Read Chimborazo Highland Quichua LUCAS 6 Bible Online

LUCAS 6 - Chimborazo Highland Quichua bible

LUCAS 6

¹Samana punllapimi Jesusca chagra chaupita ricurca. Chaipimi paipaj yachacujcunaca trigo caspata c'utsashpa, maquihuan c'acushpa micurcacuna.

²Chaita maijan fariseocuna ricushpaca: — ¿Ima nishpataj samana punllapi mana rurana cashcata ruracunguichij? — nijpi,

³Jesusca: — Davidpish paihuan cajcunapish yaricaihuan cashcamanta, imata rurashcataca ¿manachu rezashcanguichijllapish?

⁴Paica Diospaj huasiman yaicushpaca, Diosman cushca tandata japishpami micurca. Paihuan cajcunamanpish cararcami. Chai tandataca mana pipish micunallachu carca. Curacunallami micuna carca — nircami.

⁵Shinallataj: — Runa Aichayujca, samana punllatapish Mandajmi — nircami.

⁶Chai q'uipapish samana punllallapitajmi Jesusca sinagogaman yaicushpa yachachirca. Chaipica alli lado maqui chaquishca shuj runami tiyacurca.

⁷Samana punllapi chai runata Jesús alliyachijpica juchachingapajmi, mandashcacunata quillcajcuna, fariseocunapish chaparacurcacuna.

⁸Ashtahuanpish Jesusca, paicuna cashna yuyacujta yachashpami, chaquishca maquiyuj runataca: — Jatari, caicunapaj chaupipi shayari — nijpica, jatarishcahuan shayarirca.

⁹Chaimi Jesusca: — Cancunataca caita tapusha: Samana punllapica ¿allita ruranachu, mana cashpaca mana allita ruranachu, huañuimanta quishpichinachu, mana cashpaca huañuchinachu, imata ruranataj alli canga? — nirca.

¹⁰Chai tucuicunata muyundijta ricushpami, chai runataca: — Cambaj maquita chutai — nirca. Pai chutajpica, chai maquica alliyarcallami.

¹¹Chashna rurajpica yallitaj p'iñarishpami Jesustaca ¿imatataj rurashun? nishpa caishuj chaishuj parlanacurcacuna.

¹²Chai punllacunapimi Jesusca, Diosta mañangapaj urcuman rirca. Chaipica tucui tutami Diosta mañarca.

¹³Ña achijyajpica paita caticujcunata cayashpami, paicunapuramanta chunga ishquita agllarca. Paicunatami apostolcunata shutichirca.

¹⁴Chai agllashcacunaca: Simón paillatatajmi Pedro nijpish carca. Simonpaj huauqui Andrespish, Jacobopish, Juanpish, Felipepish, Bartolomepish,

¹⁵Mateopish, Tomaspish, Alfeopaj churi Jacobopishmi carca. Llajtapi quiquin mandajta charingapaj macanacujpuramanta Simonpish,

¹⁶Jacobopaj huauqui Judaspish, Judas Iscariotepishmi carca. Paimi, Jesusta huañuchichun japichij carca.

¹⁷Jesusca paipaj yachacujcunandij urcumanta uriyamushpaca, shuj pambapimi paita catij achcacunandij carca. Chaimanca tucui Judeamanta, Jerusalenmanta, mama cucha uripi caj Tiromanta, Sidonmantapishmi Jesús yachachishcata uyangapaj, ungüicunamanta alliyachishca cangapajpish shamushcacuna carca.

¹⁸Chaipica millai espiritucuna llaquichishca cashcacunatapish alliyachircami.

¹⁹Tucui ungüihuan cajcunata alliyachina poderta charijta ricushpami, tucuicuna Jesuspica tuparishun nircacuna.

²⁰Jesusca, paipaj yachacujcunata ricushpaca cashnami nirca: “Huajchacunaca, cushichishcami canguichij. Taita Dios mandagrinca cancunapajmi.

²¹Cunan yaricaihuan cajcunaca, cushichishcami canguichij. Mana nijtami micunguichij. Cunan huacacujcunaca, cushichishcami canguichij, yallitajmi asinguichij.

²²Runa Aichayujta caticushcamanta runacuna p'iñajpi, mana ricunachishpa paicunapuramanta anchuchijpi, cancunapaj shutitaca millaita rurajta shina yangata rurashpa c'amijpipish cushichishcami canguichij.

²³Chai punllacunapica, yallitajmi cushicunguichij. Cancuna jahua pachapi japina cashcaca, tucuita yalli jatunmari. Paicunapaj ñaupa yayacunapish, profetacunata chashnallataj llaquichijcunami carca.

²⁴Aij, achcata charijcunalla, cancuna charishcahuan ña cushicucushcamanta ¡imachari tucunguichij!

²⁵Aij, cunan mana nijta micucujcunalla q'uipataca yaricaihuan ¡imachari tucunguichij! ¡Aij, cunan asicujcunalla! Q'uipataca achcata llaquirishpami huacanguichij.

²⁶Tucui runacuna cunan alli nishcacunalla ¡aij, imachari tucunguichij! Paicunapaj ñaupa yayacunapish, llulla profetacunatarajmi alli nijcuna carca.

²⁷Ashtahuanpish cunan caipi uyacujcunataca, cashnami nini: Cancunata p'iñajcunataca c'uyaichij, cancunata llaquichijcunapajca allita ruraichij.

²⁸Llaqui tucushca canman nijcunataca alli cashca cuchun nichij, yanga juchachijcunamantaca Taita Diosta mañaichij.

²⁹Shuj lado quijadospi huajtajpica, caishuj ladotapish ricuchingui. Jahua churanata quichujpica, camizatapish apachun saquinguilla.

³⁰Maijan canta imata mañajpica, cunguilla. Cambajta maijan imata apajpica, tigrachi nishpa ama mañangui.

³¹Ima shinami shujtajcunataca cancunapaj allita rurachun munanguichij, chashnallataj cancunapish shujtajcunapaj allita ruraichij.

³²Cancunata c'uyajcunallata c'uyashpaca, ima allita mana ruranguichijchu. Juchayujcunapish paicunata c'uyajcunataca c'uyanllatajmi.

³³Cancunapaj allita rurajcunapajlla allita rurashpaca, ima allita mana ruranguichijchu. Juchayujcunapish chashnaca ruranllatajmi.

³⁴Imata mañachishpapish, mañachishcamanta imata japina yuyailla mañachishpaca, ima allita mana ruranguichijchu. Juchayujcunapish imata japina yuyaillahuanca mañachinacunllami.

³⁵Ashtahuanpish cancunata p'iñajcunata c'uyashpa, paicunapaj allita ruraichij. Imata mañachishpaca chaimanta imata japinataca ama yuyaichijchu. Cancuna japinaca tucuimanta alli jatunmi. Jahua pachapi caj Taita Diospaj huahuacunami canguichij. Taita Diosca mana pagui nijcunatapish, mana allicunatapish llaquijmi.

³⁶Cancunapaj Yaya llaquij caj shinallataj, cancunapish llaquijcuna caichij.

³⁷Pitapish ama juchachichijchu. Cancunatapish Taita Dios ama juchachichun. Pitapish caitaca llaquichinatajmi ama nichijchu. Cancunatapish Taita Dios ama llaquichichun. Shujtajcunata perdonaj caichij, cancunatapish Taita Dios perdonachun.

³⁸Shujtajcunaman cuichij, Taita Diospish cancunamanca jatun jatunpi tushuchishpa, llapishpa talliricujtami cunga. Cancuna ima shinami shujtajcunaman jatun jatunpi cunguichij, chashnallatajmi cancunamanpish cunga” nircami.

³⁹Shuj yuyachij parlohuanpish cashnami nirca: “¿Mana ricujca, caishuj mana ricujtaca pushai tucungachari? ¿Manachu ishquindijtaj jutcupi huashicunman?

⁴⁰Yachacujca paita yachachijtaca mana yallichu. Yachanata tucuchishpami paita yachachij shina tucunga.

⁴¹¿Ima nishpataj cambaj huauquipaj ñahuipi ujsha tiyacujtaraj ricungui? Cambaj quiquin ñahuipi jatun caspi tiyacujtaca manamari ricunguichu.

⁴²Cambaj ñahuipi jatun caspi tiyacujta mana anchuchishpaca ¿ima shinataj huauquitaca: “Huauqui, cambaj ñahuipi tiyacuj ujshata shuyai llujshichisha” ninguiyari? Mishqui shimi jayaj shungu, cambaj ñahuipi tiyacuj caspitaraj llujshichiyari. Chashnami huauquipaj ñahuipi tiyacuj ujshataca alli ricushpa llujshichingui” nircami.

⁴³Alli yurapica mana alli granoca, mana p'ucunchu. Mana alli yurapipish, alli granoca mana p'ucunchu.

⁴⁴Ima yura cajpipish, grano p'ucujpimi rijsinchij. Higocunataca mana casha yuramantaca tandanchu. Uvascunatapish mana zarza cashamanta tandanchu.

⁴⁵Alli runaca, sumaj yuyaicunata shungupi huaquichishca cashpami allita riman. Millai runaca, millai yuyaicunata shungupi huaquichishca cashpami millaita riman. Shungupi imami junda tiyan chaillatajmi shimimanca llujshin.

⁴⁶“¿Ima nishpataj manapish ñuca nishcata rurashpa ñucataca: “Mandaj Jesús, Mandaj Jesús” ninguichigari?

⁴⁷Pipish ñucapajman shamushpa ñuca huillashcata uyashpa cazujca, ima shina cana cashcatami ricuchigrini:

⁴⁸Paica, ucujta allashpa yacu rumi jahuapi huasita shayachij runa shinami. Yacu rumi jahuapi alli shayachishca huasitaca, tamya shamushpa jatun yacu jatarishpa sinchita huajtashpapish mana cuyuchi tucurcachu.

⁴⁹Ashtahuanpish ñuca huillashcata uyashpa mana rurajca, ucujta mana allashpa, allpa jahuallapi huasichij runa shinami. Chai huasica tamyajpi jatun yacu jatarishpa sinchita huajtajpica urmarcami. Chaipica jatun mancharina llaquimi carca” nircami.