Read Chimborazo Highland Quichua LUCAS 19 Bible Online

LUCAS 19 - Chimborazo Highland Quichua bible

LUCAS 19

¹Jesusca Jericoman ña yaicushpaca, pueblo chaupitami rirca.

²Chai pueblopica impuestota japijcunata pushaj Zaqueo shuti achcata charij runami causarca.

³Paica Jesusta rijsisha nishpapish achcacuna jarcashcamantami uchilla cashpa mana ricui tucurca.

⁴Chaimantaca sicómoro yura chaita Jesús pasana cajpimi, callpashpa ñaupashpa rishpa sicómoro yuraman Zaqueoca huichiyarca.

⁵Jesús chaiman ña chayashpaca huichilla ricushpami: — Zaqueo, utca uriyamui. Cunanca cambaj huasipimari pozana cani — nirca.

⁶Zaqueoca utca uriyashpami, Jesustaca cushicushpa paipaj huasipi chasquirca.

⁷Chaita ricushpaca, juchayuj runapaj huasipimari pozanaman yaicun nishpami, tucuicuna juchachicurcacuna.

⁸Zaqueo shayarishpaca Mandaj Jesustaca: — Mandaj Jesús, ñuca charishcacunamanta chaupita imata mana charijcunaman cusha. Maijancunapajta umashpa shuhuashcataca chuscu cutinhuanmi tigrachisha — nirca.

⁹Chaimi Jesusca: — Cunanmari cai huasimanca, quishpirina chayamushca. Paipish Abrahampaj huahua huahuamari.

¹⁰Runa Aichayujca chingarishcacunata mashcangapaj, quishpichingapajmi shamurca — nircami.

¹¹Chaita uyajcunaca Jerusalenman Jesús ñalla chayagricujpimi, Taita Diosca cunantajmari ña mandai callarigrin nishpa yuyacurcacuna. Chaipimi Jesusca cai yuyachij parlota cashna nishpa parlarca.

¹²Tucuicuna alli nishca shuj runami jatun mandajta rurajpi, mandanata chasquishpa tigranaman shujtaj caru llajtaman rirca.

¹³Chaiman manaraj rishpami, paipaj chunga servijcunata cayashpa, chunga mina cullquita cushpaca: “Caihuanca ñuca tigramungacama randishpa, c'atushpa mirachicuichij” nishpa saquirca.

¹⁴Chai llajtapi causajcuna chaita yachashpaca p'iñarishpami: “Ñucanchijta pai mandaj cachunca mana ninchijchu” nishpa huillajcunata catichishpa cacharcacuna.

¹⁵Ashtahuanpish paica mandaj canata chasquishpami tigramurca. Ña tigramushpaca paipajta rurajcunaman cushpa saquishca cullquita mashnata mirachishcata tucuicunapajta yachangapajmi cayaj cacharca.

¹⁶Chaimi punta shamujca: “Amito, cambaj mina cullquitaca chungahuanmi mirachircani” nirca.

¹⁷Shina nijpi mandajca: “Allimi, alli servijmi cangui. Canca pajtachij cashpa ashallamantapish mirachishcamantaca, chunga pueblocunata mandajmi cangui” nircami.

¹⁸Shujtaj chayamushpaca: “Amito, cambaj mina cullquitaca pichcahuanmi mirachircani” nirca.

¹⁹Paitapish: “Canpish pichca pueblocunatami mandaj cangui” nirca.

²⁰Caishuj shamushpaca: “Amito, caipimi cambaj mina cullquica. Caitaca, shuj linsopimi alli huaquichircani.

²¹Canca manapish tarpushpa tandaj, manapish imata cushpa p'iñarishpa mañaj cajpimi, mancharcani” nirca.

²²Chaimi mandajca: “Millai servij, chashna nishpaca can llaquita apanapajllatajmi chashna ningui. Ñuca manapish imata cushpa p'iñarishpa mañaj, manapish tarpushpa tandaj cashcataca yachashcanguimi.

²³Chaita yachashca jahuaca ¿ima nishpataj ñuca cullquitaca mana bancopi churarcangui? Ñuca tigramushpaca, huahua cullquihuanmi japiman carcani” nircami.

²⁴Chai q'uipami, chaipi cajcunataca: “Mina cullquita quichushpa, chunga minata charijman cuichij” nijpi,

²⁵paicunaca: “Amito, paica ñamari chunga minata charin” nircacuna.

²⁶Chaimi mandajca: Charijmanmi ashtahuan cushca canga. Mana charijtaca, pai ashalla charishcatapish quichushcami canga ninimi.

²⁷Ñucata p'iñashpa mana mandaj cachun nijcunatapish pushamushpa, ñuca ñaupajpi cungata p'itichishpa huañuchichij nircami nishpami parlarca.

²⁸Chai q'uipami, Jesusca Jerusalenman paicunata ñaupashca huichiyarca.

²⁹Olivocuna tiyan urcu c'uchullapi caj Betfageman, Betaniaman ña c'uchuyacushpami, paipaj yachacujcunamanta ishquita cachacushpaca,

³⁰cashna nirca: — Chai ch'imbanij uchilla llajtaman richij. Chai llajtaman yaicunllapimi pi manaraj tiyarishca shuj burrota huatashca shayacujta ricunguichij. Chaitaca cacharishpa pushamuichij.

³¹Cacharicujpi: Pi “¿Imapajtaj cacharicunguichij?” nijpica: “Mandaj Jesusmi pushanaman cacharca” ninguichij — nircami.

³²Paicuna rishpaca, Jesús nishca shinallatajmi burro shayacujta japircacuna.

³³Burrota ña cacharicujpica, burroyujcunaca: — ¿Imapajtaj cacharicunguichij? — nijpi,

³⁴paicunaca: — Mandaj Jesusmi pushaj cacharca — nircacuna.

³⁵Chaimanta Jesuspajman pushamushpaca, churanacunata burropaj jahuapi churashpami Jesustaca tiyachircacuna.

³⁶Pai rina ñanpipish churanacunatami mantarcacuna.

³⁷Olivos urcu uriman chayagricujpimi, paita catij achcacunaca Taita Diosta allimari cangui nishpa sinchita caparircacuna. Tucui mancharinacunata rurajta ricushcamantami, cashna caparircacuna.

³⁸— ¡Jatun Diospaj shutipi shamucuj Jatun Mandajtami alli ninchij! ¡Jahua pachapipish sumaj cachun, jahua pacha Jatun Diostaca sumajmari cangui nishca cachun! — nishpami caparircacuna.

³⁹Chai tucui caticujcunapaj chaupimanta maijan fariseocunaca: — Yachachij, cambaj yachacujcunata jarcaiyari — nijpi,

⁴⁰Jesusca: — Caicuna upallajpica, rumicunami caparinga. Chaica chashnatajmi — nirca.

⁴¹Jerusalenman chayagrishpaca, chai pueblopi causajcunata ricushpa huacashpami,

⁴²cashna nirca: — ¡Cunan punllaca cancunapaj sumaj causai cana cashcata yachashpachari alli canguichijman! Ashtahuanpish cunanca, cancunapaj yuyaipica pacallamari.

⁴³Cancunata p'iñajcunaca muyundijta patacunata rurashpa, muyujta shayarishpa cancunata ñutuchingapaj llapimuna punllacunami ña chayamucun.

⁴⁴Cai pueblotaca urmachishpa tucui caipi causajcunatapish huañuchingami. Huasi pircacunatapish shuj rumillatapish pircashcata mana saquingachu. Taita Dios ricuj shamujpi mana chasquishcamantami chashna tucunguichij — nircami.

⁴⁵Jesús ña chayashpaca Taita Diospaj huasiman yaicushpami tucui chaipi c'atucujcunata, randicujcunata llujshichishpa cachai callarishpaca,

⁴⁶cashna nirca: — Taita Dios Quillcachishcapica: “Ñuca huasica, Taita Diosta mañana huasimi canga” ninmi. Ashtahuanpish cancunaca, shuhuacunapaj jutcutamari rurashcanguichij — nircami.

⁴⁷Jesusca punllantami, Taita Diospaj huasipi yachachicurca. Ashtahuanpish curacunata pushajcuna, mandashcacunata quillcajcuna, llajtata pushajcunaca, ima shinapish huañuchinatami yuyarinacurcacuna.

⁴⁸Ashtahuanpish tucuicuna pai huillashcata alli uyacujpimi, imata mana rurai tucurcacuna.