Read Chimborazo Highland Quichua LUCAS 4 Bible Online

LUCAS 4 - Chimborazo Highland Quichua bible

LUCAS 4

¹Jesusca jucha illaj Espirituhuan jundami Jordán yacumantaca tigrarca. Diospaj Espirituca shitashca pambamanmi pusharca.

²Chaipica chuscu chunga punllacunatami carca. Chai punllacunapimi, diabloca pandachisha nirca. Chuscu chunga punllacunata imata mana micushca cashpami Jesusca yaricachirca.

³Yaricaihuan cajpimi diabloca: — Diospaj Churitaj cashpaca, cai rumita tanda tucuchun niyari — nirca.

⁴Chaimi Jesusca: — Quillcachishcapica: “Runaca mana tandallahuan causangachu. Ashtahuanpish Dios rimashca tucui shimicunahuanmi causanga” ninmi — nirca.

⁵Chai q'uipami diabloca, jatun urcu jahuaman Jesusta pushashpa ñahui quimllai shinallapi cai pachapi tiyaj mandana tucui llajtacunata ricuchirca.

⁶Chaita ricuchishpami diabloca: — Cai pachapi tiyaj tucui llajtacunata mandaj canata, chaipi imalla tiyaj sumajcunatapish canmanmi cusha. Tucui caicunataca ñucamanmi curca. Piman cusha nishcaman cui tucunimi.

⁷Can ñucata cungurishpa adorajpica, tucui caicunaca cambajmi canga — nirca.

⁸Chaimi Jesusca: — Anchui caimanta Satanás. Quillcachishcapica: “Mandaj cambaj Taita Diosta adorangui, paipajllata rurangui” ninmi — nirca.

⁹Chaimanta diabloca Jerusalenman pushashpa Diospaj huasi jahua puntapi Jesusta churashpaca: — Diospaj Churitaj cashpaca, caimanta ucuman huashicui.

¹⁰Quillcachishcapica: “Canta cuidachun Diosca paipaj angelcunata cachangami.

¹¹Rumipi cambaj chaqui ama chugririchun, paicunapaj maquipi cantaca charirangami” ninmi — nircami.

¹²Chaimi Jesusca: — Quillcachishcapica: “Mandaj cambaj Taita Diostaca ama pandachinata yuyangui” ninmi — nirca.

¹³Diabloca ima shinapish pandachisha nishpa, mana pandachi tucushpaca, asha punllacama saquishpa rircallami.

¹⁴Jesusca Diospaj Espirituhuan imatapish rurai tucujmi Galileamanca tigramurca. Paimantaca tucui muyundij llajtacunapimi, huashan huashan huillanacushpa yachaj chayachircacuna.

¹⁵Jesusca israelcunapaj sinagogacunapi yachachicushpaca, tucuicuna alli nishcami carca.

¹⁶Chai q'uipami Jesusca pai huiñashca Nazaretman rirca. Samana punllapica sinagogaman rij cashca shinallataj rishpami chaiman yaicurca. Chaipica Quillcachishcata rezangapajmi shayarirca.

¹⁷Chaipica profeta Isaías quillcashca librotami curca. Chai librota japishpa pascashpaca, cashna nicujtami japirca:

¹⁸“Jatun Diospaj Espirituca, ñuca jahuapimi. Ñucataca huajchacunaman alli huillaita huillachun, shungupi llaquirishpa huañucujcunata alliyachichun, prezupi cajcunata cacharichichun, mana ricujcunata ricujta rurachun, llaquichishca causacujcunata cacharichichunmi cacharca.

¹⁹Shinallataj Jatun Dios quishpichina punlla chayamushcata huillachunmi cacharca” nishcatami rezarca.

²⁰Chai q'uipaca librota pillushpami, chai huasipi cuidajman cushpa tiyarirca. Sinagogapi tucui cajcunaca, Jesustami chaparacurcacuna.

²¹Chaipimi Jesusca: — Cai Quillcapi nishcaca cunan punllamari cancunapaj ñaupajpi pajtan — nirca.

²²Sumaj shimicunallata Jesús rimajta uyashpaca, tucuicuna mancharinacushpami paica allitamari nin nircacuna. Ashtahuanpish: — ¿Manachu caica Josepaj churilla? nishpami parlanacurcacuna.

²³Chaimi Jesusca: — Cai nishcahuanca, ñucanchij nij cashca shinallatajmi: “Jambij runa, canllataj jambiriyari” nij shinachari. Capernaumpi ñuca imallata rurashcata uyashcamantaca, cai cambaj llajtapipish chai shinallataj ruraiyari ninguichij — nirca.

²⁴Jesusca cashnapishmi nirca: — Maijan profetatapish quiquin llajtapica mana uyashun nincunachu. Chaica chashnatajmi.

²⁵Elías huillacui punllacunapica, achca viudacunami Israelpica tiyarca. Chaipica quimsa huata sujta quillata mana tamyajpimi, jatun yaricai tucui llajtapi tiyarca. Chaica chashnatajmi carca.

²⁶Israelpurapi tiyaj viuda maijan huarmicunapajmanca Eliastaca mana cacharcachu. Ashtahuanpish Sidonpi caj Sarepta pueblopi causaj shuj viudapajmanmi cacharca.

²⁷Israelpica, profeta Eliseo huillacui punllacunapica lepra ungüihuan cajcunaca achcacunami tiyarca. Chaicunataca shujllatapish mana alliyachircachu. Ashtahuanpish Siriamanta Naamán runatami alliyachirca — nircami.

²⁸Chaita uyashpaca, sinagogapi cajcunaca tucuicuna yallitaj p'iñarishpami,

²⁹huaicashpa jatarishpa Jesustaca Nazaret pueblomanta llujshichircacuna. Chai puebloca urcu jahuapi rurashca cajpimi, singuchishpa cachangapaj nishpa c'aca filoman Jesustaca pusharcacuna.

³⁰Ashtahuanpish Jesusca, paicunapaj chaupillatataj tigrashpa rircallami.

³¹Chai q'uipaca Galileapi caj Capernaum pueblomanmi Jesusca uriyarca. Chaipica samana punllacunapimi yachachicurca.

³²Paica mandajtaj shina yachachijpimi achcata mancharircacuna.

³³Sinagogapica, millai espíritu japishca shuj runami tiyarca. Paica sinchita caparishpami,

³⁴cashna nirca: — Nazaretmanta Jesús, ¿imatataj ñucanchijtaca nij shamungui? ¿Llaquichingapajchu shamungui? Ñucanchijtaca ama imata nishpa saquihuai. Ñucaca pi cashcata cantaca rijsinimi, canca Jucha Illaj Diospajmanta shamushcami cangui — nirca.

³⁵Chaimi Jesusca: — ¡Upallai, cai runamanta llujshi! — nishpami sinchita rimarca. Chaimi supaica tucuicunapaj chaupipi pambaman urmachishpa, imata mana llaquichishpa paimantaca llujshirca.

³⁶Tucuicuna mancharinacushpami: — Pai quiquinllataj mandaj cashcahuan, poderyuj cashcahuan mandajpica, millai espiritucunaca ¿llujshinllachu imamí? — nishpa caishuj chaishuj ninacurcacuna.

³⁷Jesús chashna rurashcataca, tucui llajtacunapimi huashan huashan huillanacushpa yachaj chayachircacuna.

³⁸Chai q'uipami Jesusca sinagogamanta llujshishpaca, Simonpaj huasiman yaicurca. Chaipica, Simonpaj suedra fiebrehuan ancha cajpimi alliyachipai nircacuna.

³⁹Jesusca chai ungushcapajman rishpa cumurishpaca: — Cai ungüi, anchui — nishpami rimarca. Ungüi anchujpica chai huarmica jatarishcahuan paicunaman cararcallami.

⁴⁰Inti ña huashicujpimi tucui laya ungüihuan cajcunata Jesuspajman apamurcacuna. Chaipimi Jesusca cada shujpaj jahuapi maquita churashpa alliyachirca.

⁴¹Supaicunapish achcacunamanta llujshishpaca: — ¡Canca, Diospaj Churimari cangui! — nishpami caparircacuna. Jesustaca Cristo cashcata yachajpimi, supaicunataca: — Upalla caichij — nishpa paicuna rimachunca mana saquirca.

⁴²Ña pacarijpica Jesusca pi mana causan chulunllamanmi rirca. Gentecunaca mashcashpa rishpami, pai maipi cashcaman chayarcacuna. Chaipica paicunapajmanta ama richun nishpami, maiman mana cachashun nircacuna.

⁴³Chaimi Jesusca: — Dios mandagrin alli huillaitaca, shujtaj pueblocunapipish huillagrinami cani. Chaipajmi cachashca cani — nishpaca,

⁴⁴Galileapi caj sinagogacunapimi huillarca.