cacharca.

¹⁸Ashtahuanpish cayashcacunaca tucuicuna caita chaita juchachishpa mana rishun nishpami: “Ñucami shuj haciendata randircani, chaitami ricunaman ricuni. Chaimi mana shamui tucuni ninmi nigripai” nircami.

¹⁹Caishujca: “Ñucami pichca yunta huagrata randircani, chaitami yapushpa ricugricuni. Chaimantami mana shamui tucuni ninmi nigripai” nircami.

²⁰Shujtajca: “Ñucami cunanlla cazararcani. Chaimantami mana ri tucuni ninmi nigripai” nircami.

²¹Amopajta ruraj tigrashpaca, paipaj amomanca cayashcacuna imalla nishcatami huillarca. Chaimi amoca achcata p'iñarishpa paipajta rurajtaca: “Utca rishpa plazacunapi, pueblo ñancunapi caj imata mana charijcunata, mancocunata, cojocunata, mana ricujcunatapish caiman pushamugri” nirca.

²²Amopajta ruraj tigrashpaca: “Amito, can mandashca shinallatajmi pushamuni, manaraj jundanchu” nijpimi,

²³amoca paipajta rurajtaca: “Mai ñancunata ricujcunata, pata huashata puricujcunata pushamushpa ñuca huasipi jundachun yaicuchimugri” nirca.

²⁴Puntaman cayashcacunaca ñuca jatun micuitaca shujllapish manataj micungacunachu. Chaica chashnatajmi” nishpami parlarca.

²⁵Jesusca paihuan ricuj achcacunata tigrarishpa ricushpaca cashnami nirca:

²⁶Pipish ñucata catisha nijca paipaj yayata, mamata, huarmita, huahuacunata, huauquicunata, panicunata, quiquin causaitapish llaquijca, mana ñuca yachacuj cai tucunchu.

²⁷Chacatashpa huañuchina llaquita apana cajpipish, ñucata catijllami ñuca yachacuj cai tucun.

²⁸Cancunamanta maijanpish shuj torreta shayachisha nishpaca, tucuringacama rurangapajca mashna pajtana cashcata ricungapaj ¿manachu tiyarishpa ricunguichijraj?

²⁹Mana chashna yuyarishpa torreta shayachinata callarishpalla saquijpica, shujtajcuna ricushpa asishpa pingachingapajca,

³⁰cashnami ningacuna: “Cai runaca torreta shayachinata callarircamari, ashtahuanpish mana tucuchi tucunchu” ningacunami.

³¹Maijan jatun mandajca, caishuj jatun mandajhuan macanacungapajca, paica chunga huaranga soldadocunallata charishpa, caishujca ishqui chunga huaranga soldadocunahuan shamucujpica, chunga huarangacunallahuanca mishai tucunichu, manachu mishai tucuni nishpa ¿manachu yuyaringapaj tiyarinmanraj?

³²Mana mishaipaj cashpaca, caishujcuna carupiraj cajpimi, ima shinapish alli tucupashun ninaman paipaj randi huillajcunata cachanman.

³³Chai shinallatajmi cancunamanta maijanpish, tucui charishcacunata mana saquisha nishpaca, mana ñuca yachacuj cai tucunguichij.

³⁴“Cachica tucuipaj allimari. Ashtahuanpish cachi ña mana mishquichijpica ¿imahuanshi mishquichinguichijman?

³⁵Chashna mana mishquichishpaca, allpapi shitanapajllapish, majadapajllapish mana allichu. Canllaman shitanapajllami canga. Maijanpish uyanapaj rinrinta charijca, tucui yuyaihuan uyachun” nircami.