Read Chimborazo Highland Quichua LUCAS 7 Bible Online

LUCAS 7 - Chimborazo Highland Quichua bible

LUCAS 7

¹Jesusca paita uyajcunaman ña tucui parlashca q'uipaca, Capernaummanmi rirca.

²Chaipica patsaj soldadocunata mandajpaj achcata c'uyashca paipajta rurajmi, huañunalla ancha ungushca carca.

³Chai mandajca, Jesusmanta parlanacujta uyashpami, judiocunata cunaj maijan yuyajcunata paipajta rurajta alliyachichun Jesusta rogashpa pushamugrichij nishpa cacharca.

⁴Paicuna Jesuspajman chayashpaca, patsaj soldadocunata mandaj imata nishcata huillashpami cashna nishpa rogarcacuna: — Paica allita rurajmi, chaimanta paitapish ayudapai.

⁵Paica ñucanchij judiocunata c'uyashpa shuj sinagogatami shayachirca — nircacunami.

⁶Jesusca paicunahuanmi rirca. Ashtahuanpish huasiman chayagricujpimi, patsaj soldadocunata mandajca paihuan alli apanacuj maijancunata cashna nichun cacharca: — Amito, mana p'iñachisha ninichu. Ñucaca allillapish cajpichu, ñuca huasimanca yaicunguiyari.

⁷Ñucaca cambajmanca mana ripajllapish cashpami mana ri tucurcani. Ashtahuanpish chaillamanta rimapai, ñucapajta rurajca alliyangallami.

⁸Ñucapish mandaj churashca cashcamanta, mandangapaj soldadocunatami charini. Maijanta: “Ri” nijpica rinllami, shujtajta: “Shamui” nijpipish shamunllami. Ñucapajta rurajtapish: “Caita rurai” nijpica, chaita ruranllami — nircami.

⁹Chaita Jesús uyashpaca, mancharishpami caticujcunapajman tigrarishpaca: — Cashnami nini: Cashna yallitaj crijtaca, Israelpipish manataj japishcanichu — nirca.

¹⁰Cachashcacuna huasiman tigramushpaca, ungushca servijtaca alliyashcatami japircacuna.

¹¹Chashna tucushca q'uipaca Jesusca achca yachacujcunandij, achca runacunandijmi Naín puebloman rirca.

¹²Puebloman yaicuna punguman chayagricujpica, viuda mamapaj shujlla churi huañushcatami pambanaman apacurcacuna. Pueblomanta achcacunami paihuanca ricurcacuna.

¹³Mandaj Jesusca chai viudata ricushpa llaquishpami: — Ama huacaichu — nirca.

¹⁴Pai c'uchuyashpa huañushcata apacun huandupi tuparijpi huandujcuna shayarijpica Jesusca: — Huambra, cantaca jatari ninimi — nijpi,

¹⁵huañushca jatarishpa rimai callarijpica, chai huambrataca paipaj mamamanmi curca.

¹⁶Chaita ricushpaca tucuicuna yallitaj mancharinacushpa Taita Diosta sumajmari cangui nishpaca: “Ñucanchijpurapica, shuj jatun profetami ricurishca. Taita Diosmari paipaj cajcunata ricuj shamushca” nircacuna.

¹⁷Jesús chashna rurashcaca tucui Judeapi, tucui muyundij llajtacunapimi huashan huashan yachaj chayarirca.

¹⁸Jesús chashna rurashcataca bautizaj Juanmanca paipaj yachacujcunami tucuita huillarcacuna. Chaimi Juanca paipaj yachacujcunamanta ishquita cayashpaca:

¹⁹“¿Canchu chai shamuna cashcaca cangui, mana cashpaca shujtajtachu shuyana canchij?” nishpa tapugrichun Jesuspajman cacharca.

²⁰Paicuna Jesuspajman chayashpaca: — “¿Canchu chai shamuna cashcaca cangui, mana cashpaca shujtajtachu shuyana canchij?” ninmi bautizaj Juanca — nishpami tapurcacuna.

²¹Paicuna chaillapitaj cajpimi, ima ungüihuan caj achcacunata, llaquichij ungüihuan cajcunata, millai espiritucuna japishcacunata, mana ricujcunatapish achcacunata alliyachirca.

²²Chaimi Jesusca: — Richij, cancuna imata ricushcata, uyashcata, ñahui mana ricujcuna ricushcata, cojocuna purishcata, leprahuan cajcuna alliyashcata, mana uyajcuna uyashcata, huañushcacuna causarishcata, huajchacunamanpish alli huillaita huillashcata bautizaj Juanmanca huillagrichij.

²³Maijanpish ñucapi mana ñitcarijca cushichishcami canga — nircami.

²⁴Bautizaj Juan cachashcacuna rishca q'uipami, Jesusca tucui chaipi cajcunaman Juanmantaca cashna parlai callarirca: — Shitashca pambapica ¿imata ricungapajtaj rircanguichij? ¿Shuj carrizota huaira caiman chaiman cuyuchicujtachu ricugrircanguichij?

²⁵Mana cashpaca ¿shuj runa sumaj churanacunata churarishcatachu ricugrircanguichij? Sumajta churarishcacunaca, jatun mandajcunapaj huasicunallapimi cushicushpa causancuna.

²⁶Shina cajpica ¿imata ricungapajtaj llujshircanguichij? ¿Shuj profetata? Ari, cashnami nini: Paica profetatapish yallimari.

²⁷Bautizaj Juanmantaca, cashna quillcashcami tiyacun: “Ñuca ima nishcata huillajtaca cambaj ñaupami cachani. Paimi cambaj ñaupa rishpa, can purina ñanta allichinga” nishcami.

²⁸Cancunaman huillanimi: Cai pachapi huacharishcacunapurapica, bautizaj Juanta yalli allica pi mana tiyashcachu. Shina cajpipish cai pachapi imapish mana cajcunami Taita Dios mandacujpica, bautizaj Juanta yalli cangacuna — nircami.

²⁹Tucui chaipi cajcunapish, impuestota japijcunapish Juan bautizashca cashcamantami Jesús chashna nijta uyashpaca: “Taita Diosca allitamari rurashca” nircacuna.

³⁰Fariseocunapish, Mandashcacuna ima nisha nishcata yachachijcunapish Juan bautizacujpi mana bautizarijcunaca, Dios ima shina paicunapaj allita ruracushcataca p'iñashpami mana chasquishun nircacuna.

³¹Mandaj Jesusca cashnapish nircami: — Cunan cai punlla causajcunataca ¿imahuantaj ch'imbapurashari? ¿Imaman rijchajcunataj canguichijchu imamí?

³²Paicunaca plazapi tiyacuj huambracuna caishuj chaishuj cashna caparicuj shinami: “Flautapi tocajpipish, mana bailarcanguichijchu. Huañuipi cantanata tocajpipish mana huacarcanguichijchu” nicuj shinami.

³³Bautizaj Juan shamushpaca, mana micuj, vinota mana ubyajmi carca. Paitaca: “Supaitami charin” ninguichijmi.

³⁴Runa Aichayuj tucushpa shamujca micujmi, ubyajmi. Chai runaca: “Achcata micujmi, vinotapish ubyajmi, impuestota japijcunahuan, juchayujcunahuanpish tandanacunllami” ninguichijmi.

³⁵Ashtahuanpish Taita Dios yachaj cashcataca paipaj huahuacunallami alli nincuna — nircami.

³⁶Chai q'uipami fariseocunapuramanta shuj runaca, ñuca huasipi jacu micushun nishpa rogajpi Jesús rishpaca micungapaj tiyarirca.

³⁷Chai pueblopica juchasapa shuj huarmimi causarca. Paica fariseopaj huasipi Jesús micucujta yachashpami, alabastro botellapi mishquijllata ashnacujta apashpa shamurca.

³⁸Paica Jesuspaj huasha ladota shamushpami paipaj chaquiman cumurishpa achcata huacashpa chaquipi huiquita shutuchi callarirca. Chaitaca paipaj ajchahuan chaquichishpami, chaquita muchashpa pai apashca mishquijllata ashnacujtapish Jesuspaj chaquipi tallirca.

³⁹Chaita ricushpami micunaman cayaj fariseoca paipaj yuyaipica: “Caica profetataj cashpaca, chai huarmi pi cashcata, ima shina huarmi paipaj chaquipi tuparicujtaca yachanmanmi. Chai huarmica juchasapamari” niricurcami.

⁴⁰Chaimi Jesusca: — Simón, cantaca caitami nisha nini — nijpi fariseoca: — Nipailla, Yachachij — nijpi,

⁴¹Jesusca: — Cullquita mañachij shuj runami ishqui debijcunata charirca: Shujca pichca patsaj denariota, caishujca pichca chunga denariotami debirca.

⁴²Chai debijcuna imata mana pagai tucujpica, ishquindijtatajmi perdonarca. Canca ¿imatataj yuyangui? Chai ishquimantaca ¿maijanshi yalli c'uyanga? — nirca.

⁴³Chaimi Simón fariseoca: — Maijantami yalli debita perdonarca, chaimi yalli c'uyanga yuyanimi — nijpi Jesusca: — Allitamari ningui — nirca.

⁴⁴Chai huarmita ricushpami Simontaca: — ¿Cai huarmi imata rurajta ricunguichu? Cambaj huasiman yaicumujpica, ñuca chaquita maillachun yacuta mana curcanguichu. Ashtahuanpish cai huarmica, ñuca chaquita huiquihuan maillashpami paipaj ajchahuan chaquichirca.

⁴⁵Canca ñucataca allillachu cangui nishpaca mana mucharcanguichu. Ashtahuanpish cai huarmica yaicumuimanta pachami, ñuca chaquitaca muchacunlla.

⁴⁶Canca ñuca umapipish aceitetahuan mana churarcanguichu. Ashtahuanpish cai huarmica mishquijllata ashnacujtami, ñuca chaquipi churan.

⁴⁷Chaimantami cantaca cashna nini: Paipaj achca juchacunata perdonashcata yachashpami, cai huarmica ñucataca achcata c'uyan. Ashalla juchacunata perdonashcacunaca ashallatami c'uyan — nirca.

⁴⁸Jesusca chai huarmitaca: — Cambaj juchacunaca perdonashcami — nircami.

⁴⁹Chaimi mezapi Jesushuan tandalla micucujcunaca: — ¿Cai runaca pi cashpataj juchacunata perdonani ninchu imamí? — nishpami paicunapuralla ninacucurcacuna.

⁵⁰Ashtahuanpish Jesusca chai huarmitaca: — Canca crishcamantami quishpichishca cangui, sumajta causagrilla — nirca.