Read Chimborazo Highland Quichua LUCAS 20 Bible Online

LUCAS 20 - Chimborazo Highland Quichua bible

LUCAS 20

¹Shuj punlla Jesús Taita Diospaj huasipi yachachishpa alli huillaita huillacujpimi, curacunata pushajcuna, mandashcacunata quillcajcuna, cunaj yuyajcunapish chayamurcacuna.

²Paicunaca: — Huillaiyari, ¿pi mandajpitaj chashna rurangui? ¿Pitaj chashna rurachun, cantaca mandarca? — nishpa tapujpimi,

³Jesusca: — Ñucapish cancunata shuj tapunata tapusha.

⁴Bautizaj Juan bautizachunca Taita Dioschu, runacunachu ¿pitaj cachashca canga? — nirca.

⁵Chaimi paicunapura parlanacushpaca: — “Juantaca Taita Dios cachashcami” nijpica: “Shinashpaca ¿ima nishpataj pai huillashcataca mana crircanguichij?” ningami.

⁶“Runacunallami Juantaca cacharca” nijpipish tucuicuna Juantaca Taita Dios cachashca profeta cashcata yachashcamantaca ñucanchijtarajmi rumicunahuan shitangacuna — ninacushpami,

⁷— Pi cachashcata mana yachanchijchu — nircacuna.

⁸Chaimi Jesusca: — Ñucapish pi mandajpi chashna ruracushcataca mana huillashachu — nirca.

⁹Chai q'uipa yachachi callarishpaca Jesusca cai yuyachij parlotami cashna parlarca: “Shuj runami uvas chagrata tarpushpaca, chagrajcunaman arrendachishpa, achca huatacunapaj chaimanta rirca.

¹⁰Uvascunata pallana punlla ña chayamujpica, pai japina cashcata chasquimuchunmi chagrajcunapajman shuj servijta cacharca. Ashtahuanpish chagrajcunaca chai servijtaca macashpami, chushaj maquillata tigrachishpa cacharcacuna.

¹¹Cutinmi shujtaj servijta cacharca. Chai servijtapish paicunaca c'amishpa, macashpami chushaj maquillatataj tigrachishpa cacharca.

¹²Ishquipaj q'uipapish cutinmi shujtaj servijta cacharca. Chai servijtapish paicunaca chugrichishpami, llujshichishpa cacharcacuna.

¹³Chaimi chagrayuj amoca: “¿Imatataj rurashari? Ñuca c'uyashca churita cachasha. Paita ricushpaca, cazungacunapishchari” nirca.

¹⁴Chai churita ricushpacarin chagrajcunaca: “Caimari paipaj churi. Cai tucuitaca paimari japinga. Pai japinataca ñucanchij japingapaj shamuichij, huañuchishunchij” nishpa rimanacushpaca,

¹⁵uvas chagramanta llujshichishpami canllaman paitaca huañuchircacuna. Chashna rurajcunataca chagrayuj amoca ¿imatashi ruranga?

¹⁶Allpayuj shamushpaca chai chagrajcunata huañuchishpami, allpataca shujtajcunaman cunga” nirca. Paicuna chaita uyashpaca: — ¡Ñucanchij chashna tucuchunca Taita Dios ama saquichun! — nircacunami.

¹⁷Ashtahuanpish Jesusca, paicunata ricushpaca: — Quillcachishcapica: “Huasita shayachijcuna yanganchishpa shitashca rumillatajmi, callaripi churana rumi tucushca” ninmi. Chashna nishcataca ¿imatataj yuyanguichij?

¹⁸Chai rumi jahuapi tucui urmajcunaca p'aquiringami. Maijanpaj jahuapi chai rumi urmashpapish ñutungami — nircami.

¹⁹Curacunata pushajcuna, mandashcacunata quillcajcunapish paicunata uyachishpa, chai yuyachij parlota Jesús parlashcata entendishpami, cunantaj ima shinapish japishun nircacuna. Ashtahuanpish chaipi cajcunatami mancharcacuna.

²⁰Chaimantami ima mana allita nijpica, juchachishpa chai llajtata mandajman huillashpa japichishunpishchari yuyashpa, yachangapaj alli tapucuj shina Jesusta tapuchun runacunata cacharcacuna.

²¹Paicuna Jesuspajman chayashpaca: — Yachachij, canca imatapish ima shina cashcatataj yachachijmi cangui. Taita Diosta ima shina cazunatapish chaitataj yachachijmi cangui. Pita mana manchashpa paicunapi alli ricuringa raicullaca mana yachachijchu cangui.

²²¿Cesarmanca tributotaca cushunchu manachu cushun? — nircacunami.

²³Ashtahuanpish Jesusca, paicuna mana alli yuyaihuan cashcata yachashpami: — ¿Ima nishpataj ñucataca umashun nicunguichij?

²⁴Cullquita ricuchichij. ¿Pipaj ñahuitaj, pipaj shutitaj caipica tiyacun? — nijpica: — Cesarpajmi — nircacunami.

²⁵Chaimi Jesusca: — Shinashpaca Cesarpajtaca, Cesarman cuichij. Taita Diospajtaca Taita Diosman cuichij — nirca.

²⁶Tucuicunapaj ñaupajpi imata tapujpipish, ima juchachinata mana nishpa alli cutichijpimi mancharishpa upalla saquirircacuna.

²⁷Chai q'uipami huañushcacunaca mana causaringachu nij saduceocuna Jesusta tapunaman shamushpaca,

²⁸cashna nircacuna: — Yachachij “Maijan cashpapish huahuacunata manaraj charishpa huañujpica, huañujpaj huauquillataj chai viuda huarmihuan cazarashpa huauquipaj randi huahuacunata charichun” nishpami Moisesca quillcashca.

²⁹Chai shinallatajmi canchis huauquindijcuna tiyarca: Punta huauquimi cazararca. Paica huahuacunata manaraj charishpami huañurca.

³⁰Chaimantami q'uipa huauquica chai viuda huarmihuan cazararca. Paipish huahuacunata manaraj charishpami huañurca.

³¹Ishquipaj q'uipa huauquipish chai huarmihuan cazarashpaca, manaraj huahuacunata charishpallatajmi huañurca. Canchis huauquindijtajmi manaraj huahuacunayuj tucushpa huañurcacuna.

³²Tucuicunapaj q'uipaca, huarmipish huañurcami.

³³Huañushcacuna causarimui punllapica canchis huauquindijtaj chai huarmihuan cazarashcamantaca ¿maijanpajshi chai huarmica canga? — nircacunami.

³⁴Chaimi Jesusca: — Cunan cai causaillapimi cazaranaca tiyan.

³⁵Ashtahuanpish shamuj causaipi causanataj cajcuna causarishpaca, mana cazarangacunachu, cazarachinapish mana tiyangachu.

³⁶Paicunaca mana huañungacunachu. Angelcuna shinamari canga. Taita Dios causachishcamanta paipaj huahuacunamari canga.

³⁷Zarza yurapi nina rupacuj ricurishpaca Moisesmanca Jatun Diosca cashnami nishca: Ñucaca Abrahampaj, Isaacpaj, Jacobpaj Taita Diosmi cani nishcami. Chashna nishpaca huañushcacuna causarina cashcatami Taita Diosca Moisesman huillashca.

³⁸Taita Diosca mana huañushcacunapaj Dioschu, ashtahuanpish causajcunapaj Taita Diosmari. Paipaj ñaupajpica tucuicunami causajcuna — nircami.

³⁹Mandashcacunata quillcajcunamanta maijancunaca Jesustaca: — Yachachij, allitamari ningui — nishpaca,

⁴⁰imata ashtahuan mana tapui tucurcacunachu.

⁴¹Paicuna mana ashtahuan tapujpimi Jesusca: — ¿Ima nishpataj Cristotaca, Davidpaj Churimi nincuna?

⁴²Davidllatajmi Salmos libropica cashna nin: “Jatun Diosca ñucata Mandajtaca: Ñuca alli ladoman tiyari,

⁴³canta p'iñajcunata cambaj chaqui sarunapi churangacama” ninmi.

⁴⁴Davidllataj ñucata Mandaj nijpica, ¿ima shinataj paipaj churica cangari? — nircami.

⁴⁵Tucui chaipi cajcuna uyacujpimi Jesusca paipaj yachacujcunataca cashna nirca:

⁴⁶— Mandashcacunata quillcajcuna shina canamanta huaquichiringuichij. Paicunaca pambata p'ichacujta churashpa purinatami munancuna. Plazacunapipish, allillachu cangui nishca canatami munancuna. Sinagogacunapipish, mai jatun micuicunapipish puntapi tiyarinatami munancuna.

⁴⁷Paicunaca viudacunapaj huasicunatapish quichushpa millpujcunami. Alli ricuringaraicuca unitami Taita Diosta mañaj tucuncuna. Chashna rurajcunataca yallitaj jatunta llaquichishcami canga — nircami.