Read Chimborazo Highland Quichua DEUTERONOMIO 13 Bible Online

DEUTERONOMIO 13 - Chimborazo Highland Quichua bible

DEUTERONOMIO 13

¹Cancunapurapi maijanca Dios huillachijpi huillaj mana cashpaca muscuipi ricushcata huillajmi cani nishpa ricuringachari. Paica ricunacunami tiyagrin, milagrocunami tiyagrin nishpa huillangachari.

²Ricuchinacunapish, milagrocunapish paicuna huillashca shina pajtajpipish: Shujtajcunapaj dioscunapajman jacuchij nijpi, cancuna mana rijsishca dioscunapajman jacuchij paicunapajta rurashunchij nijpica,

³Diosmanta huillajmi cani nij huillashcatapish mana cashpaca muscuipi ricushcatami huillani nijtaca amataj uyanguichijchu. Cancunapaj tucui shunguhuan, tucui almahuan Mandaj Dios cancunapaj Taita Diosta c'uyaj cashcata mana c'uyaj cashcata yachangapajmi Mandaj Dios cancunapaj Taita Diosca chaicuna chashna rurachunca saquinga.

⁴Chaimanta cancunaca Mandaj Dios cancunapaj Taita Diosllata catinguichij, paillata manchanguichij. Pai mandashcacunallata huaquichinguichij, pai rimashcallata uyanguichij. Pai mandashcacunallata ruranguichij, paipajlla cana yuyailla canguichij.

⁵Dios huillachijpimi huillaj canchij nishpa mana cashpaca muscuipi ricushcata huillajcunami canchij nishpa llullashpa huillajca cancunapaj Mandaj Taita Diosta c'ariyanata yachachicushcamanta paicunaca huañuchishcatajmi cana can. Paicunaca cancuna Egiptopi huatashca shina ruracujmanta llujshichimuj, Mandaj Diospaj mandashca ñanmanta anchuchisha nishpa yachachishcamantami chashna huañuchishca cana can. Chashna rurashpallami cancunapuramantaca tucui millaitaca anchuchinguichij.

⁶Cancunataca quiquin huauquillataj, quiquin churillataj, ushushillataj, quiquin huarmillataj, mana cashpaca cancunahuan alli apanacujcunallataj cancunataca pacalla cashna ningachari: “Jacuchij shujtajcunapaj dioscunapajta rurashunchij” ningachari. Chai dioscunataca cancunapish, cancunapaj yayacunapish mana rijsircanguichijchu.

⁷Cancunapaj muyundij pueblocunapi tiyaj dioscunataca c'uchullapi cajpipish, carupi cajpipish tucui cai pacha tucuricama mana rijsircanguichijchu.

⁸Paicuna nishcataca ama uyanguichijchu, ama cazunguichijchu. Paicunataca ama llaquinguichijchu. Paicunataca ñataj mana huañuchisha nishpa pacacunguichijman.

⁹Ashtahuanpish chai runataca huañuchinguichijtaj. Chai runata huañuchingapajca, canrajmi rumihuan shitai callarina cangui. Chai q'uipami tucuicuna can shinallataj shitangacuna.

¹⁰Egiptopi huatashca shina ruracujta llujshichimuj cancunata Mandaj Dios cancunapaj Taita Diosmanta caruyachisha nishcamantaca, chai runataca huañungacama rumicunahuan shitanguichij.

¹¹Chashna rurajpimi tucui israelcuna yachaj chayashpaca, manchashpa cutinca ña mana chashna millaita rurangacuna.

¹²Mandaj Dios cancunapaj Taita Dios cancuna causachun cushca maijan pueblocunapica,

¹³cancunapuramanta millaita rurajcuna jatarishpa paicuna causan pueblocunapica: Cancuna mana rijsishca shujtaj dioscunapajta ruranaman jacuchij nicunmi nishca uyaringachari.

¹⁴Chashna uyarijpica chai yuyailla tucushpa chashnataj cashcata mana chashnataj cashcata alli tapushpa mashcangui. Cancunapurapi chashnataj millananata rurashca cajpica,

¹⁵ama llaquishpa chai pueblopi causajcunataca espadahuan huañuchinguichijtaj. Chai pueblopi tucui imalla tiyajcunatapish tucuita chingachinguichij, paicunapaj animalcunatapish espadahuan huañuchinguichij.

¹⁶Cancunaca chaipi tucui imalla japishcacunataca chaupi plazapi montonanguichij. Chai pueblotaca, chai japishcacunandij ninata japichishpa rupachinguichij. Tucui chaica Mandaj Dios cancunapaj Taita Diosman tucuita cushpa tucui rupachishca shinami canga. Chai puebloca rumicuna p'aquirishca montonllami huiñaipaj saquiringa. Cutinca ña mana pi shayachingachu.

¹⁷Tucui chingachinapaj cashcacunataca imata mana japinachu canguichij. Chashna cajpimi Mandaj Dios nina sindirij shina p'iñarishcaca pararinga. Cancunapaj ñaupa yayacunaman nishca shinallatajmi cancunata llaquishpa, c'uyashpa cancunataca achcata mirachinga.

¹⁸Mandaj Dios cancunapaj Taita Diospaj ñaupajpi ima pandata mana rurangapaj cunan ñuca cushca mandashcacunata huaquichishpa, Mandaj Dios cancunapaj Taita Dios rimashcata cazujpimi chashna mirachinga.