Read Chimborazo Highland Quichua DEUTERONOMIO 11 Bible Online

DEUTERONOMIO 11 - Chimborazo Highland Quichua bible

DEUTERONOMIO 11

¹Mandaj cancunapaj Taita Diosta c'uyanguichij. Pai mandashcacunatapish, chaitataj pajtachichun nishcacunatapish, pajtachinguitaj nishcacunatapish, mandashcacunatapish punllanta pajtachinguichij.

²Cunanca caita entendichij: Mandaj Dios cancunapaj Taita Dios llaquichishcata manapish yachashca caj, manapish ricushca caj cancunapaj huahuacunamanca mana rimacunichu. Mandaj Dios jatun cashcahuan, tucuita rurai tucuj paipaj maquihuan, paipaj rigrata chutashcahuan,

³Egipto llajtapipish Egiptota jatun mandaj faraontapish, tucui chai llajtatapish pi mana rurai tucuipaj jatun mancharinacunata rurashpa llaquichishcataca paicunaca mana ricurcacunachu.

⁴Egipto soldadocunatapish, caballocunatapish, paicunapaj carrocunatapish imata rurajtaca mana ricurcacunachu. Paicunataca cancunata catishpa shamucujpimi, Mandaj Diosca Puca Cuchapi pambashpa huiñaipaj chingachirca.

⁵Cancuna caiman chayamungacama shitashca pambapi cancunahuan imallata rurashcatapish mana ricurcacunachu.

⁶Rubenpaj huahua huahuacunamanta caj Eliabpaj churi Datantapish, Abiramtapish imata rurashcataca mana ricurcacunachu. Paicunataca tucui familiacunandij, carpa huasicunandij, tucui animalcunandij israelcunapaj chaupipimi allpa pascarishpa millpurca.

⁷Mandaj Dios chai jatun ruranacunata rurashcataca, cancunamari quiquin ñahuihuan ricurcanguichij.

⁸Cunan cancunapaj cachun japigricun llajtaman yaicungapaj c'ari c'ari ch'imbashpa chai llajtata japingapajca, cunan ñuca quillcashpa cancunaman mandashpa cushca mandashcacunata tucuita pajtachinguichij.

⁹Chaimi cancunapaj ñaupa yayacunamanpish, paicunapaj huahua huahua cancunamanpish Mandaj Dios cancunapaj Taita Dios cushatajmi nishca llajtapica uni huatacunata causanguichij. Chai llajtaca lechepish, sacha chuspipaj mishquipish yacu shina llujshicuj llajtami.

¹⁰Cancunapaj cachun japigricuj llajtaca, mana cancuna llujshimushca Egipto llajta shinachu. Egiptopi muyuta tarpushpaca huertapi regaj shinallami yacutaca chaquillahuan regaj carcanguichij.

¹¹Ashtahuanpish cunan cancuna japigricun llajtaca urcucunapish, pugru pambacunapish jahua pachamanta tamyashca yacuhuan regashca llajtamari.

¹²Chai llajtaca Mandaj Dios cancunapaj Taita Dios cuidacun llajtami. Huata callarimantapacha huata tucuricama Mandaj Dios cancunapaj Taita Dios chaparacun llajtami.

¹³Cunan ñuca quillcashpa cushca mandashcacunata chaitataj pajtachishpa tucui shunguhuan, tucui almahuan Mandaj Dios cancunapaj Taita Diosta c'uyashcamanta paipajta rurajpica,

¹⁴cancunapaj allpapica tamyana punllacunallapitaj ñaupa tamyatapish, q'uipa tamyatapish tamyachisha. Chaipica trigota, vinota, aceitetami cancunaca tandanguichij.

¹⁵Cancunapaj animalcunapajpish q'uihuapish mana illangachu. Cancunapish mana nijtami micunguichij.

¹⁶Ñataj cancunapaj shungullapitaj umaringuichijman. Ñataj Mandaj Diosmanta anchurishpa, shujtaj dioscunapajta ruraj tucushpa chaicunapaj ñaupajpi cunguringuichijman.

¹⁷Chashna rurajpica, Mandaj Dios nina sindirij shina cancunahuan p'iñarishpa jahua pachata huichcashpa mana tamyachingachu, allpapipish ima granota mana p'ucuchingachu. Mandaj Dios cancunaman cushca alli llajtapi cashpapish cancunaca utcami chingaringuichij.

¹⁸Chaimanta cai ñuca mandashca shimicunataca cancunapaj shungupi, cancunapaj yuyaipi huaquichichij. Cai mandashcacunataca ima ricunacunata shina cancunapaj maquipi, cancunapaj ñahui patapi huataringuichij.

¹⁹Chaicunataca cancunapaj huahuacunamanca huasipi tiyarishpapish, ñanta puricushpapish, dormij siriricushpapish, jataricushpapish yachachiranguichij.

²⁰Shinallataj cancunapaj huasi pilarcunapipish, huasi pungucunapipish quillcanguichij.

²¹Cancunapaj ñaupa yayacunaman cushatajmi nishca llajtapi tucui cancunapaj causaipi cancunapaj huahua huahuacunapaj causaipi yallitaj mirarishca cangapajmi chashna cana canguichij. Cai pacha, jahua pacha tiyashcacamaca cancunaca huahua huahua chashna cashca canguichijman.

²²Tucui cai mandashcacunata pajtachichun cunan ñuca quillcashcataca tucui pajtachijpi, shinallataj Mandaj Dios cancunapaj Taita Diosta c'uyashpa paipaj ñancunapi purishpa paita catijpica,

²³Mandaj Diospish, cai llajtacunamantaca tucuicunatami cancunapaj ñaupajmanta anchuchishpa shitanga. Chaipica cancunata yalli jatun llajtacunatapish mishashpami chai llajtacunataca cancunapaj cachun japinguichij.

²⁴Cancunapaj chaqui maillapi sarushcaca tucuimi cancunapaj canga. Shitashca pambamanta Líbano llajtacama, Éufrates jatun yacumantaca inti huashicun ladoman caj mama cuchacamami cancunapaj llajta canga.

²⁵Cancunahuanca pi mana shayari tucungacunachu. Ashtahuanpish Mandaj Dios cancunapaj Taita Diosmi pai nishca shinallataj cancuna saruna llajtapi causajcunapica cancunata manchana yuyaita churanga.

²⁶Riquichij, alli nishca canatapish, mana alli nishca canatapish cunanmari cancunapaj ñaupajpi churani.

²⁷Cunan ñuca quillcashpa cushca Mandaj Dios cancunapaj Taita Dios mandashcacunata cazushpaca allicunata chasquinguichijmi.

²⁸Manapish cancunapaj dios shujtajcunapaj dioscunata catishpa chaicunata catingapaj, Mandaj Dios cancunapaj Taita Dios mandashcacunata mana cazushpa, cunan ñuca yachachishca shina mana purishpaca llaquicunatami chasquinguichij.

²⁹Mandaj Dios cancunapaj Taita Dios cancunapaj cachun japigricun llajtaman chayachijpica, Gerizim urcupica allicunata chasquina cashcata ricuchijta churanguichij. Ebal urcupica llaquicunata chasquina cashcata ricuchijta churanguichij.

³⁰Chai urcucunaca Jordán ch'imbanij Arabapi causaj cananeocunapaj llajtapimi. Cananeocunapaj llajtata pasaj inti huashicun lado ñan huashanijpimi. Encina yuracuna tiyan More jatun pamba, Gilgal pueblo ch'imbapurapimi.

³¹Mandaj Dios cancunapaj Taita Dios cancunaman cushca llajtata cancunapaj cachun japingapaj Jordán yacuta ch'imbashpa ña japinallami canguichij. Chai llajtata japishpa chaipi causanguichijlla.

³²Chaipica, cunan cancunapaj ñaupajpi ricuchishpa mandashcacunataca chaitataj pajtachina yuyailla pajtachinguichij.