Read Chimborazo Highland Quichua LUCAS 5 Bible Online

LUCAS 5 - Chimborazo Highland Quichua bible

LUCAS 5

¹Shuj punllami Jesusca Genesaret cucha c'uchupi carca. Chaipica achcacunami Diospaj Shimita Jesús huillajpi uyangapaj shamushpaca, t'angarinacushpa paita llapimucurca.

²Chaimantaca chushajlla ishqui barcocuna yacu c'uchulla uripi cajtami, Jesusca ricurca. Chalhuata japijcunaca barcocunamanta uriyashpami, linchicunata tajshacurcacuna.

³Jesusca chai barcocunamanta shuj barcopimi yaicurca. Chai barcoca Simonpajmi carca. Jesusca Simontaca: — Cai barcota allpamanta ashata caruyachipai — nijpimi, ashata caruyachirca. Jesusca chai barcopi tiyarishpami tucui chaipi cajcunata yachachirca.

⁴Ña tucui yachachishpaca Simontaca: — Barcopi chaupi cuchaman rishpa, chalhuacunata japingapaj linchicunata shitaichij — nijpimi,

⁵Simonca: — Yachachij, tucui tuta trabajashpapish ima chalhuata mana japircanchijca. Can nishcamanta linchita shitashpa ricusha — nishpami shitarca.

⁶Paicuna shitajpi yallitaj chalhuacuna jundajpi, linchica lliquiri callarijpimi,

⁷shujtaj barcopi cajcunata tauca tucushpa surcungapaj shamuichij nishpa maquihuan cayajpi shamushpaca, ishqui barcocunapish huashicusha nijta jundachircacuna.

⁸Chaita ricushpa Simón Pedroca Jesuspaj ñaupajpi cungurishpami: — Mandaj Jesús, juchasapa runami cani, ñucamanta anchuripai — nirca.

⁹Chashna achca chalhuacunata japishcamantaca Simonpish, tucui paihuan cajcunapish achcatami mancharircacuna.

¹⁰Zebedeopaj churi Jacobopish, Juanpish Simonhuan purijcunami carca. Paicunapish chaita ricushpaca achcatami mancharircacuna. Chaimi Jesusca, Simontaca: — Ama manchaichu. Canca cunanmantaca chalhuata japij shinaca runacunata ñucapajman pushamujmi cangui — nirca.

¹¹Chaimantaca barcocunata allpaman c'uchuyachishpa tucuita saquishpa Jesusta catishpa rircallacunami.

¹²Shuj pueblopi Jesús cajpimi, cashna tucurca: Leprahuan apiyashca shuj runami ricurirca. Paica Jesusta ricushpaca, cungurishpa pambacama cumurishpami: — Amito, ñucata alliyachisha ninguipishchari — nijpi,

¹³Jesusca, maquita chutashpa tuparishpaca: — Ari, alliyachisha ninimi — nincami, lepra ungüica paimanta anchurca.

¹⁴Canta pi alliyachishcataca pajta piman huillanguiman nishpami Jesusca: — Ri, curapajpi ricuchirigri. Can alliyashcamantaca Moisés mandashcapi nishca shina cugri. Chashna rurajpimi curacunaca can alliyashca cashcata yachangacuna — nircami.

¹⁵Jesús alliyachicushcaca huashan huashanmi ashtahuan ashtahuan uyarirca. Chaimantami Jesús huillashcata uyanaman, ungüimanta alliyachichunpish yallitaj achcacuna tandanacumurcacuna.

¹⁶Ashtahuanpish Jesusca paicunamanta caruyashpami pi mana causan chulunllapi Diosta mañagrij carca.

¹⁷Shuj punlla Jesús yachachicujpica, fariseocuna, mandashcacunata jatun yachachijcunapish chaipimi tiyacurcacuna. Paicunaca Galileapi, Judeapi caj tucui uchilla llajtacunamanta, Jerusalenmantapishmi shamushcacuna carca. Ungushcacunata alliyachinapajca Jesusca Jatun Diospaj poderhuanmi carca.

¹⁸Chaimanca mana cuyurij shuj runatami, huandunapi huandushpa apamurcacuna. Paicunaca, Jesús yachachicun ucuman yaicushpa paipaj ñaupajpi churanatami yuyarcacuna.

¹⁹Chai huasipica achcacuna junda cajpimi, maita mana yaicui tucushpa, huasi jahuaman huichiyashpa, huasi c'atata anchuchircacuna. Chaitami huandumushcallapitaj ungushcataca tucuicunapaj chaupiman uriyachishpa, Jesuspaj ñaupajpi churarcacuna.

²⁰Jesusca paicuna crishcata ricushpami, ungushcataca: — Cambaj juchacunataca ñami perdonani — nijpi,

²¹mandashcacunata quillcajcuna, fariseocunaca: “¿Caica pi cashpataj Diosta p'iñashpa c'amicunchu imamí? Pitaj juchacunataca perdonai tucungari. Diosllamari perdonai tucun” nishpa yuyacurcacuna.

²²Chaita yuyacujta yachashpami, Jesusca: — ¿Ima nishpataj cancunapaj shungupica chashna yuyacunguichij?

²³“¿Cambaj juchacunataca perdonashcami” ninachu, mana cashpaca: “Jatarishpa puri” ninachu, imata ninataj ashtahuan jahualla canga?

²⁴Runa Aichayuj tucushca ñucaca cai pachapi causajcunapaj juchacunata perdonai tucuj cashcataca cunanmi ricuchisha — nishpaca, (mana cuyurij runataca): — Cantaca cashnami nini: ¡Jatari, canta huandumushcata apashpa, cambaj huasiman ri! — nirca.

²⁵Chashna ninca paicuna ricucujllapitaj jatarishpaca, paita apamushca huanduta aparishpami, paipaj huasiman Diosta sumajmari cangui nirihuan rirca.

²⁶Chaipica tucuicuna mancharinacushpami, Diostaca sumajmari cangui nircacuna. Paicunaca manchaihuan junda cashpami: — Cunanca mancharinacunatamari ricushcanchij — nircacuna.

²⁷Jesusca chaimanta llujshishpaca, tributota japij Leví tributota japinapi tiyacujtami ricurca. Paitami: — Ñucata cati — nirca.

²⁸Levica jatarishcahuanmi tucuita saquishpa Jesusta catirca.

²⁹Levica paipaj huasipi Jesusta chasquishpami jatun micuita rurarca. Chaipica, tributota japij achcacunapish, shujtajcunapishmi paicunahuan mezapi micucurcacuna.

³⁰Chaimantami mandashcacunata quillcajcuna, fariseocunapish yachacujcunataca: — ¿Ima nishpataj tributota japijcunahuan, juchayujcunahuanca micucunguichij, ubyacunguichij? — nishpami, juchachishpa rimarcacuna.

³¹Chaimi Jesusca: — Mana ungushcacunaca jambijtaca mana mashcanchu, ungushcacunallami mashcancuna.

³²Ñucaca cashcata rurajcunataca mana cayaj shamurcanichu. Ashtahuanpish juchayujcuna Diosman cutirichunmi cayaj shamurcani — nirca.

³³Jesús chashna nijpimi paicunaca: — Bautizaj Juanpaj yachacujcunapish, fariseocunapaj yachacujcunapish ayunacunllacunami, Diosta mañacunllacunami. ¿Ima nishpataj cambaj yachacujcunaca mana chashna rurashpa micucunllacuna, ubyacunllacuna? — nircacunami.

³⁴Jesusca cashnami nirca: — ¿Cancunaca cazarana bodaman cayashcacunataca, novio paicunahuan cajpica ayunachinguichijchari?

³⁵Ashtahuanpish novio ña mana paicunahuan cajpimi, compañajcunaca ayunangacuna — nircami.

³⁶Yuyachij shuj parlohuanpishmi cashna nirca: — Pipish mushuj churanata p'itishpa mauca churanataca mana llachapanchu. Chashna rurashpaca, mana mushuj churanallata lliquishpa llaquichinchu. Mushujpish maucapica mana alli ricurinmanchu.

³⁷Shinallataj mushuj vinotaca, mauca capachucunapica pi mana churanchu. Chashna churajpica chai mauca capachucuna tugyajpi, vinopish capachucunapish chingarinmanmi.

³⁸Ashtahuanpish mushuj vinotaca mushuj capachucunapi churajpimi caishujpish, chaishujpish mana chingaringa.

³⁹Pipish p'ucushca vinota ubyajca, llulluraj vinotaca mana ubyasha ninmanchu. “P'ucushca vinomi ashtahuan alli” ninmanmi — nircami.