Read Chimborazo Highland Quichua LUCAS 22 Bible Online

LUCAS 22 - Chimborazo Highland Quichua bible

LUCAS 22

¹Levadura illaj tandata micuna fiestami chayamurca. Chai fiestami Pascua shuti carca.

²Chaipica curacunata pushajcuna, mandashcacunata quillcajcunapish gentecunata manchashpami Jesusta ima shina pacalla japishpa huañuchinata parlanacurcacuna.

³Paicuna chashna yuyacujpica Judas Iscariotepaj shungupimi, Satanasca yaicurca. Paica Jesuspaj chunga ishqui yachacujcunapuramantami carca.

⁴Paimi curacunata pushajcunapajman, Taita Diosta adorana huasita cuidajcunata mandajcunapajman rishpa, Jesusta ima shina japichinata paicunahuan parlanacurca.

⁵Chaipi parlanacushpami paicunaca achcata cushicushpa Judasmanca cullquita cuna tucurcacuna.

⁶Cullquita cushun nijpica Judasca ari nishpami, Jesustaca gentecuna mana yachajllapi ima shinapish japichinata yuyacurca.

⁷Levadura illaj tandata micuna punllami chayamurca. Chaipimi Pascua malta ovejatapish huañuchina carca.

⁸Chaimi Jesusca Pedrota, Juanta cayashpaca: — Richij, Pascua micuita ñucanchij micungapaj allichigrichij — nirca.

⁹Chaimi paicunaca: — ¿Maipitaj allichigrichun ningui? — nijpi,

¹⁰Jesusca: — Puebloman yaicugrishpaca puñu yacu aparishca shuj runahuanmi tupanguichij. Paihuan tupashpaca, pai maiman yaicungacama catishpa ringuichijlla.

¹¹Chai huasiyujtaca: “Ñucanchij yachachijca: ¿Mai ucupitaj Pascua micuitaca ñuca yachacujcunahuan micusha? ninmi” ninguichij.

¹²Paica, altibajopi ña allichishca shuj jatun ucutami ricuchinga. Chaipi ñucanchij micunata allichinguichij — nircami.

¹³Paicuna rishpaca, Jesús nishca shinallatajmi japircacuna. Chaipimi Pascua micuitaca allichircacuna.

¹⁴Micuna horas tucujpica, Jesusca apostolcunandijmi micungapaj tiyarirca.

¹⁵Chaipimi Jesusca cashna nirca: — ¡Ñucaca manaraj llaquita apashpa, cai Pascua micuita cancunahuan micunatami munarcani!

¹⁶Cancunaman huillanimi: Cai micunataca Taita Dios mandacunpi micungacama cutinca mana micushachu — nishpaca,

¹⁷Jesusca copata japishpa, Taita Diosta pagui nishpaca cashnami nirca: — Caita japishpa asha asha ubyachij.

¹⁸Cancunaman huillanimi: Uvasmanta capishcataca, Taita Dios mandana punlla chayamungacama mana ubyashachu — nircami.

¹⁹Tandata japishpapish Taita Diosta pagui nishpa, chaupishpa yachacujcunaman cushpaca: — Caica, cancunamanta llaquichishca cana ñuca cuerpomi. Chaimanta caitaca, ñucata yuyarishpa ruracunguichijlla — nircami.

²⁰Micushca q'uipa shujtaj copata japishpapish cashnami nirca: — Cai copaca, cancunamanta ñuca yahuarta jichashpa mushuj ari ninacushcata ricuchijmi.

²¹Ñucata japichij maquica, ñucallahuantajmi cai mezapi.

²²Runa Aichayujca, Taita Dios ima shina munashca shinallatajmi tucunga. Runa Aichayujta huañuchichun entregaj runalla ¡Aij, imachari tucunga! — nircami.

²³Jesús chashna nijpica: — ¿Maijanshi chashna rurajca canchij? — nishpami caishuj chaishuj, tapunacui callarircacuna.

²⁴Chai q'uipami yachacujcunaca: — ¿Maijanshi tucuita yalli jatun nishcaca canchij? — nishpa caishuj chaishuj rimanacucujpimi,

²⁵Jesusca cashna nirca: — Llajtata jatun mandajcunallami, paicuna yuyashca shina mandancuna. Llajtapi mandajcunallami paicunallataj allitami mandacunchij nirincuna.

²⁶Cancunaca ama paicuna shina tucuichijchu. Chaipaj randica, cancunapurapi maijan alli nishca cajca, tucuimanta yalli q'uipa huiñai shinalla caichij. Tucuicunata mandajca, paicunapajta ruraj caichij.

²⁷¿Maijanshi jatun canga? ¿Micuj tiyarijchu, mana cashpaca micunata carajchu jatun canga, imashi? Micuj tiyarijmari yalli jatunca. Ashtahuanpish ñucaca cancunaman caraj shinallami cani.

²⁸Ima llaquicunahuan cajpipish, cancunaca ñucahuanmari canguichij.

²⁹Chaimantami ñuca Yaya mandanata ñucaman cushca shinallataj, ñucapish cancunamanca mandanata cuni.

³⁰Chashna cujpimi ñuca mandacujpica, ñucahuan micunguichij, ubyanguichij. Cancunaca mandangapaj tiyarinapi tiyarishpami, chunga ishqui Israel aillucunata paicuna imalla rurashcata ricuchinguichij — nircami.

³¹Mandaj Jesusca caitapishmi nirca: — Simón, Simón, cancunataca trigota shina shushungapajmi Satanasca mañarca.

³²Ashtahuanpish crij cashcata saquisha ama nichunmi, ñucaca canmantaca Taita Diosta mañarcani. Ña cutin ñucaman can cutirishpaca, ñucata alli catijcuna cachun cambaj huauquicunatapish alli yachachingui — nircami.

³³Chaimi Pedroca: — Mandaj Jesús, ñucaca carcelman rina cajpipish, huañugrina cajpipish canhuanmi risha — nijpimi,

³⁴Jesusca: — Pedro, cunan tutallataj gallo manaraj cantajpimi, quimsa cutin ñucataca mana rijsinichu ningui — nirca.

³⁵Chai q'uipami Jesusca: — Cancunataca muchila illajllata, cullqui illajllata, pargate illajllatami cacharcani. Chaipica ¿ima illarcachu? — nijpi, yachacujcunaca: — Mana ima illarcachu — nircacuna.

³⁶Chaimi Jesusca: — Shinashpaca, cunanca muchilata, cullquita maijanpish charijca apachunlla. Espadata mana charijca, churanata c'atushpa shujta randichunlla.

³⁷Cancunaman huillanimi: Quillcachishcapica ñuca imalla tucunamantaca cashnami nicun: “Millaita rurajta shinallatajmi millaita rurajcunahuan chagrushca canga” nishcaca ñami pajtagrin. Chashna nishpa ñucamanta quillcashcaca pajtanatajmi — nircami.

³⁸Chaimi paicunaca: — Mandaj Jesús, caipica ishqui espadacunatamari charinchij — nijpi Jesusca: — Ña chailla — nirca.

³⁹Chai q'uipami Jesusca Olivocuna tiyan urcuman pai rij cashca shinallataj rirca. Yachacujcunapish catishpami rircacuna.

⁴⁰Chaiman chayashpaca: — Llaquicunata mishangapaj Taita Diosta mañaichij — nirca.

⁴¹Chaita nishpaca, yachacujcunapajmanta rumita shitajpi urmana shinaman rishpami, cungurishpa Taita Diosta mañarca.

⁴²Chaipica: — Ñuca Yayitu, ima shinamanta cai jayajta ubyana shina llaquita mana apana cajpica, ñucamanta anchuchipai. Ñuca chashna nijpipish ama ñuca munashcata rurapaichu, ashtahuanpish can munashca shina rurapai — nircami.

⁴³Chaipimi jahua pachamanta shuj ángel, Jesusta sinchiyachingapaj ricurirca.

⁴⁴Jesusca llaquihuan huañucushpami ashtahuan Taita Diosta mañacurca. Chaimantami paipaj jumbica, yahuar shina pambaman achca shuturca.

⁴⁵Taita Diosta mañacushcamanta jatarishpaca, yachacujcunapajmanmi rirca. Paicunataca llaquihuan cashcamanta, dormicujtami japirca.

⁴⁶Chaimi Jesusca: — ¿Ima nishpataj dormicunguichij? Llaquicunata mishangapaj jatarishpa Taita Diosta mañaichij — nirca.

⁴⁷Jesús chashna rimacujpirajmi, achca gentecuna chaiman shamurcacuna. Chunga ishqui yachacujcunapuramanta caj Judas shuti runami, paicunata pushashpa ñaupashpa shamurca. Jesusta muchangapaj pai c'uchuyajpimi,

⁴⁸Jesusca: — Judas ¿Runa Aichayujtaca muchashpachu entregangui? — nirca.

⁴⁹Yachacujcunaca Jesusta prezu japigrijta ricushpami: — Mandaj Jesús, ¿espadahuan chugrichishunchu? — nirca.

⁵⁰Chaimi Jesushuan cajcunamanta shujca, curacunata jatun pushajpajta rurajtaca, alli lado rinrinta p'itirca.

⁵¹Chaimi Jesusca: — Ña chailla, paicunataca saquichijlla — nishpaca, chai servijpaj rinrinpi tuparishpa alliyachirca.

⁵²Curacunata pushajcunata, Taita Diospaj huasipi cuidajcunata pushajcunata, cunaj yuyajcunatapish Jesusca cashnami nirca: — ¿Shuhuata shinachu espadacunahuan, caspicunahuan japinaman shamunguichij?

⁵³Punllanta cancunahuan Taita Diospaj huasipi cajpipish, manamari japircanguichijchu. Cunanca ñucata japichina pajtajpimi, amsapi mandacuj diablo yuyaita cushcamanta ñucataca japinguichij — nircami.

⁵⁴Jesusta japishpaca, curacunata jatun pushajpaj huasimanmi pushashpa rircacuna. Pedroca, huasha huashallami catishpa rirca.

⁵⁵Chaiman chayashpaca, huasi canllapimi, ninata japichishpa muyundijta tiyarircacuna. Pedropish paicunahuanmi tiyarirca.

⁵⁶Pedro cunushpa tiyacujta shuj servij huarmi ricushpaca: — Paita ricurashpami, caipish paihuanmari carca — nirca.

⁵⁷Ashtahuanpish Pedroca: — Huarmi, paitaca mana rijsinichu — nirca.

⁵⁸Chai asha q'uipa shujtaj ricushpapish: — Canpish chaicunapuramari cangui — nijpi, Pedroca: — Ñucaca mana chaicunapurachu cani — nirca.

⁵⁹Chaimanta shuj hora shinapica, shujtajpish Pedrotaca: — Caipish galileamantamari, chai runahuan purijllatajmari — nircami.

⁶⁰Chaimi Pedroca: — Ñucaca pimanta can rimacushcata mana entendinichu — nicujpirajmi, ñapish galloca cantarca.

⁶¹Chaipimi Mandaj Jesuspish Pedrotaca tigrarishpa ricujpi Pedroca: “Gallo manaraj cantajpimi, ñucataca quimsa cutin mana rijsinichu ningui” nishpa Mandaj Jesús nishcata yuyarirca.

⁶²Chaimantami Pedroca, canllaman llujshishpa jatunta llaquirishpa huacarca.

⁶³Jesusta charicujcunaca pugllashpa asishpami, paitaca huajtarcacuna.

⁶⁴Ñahuita huatashpa huajtashpaca: — ¿Pitaj cantaca huajtanchij? Huillaiyari — nishpami tapurcacuna.

⁶⁵Jesustaca achca mana allicunata rimashpami c'amircacuna.

⁶⁶Ña pacarijpica israelcunapaj cunaj yuyajcuna, curacunata pushajcuna, mandashcacunata quillcajcunapish tandanacushpami, Jesustaca mandajcunapuralla tandanacushcapaj ñaupajman pushashpa cashna nircacuna:

⁶⁷— ¿Canca Cristochu cangui? Huillaiyari — nishpa tapujpi Jesusca: — Ari nijpipish, mana cringuichijchu,

⁶⁸cancunata ñuca tapujpipish, mana huillanguichijmanchu, mana cacharinguichijmanpishchu.

⁶⁹Cunanmanta pachami Runa Aichayujca, tucuita rurai tucuj Taita Diospaj alli ladoman tiyarigrin — nircami.

⁷⁰Chaimi tucuicuna: — Shinashpaca ¿Canca Taita Diospaj Churichu cangui? — nijpi, Jesusca: — Cancuna nishca shinallataj chaimi cani — nircami.

⁷¹Chaimi paicunaca: — ¿Imapajtaj ashtahuan uyashcata huillajcunata tapucushunchij? Ñucanchijllataj paipaj quiquin shimihuan huillashcata uyanchijca — nircacunami.