Read Chimborazo Highland Quichua LUCAS 8 Bible Online

LUCAS 8 - Chimborazo Highland Quichua bible

LUCAS 8

¹Chai q'uipami Jesusca tucui pueblocunapi, muyundij llajtacunapipish, Dios mandagrin alli huillaita huillashpa purirca. Chunga ishqui yachacujcunapish,

²millai espiritucuna japishcacunata, ima ungüihuan cajcunatapish alliyachishca maijan huarmicunapishmi Jesushuanca rirca. Chai huarmicunapurapica, canchis supaicunata llujshichishca Magdalamanta Mariapish,

³Mandaj Herodespaj mayordomo Chuza runapaj huarmi Juanapish, Susanapish, shujtaj achca huarmicunapishmi paicuna imalla charishcacunahuan ayudarcacuna.

⁴Mai pueblocunamantapish achcacuna Jesuspajman tandanacumujpimi, yuyachij parlota parlashpa cashna nirca:

⁵“Tarpuj runa muyuta tarpunaman llujshishpa muyuta shitacujpica, asha muyuca ñanpi urmajpi sarurcacunami, pajarocunapish shamushpa micurcacunami.

⁶Asha muyuca rumipimi urmarca. Huiñashca q'uipaca nuyu illashcamanta chaquirircallami.

⁷Asha muyuca casha chaupipimi urmarca. Cashacunandij huiñashpa cashacuna llapijpimi mana granorca.

⁸Asha muyuca alli allpapimi urmarca. Chaipica alli huiñashpami, shuj muyullamanta patsajta p'ucurca” nishpaca: “Maijanpish uyanapaj rinrinta charijca, tucui yuyaihuan uyachun” nishpami sinchita rimarca.

⁹Chaimi Jesuspaj yachacujcunaca: — Cai yuyachij parloca ¿imatataj nisha nin? — nishpa tapujpi,

¹⁰Jesusca cashna nirca: — Taita Dios mandagrin pi mana yachashca pacalla cajtaca, paillatajmari cancunamanca yachachishca. Ashtahuanpish shujtajcunamanca yuyachij parlocunallahuanmi imatapish yachachicuni. Paicunaca ricushpapish mana ricushca shinami tucun. Uyashpapish mana uyashca shinallatajmi tucun.

¹¹Yuyachij parloca caitami nisha nin: Muyuca Taita Diospaj Shimimi.

¹²Lluchu ñan shinaca huillashca Shimita uyajcunami. Paicuna uyashca shimita ama crishpa, ama quishpirichunmi diablo shamushpa paicunapaj shungumanta anchuchin.

¹³Rumi shinaca huillashca Shimita uyashcahuan cushicushpa chasquijcunami. Shina cashpapish sapi mana ucujta cashcamanta paicuna crishcataca ashacamallami catin. Crij cashcamanta llaquicuna shamujpica saquirinllacunami.

¹⁴Cashalla allpa shinaca huillashca Shimita uyajcunami. Ashtahuanpish uyashpa rishca q'uipaca, cai pachapaj munaicuna, charijyana munaicuna, aichata cushichina munaicuna tapajpimi, paicunapaj causaipica imata mana granon.

¹⁵Ashtahuanpish alli allpa shinaca, tucui shunguhuan, tucui munaihuan huillashca Shimita uyashpa, mana cungarishpa chaitataj rurashpa granoshcata ricuchijcunami.

¹⁶Luzta japichishpaca cajón ucupi, cama ucupi churangapajca pi mana japichinchu. Ashtahuanpish huasi ucuman yaicujcuna achijllapi yaicuchunmi lámpara tiyanapi churan.

¹⁷Shina cajpica ima mana pacalla canapajchu. Pi mana yachashcaca mana cangachu. Tucuicunapaj ñaupajpi ricuringatajmi.

¹⁸Riquichij, imata uyashcataca yuyaipi charinguichij. Chaita charirajmanca, ashtahuanmi cunga. Mana charirajmanca pai charisha nicushcatapish quichungami — nircami.

¹⁹Chaipi cajpimi Jesuspaj mamapish, huauquicunapish paipajman shamurcacuna. Achca gentecuna chaipi cashcamantami, paipajmanca mana c'uchuyai tucurcacuna.

²⁰Chaita ricujcunaca: — Cambaj mama, cambaj huauquicunamari canhuan parlashun nishpa canllapi shuyacuncuna — nijpimi,

²¹Jesusca: — Taita Diospaj Shimita uyashpa cazujcunami ñuca mama, ñuca huauquicunaca — nirca.

²²Shuj punllami Jesusca paipaj yachacujcunandij, barcoman yaicushpaca: — Cai cucha ch'imbanijman jacuchij — nishpa rircacuna.

²³Cuchata ch'imbacujpimi, Jesusca dormirirca. Chai cuchapica, huairandij tamya ñapish jatarijpimi, yacuca barcopi jundai callarijpi llaqui tucugrircacuna.

²⁴Chaimi yachacujcuna Jesuspajman c'uchuyashpaca: — ¡Yachachij, Yachachij huañugrinchijmari! — nishpa rijchachircacuna. Pai rijcharishpaca, huairatapish, yacutapish casijlla tucuichij nishpa sinchita rimajpica, casijlla tucurcallami.

²⁵Chaimi Jesusca: — ¿Ima nishpataj mana cringuichij? — nijpi, paicunaca chujchushpa mancharishpaca, caishuj chaishuj: — Cai runaca ¿pitagari? huairapish, yacupish pai mandajpica cazunllamari — ninacurcacuna.

²⁶Chaimantaca Galilea llajta ch'imbapura cucha uripi caj gadarenocunapaj llajtamanmi chayarcacuna.

²⁷Jesús chaiman chayashpa barcomanta uriyajpica, chai pueblomanta shuj runami paihuan tupaj shamurca. Chai runaca supaicuna japishca cashpami, achca huatacunata churanatapish mana churarishca, huasipipish mana causashpa, panteoncunallapi causaj carca.

²⁸Jesusta chai runa ricushpaca, paipaj ñaupajpi urmashpami: — Jahua pachapi caj Taita Diospaj Churi Jesús ¿imatataj nij shamungui? Ama ñucata llaquichihuaichu — nishpami sinchita caparirca.

²⁹(Jesusca millai espiritutaca chai runamanta llujshichunmi mandarca. Millai espirituca chai runataca uni huatacunata mandacujpimi, paitaca cadenacunahuan huatashpa, grillo nishca fierrocunahuanpish canichijcuna carca. Ashtahuanpish cadenacunatapish p'itishpami, mai shitashca pambacunamanpish supaicunaca apajlla carca.)

³⁰Jesusca chai runataca: — ¿Ima shutitaj cangui? — nishpa tapujpimi paica: — Legionmi cani — nirca. Achca supaicuna yaicushca cashpami chashnaca nirca.

³¹Chai supaicunaca ucujta jutcumanca ama cachahuaichu nishpami rogarircacuna.

³²Chai chaininijlla urcupica, canlla achca c'uchicunami micucurca. Supaicunaca chai cuchicunapi yaicungapaj saquihuai nijpimi, Jesusca richun saquircalla.

³³Supaicuna chai runamanta llujshishpa cuchicunapi yaicujpimi, chai canlla cuchicunaca c'aca quinrita singushpa cuchapi huashicushpa huañurcacuna.

³⁴Cuchicunata michijcunaca, achcata mancharishpami pueblopi, llajtacunapipish imalla tucushcata huillarcacuna.

³⁵Chaita uyajcunaca ima tucushcata ricungapajmi shamurcacuna. Paicuna Jesuspajman shamushpaca, supaicunata llujshichishca runataca, alli yuyaiyuj churanacunatapish churarishca, Jesuspaj ñaupajpi tiyacujta ricushpaca achcatami mancharircacuna.

³⁶Chaita ricujcunaca supai japishca runata ima shina alliyachishcatami tucuicunaman parlarcacuna.

³⁷Chaita uyashpaca tucui chai muyundij llajtamanta rij gadarenocunami achcata mancharishpa, Jesustaca caimanta ripailla nijpi Jesusca, barcopi yaicushcahuan tigrashpa rirca.

³⁸Supaicunata llujshichishca runaca ñucatapish canhuan pushahuai nishpami Jesustaca rogarirca. Ashtahuanpish Jesusca, cayacama nishpaca:

³⁹— Cambaj huasiman rilla. Taita Dios canta achcata c'uyashpa alliyachishcata tucuita parlagri — nijpimi chai runaca, Jesús paita ima shina alliyachishcataca, tucui pueblopi causajcunaman huillashpa rirca.

⁴⁰Jesús ña cutin tigramujpica, tucuicuna paita shuyacushcamantami, achcata cushicushpa tuparcacuna.

⁴¹Jesús chaipi cajpica sinagogapi pushaj Jairo shuti runa shamushpami, Jesuspaj ñaupajpi cungurishpa ñuca huasiman jacu nishpa rogarca.

⁴²Paica ancha ungushca huañunalla, chunga ishqui huatayuj shujlla ushushitami charirca. Jesús chaiman ricujpica, achcacunami llapirinacui caticurcacuna.

⁴³Chaicunapurapica, chunga ishqui huatata yahuar cachariricuj llaquita apacuj shuj huarmipishmi carca. Paica jambij doctorcunapajman rishpapish manataj alliyashpami tucui charishcacunallata tucuchirca. Paitaca, pi mana alliyachi tucurcachu.

⁴⁴Chai huarmica Jesuspaj huasha ladota allijlla shamushpami, Jesuspaj churana puntapi tuparirca. Churana puntapi tuparincami yahuar cachariricushcaca chaquirirca.

⁴⁵Chaimi Jesusca: — ¿Pitaj ñucapi tuparinchu imamí? — nijpi tucui chaipi cajcunaca pi mana tuparinchijchu ninacujpi Pedropish, paihuan cajcunapish: — Yachachij, cai tucuicuna t'angarinacushpa llapirinacucushca jahuachu: “¿Pitaj ñucapi tuparinchu ningui imamí?” — nircacuna.

⁴⁶Chaimi Jesusca: — Alliyachina poder ñucamanta llujshijpimi, maijantajshi ñucapi tuparishcata yachani — nirca.

⁴⁷Chai huarmica pacalla alliyashpalla mana saquiri tucushpami shamushcahuan Jesuspaj ñaupajpi manchaihuan chujchushpa cungurishpa, imapaj tuparishcata, chai churanapi tuparinca alliyashcatapish chai tucuicunapaj ñaupajpi huillarca.

⁴⁸Chaimi Jesusca: — Huahua canca crishcamantami alliyachishca cangui. Sumajta causagrilla — nirca.

⁴⁹Jesús rimacujpirajmi, sinagogapi pushajpaj huasimanta shuj shamushpaca: — Cambaj ushushica ñami huañun. Yachachijtaca ama ashtahuan p'iñachichu, saquilla — nirca.

⁵⁰Chaita Jesús uyashpaca: — Ama manchaichu, alliyachina cashcata crilla — nirca.

⁵¹Jairopaj huasiman ña chayashpaca, pita mana yaicuchishpami, Jesusca Pedrondij, Jacobondij, Juandij chai huahuapaj yaya mamandijlla yaicurcacuna.

⁵²Tucuicunami paimantaca, achcata llaquirishpa huacacurcacuna. Chaimi Jesusca: — Ama huacaichijchu, huambraca mana huañushcachu, ashtahuanpish dormicunllami — nirca.

⁵³Chaipica chai huambra huañushcataj cashcata yachashcamantami asircacuna.

⁵⁴Ashtahuanpish Jesusca maquimanta japishpa sinchita rimashpami: — ¡Huambra, jatari! — nijpi,

⁵⁵espíritu tigrajpica jatarircallami. Chaimi Jesusca, micunata caraichij nishpa mandarca.

⁵⁶Paipaj yaya mamaca achcatami mancharircacuna. Ashtahuanpish Jesusca, cashna alliyachishcataca pajta piman huillanguichijman nircami.