Read Chimborazo Highland Quichua LUCAS 21 Bible Online

LUCAS 21 - Chimborazo Highland Quichua bible

LUCAS 21

¹Achcata charijcuna Taita Diospaj huasipi ofrendata churanapi churacujtami Jesusca ricurca.

²Imata mana charij viuda huarmipish, ishqui quillu cullquita churacujtami ricurca.

³Chaita ricushpaca Jesusca: — Imata mana charij viuda huarmimi, Taita Diosmanca tucuicunamanta yalli cun. Chaica chashnatajmi.

⁴Tucui caishujcunaca achcata charishpapish puchushcallatami Taita Diosmanca curcacuna. Ashtahuanpish paica imata mana charij cashpapish, pai causanapaj tucui charishcatami churan — nircami.

⁵Chai q'uipaca taucacunami Taita Diospaj huasica sumaj rumicunahuan, Taita Diosman cuna tucushpa cushca allicunahuan allichishca sumajmari nishpa parlanacurcacuna. Chaimi Jesusca:

⁶— Cunan cancuna ricucunta chingachina punllacuna shamungami. Chaipica, shuj rumillapish shujtaj rumi jahuapica mana saquiringachu — nirca.

⁷Chaimi yachacujcunaca: — Yachachij, ¿ima punllataj chashna tucungari? ¿Ima ricunataj chashna tucunapajca tiyangari? — nircacuna.

⁸Chaimi Jesusca: — Riquichij, cancunaca ama umashca canguichijchu. Achcacunami ñuca shutipi shamushpaca: “Ñucami Cristo cani. Mandana punllaca ñami chayamugrin” ningacuna. Paicunataca ama catinguichijchu.

⁹Jatun macanacuicuna, llajtapi causajcunapurallataj macanacungapaj jataricunmi nijta uyashpapish, ama mancharinguichijchu. Cai shina causai tucurinapajca chaica tiyanallatajmi. Chashna tucucujpipish cai shina causaica manaraj tucuringachu — nircami.

¹⁰Caitapish nircarajmi: — Shuj mama llajtaca, caishuj mama llajtahuan macanacungacunami, shinallataj jatun mandajcunapurapish macanacungacunami.

¹¹Ch'ican ch'ican llajtacunapi pamba chujchushpa allpa t'imburicunami tiyanga. Achca yaricai, millai ungüicunapishmi tiyanga. Jahua pachapica jatun mancharinacuna, mana ricushca señalcunapishmi ricuringa.

¹²Manaraj chashna tucujpica, cancunataca prezu apangacunami. Catirashpa llaquichingacunami. Sinagogacunaman, carcelcunamanpishmi apangacuna. Ñucata caticushcamantaca jatun mandajcunapajman, llajtata mandajcunapajmanpishmi apangacuna.

¹³Ashtahuanpish chaipimi paicunaman ñucamanta huillai tucunguichij.

¹⁴Paicunapaj ñaupajpica, imatataj nishun nishpa cancunapaj shungupica ama ñaupaman yuyaringuichijchu.

¹⁵Cancunamanca ñucami imallata rimanata, yachaitapish cusha. Chaipica cancunata p'iñajcunaca imata mana juchachi tucushpa upalla saquiringallami.

¹⁶Cancunataca yaya mamallataj, huauquicunallataj, quiquin familiacunallataj, alli rijsishcacunallatajmi llaquichichun japichingacuna. Chaipimi maijancunataca huañuchingacuna.

¹⁷Ñucata caticushcamantaca tucuicuna p'iñashcami canguichij.

¹⁸Ashtahuanpish cancunapaj umamanta shuj ajchallapish mana chingaringachu.

¹⁹Chashna cajpipish mana p'iñarishpa ñucata catirajcunaca quishpiringuichijmi.

²⁰Achca soldadocuna Jerusalén muyundijta shayacujta ricushpaca, chai llajtata chingachina chayamushcata yachanguichij.

²¹Chaimanta Judeapi cajcunaca, urcucunapi miticugrichun. Jerusalenpi cajcunapish llujshishpa richun. Chagrapi cajcunapish ama tigrachun.

²²Chai punllacunaca mana cazushcamanta Taita Dios llaquichina punllami canga. Quillcachishcapi tucui nishcacunami chai punllapica pajtanga.

²³Chai punllacunapi chichu huarmicunapish, chuchucuj huahuayujcunapish ¡Aij imachari tucungacuna! Taita Dios jatunta p'iñarishpa llaquichicui punlla cashcamantami chashna canga.

²⁴Maijancunataca espadahuanmi huañuchingacuna, shujtajcunataca tucui llajtacunamanmi prezu apangacuna. Jerusalenca mana israelcuna sarushcami canga. Paicuna sarushca cana punlla pajtangacamami, mana israelcuna mandanga.

²⁵Chai q'uipami intipipish, lunapipish, luzerocunapipish pi mana ricushcacuna ricuringa. Cai pachapica mama cucha yacucuna jahuata jatarishpa manchanayajta huajiajta uyashpami gentecunaca upayajta mancharingacuna.

²⁶Cai pachapipish chashna jatun llaquicuna jahuanpi jahuanpi ricurijpi, jahua pachapi jatun mana cuyuripajcunapish chujchujpimi, gentecunaca yuyai chingarijta mancharingacuna.

²⁷Runa Aichayujtaca, jahua pachamanta p'uyupi tucuita rurai tucuj cashcahuan, achijnicuj sumaj shamucujtami ricungacuna.

²⁸Chaipica cancunata quishpichina pajtamucushcata yuyashpa, cushicushpa chaparanguichijlla — nircami.

²⁹Yuyaita japina cai parlotapishmi Jesusca cashna nishpa parlarca: “Higo yurata, shujtaj yuracunatapish ricuichij.

³⁰Chai yuracunapi p'angacuna ña huiñamujpica, usia punllacuna ña chayamucushcatami cancunallataj yachanguichij.

³¹Cai ñuca huillashcacuna pajtacujta ricushpapish, Taita Dios ña mandagrishcata yachanguichij.

³²Cunan punllacunapi causajcunaca, cai huillashcacuna pajtangacama manaraj huañungacunachu. Chashnatajmi canga.

³³Jahua pachapish, cai pachapish tucuringami. Ashtahuanpish ñuca huillashca shimicunaca manataj tucuringachu.

³⁴Taita Dios mandai callarina punllaca cancuna mana yuyashcapi ama shamuchun, cancunallataj alli yuyarishpa jatun micuita ruranallapi, machanallapi, cai causaipi imatapish charinallapi, cancunapaj shunguta churashpa ama causanguichijchu.

³⁵Tucui cai pachapi causajcunataca lazyana angu ñapish japij shinami japinga.

³⁶Punllanta Taita Diosta mañashpa yuyaipi caichij. Chaimi chai llaquicuna shamujpica quishpiri tucunguichij. Runa Aichayuj shamujpipish paipaj ñaupajpi shayari tucunguichij” nircami.

³⁷Punllaca Taita Diospaj huasipimi yachachirca. Tutaca, Olivo shuti urcumanmi rirca.

³⁸Tutamantacunaca tucuicunami Jesús huillashcata uyangapaj Taita Diospaj huasipi tandanacurcacuna.