Read Chimborazo Highland Quichua DEUTERONOMIO 15 Bible Online

DEUTERONOMIO 15 - Chimborazo Highland Quichua bible

DEUTERONOMIO 15

¹Imata mañachishca cashpapish canchis huatacama mana tigrachi tucujpica saquinguichijlla.

²Chaitaca cashnami rurana canguichij: Maijanman imata mañachishca cashpaca chaicunataca chai huatapica ama mañashpa saquichunlla. Ima paipaj cajta maijanman mañachishcataca ama cutichichishpa saquinguichijlla. Ama mañangui nishpa Mandaj Dios mandashca huatapi cashcamantaca shujtaj cajpipish paipaj huauqui cajpipish ama mañachun.

³Shujtaj llajtamanta cajcuna cajpica tigrachichinguichijtaj. Cancunapurallataj cajpica ama tigrachichishpa saquinguichijlla.

⁴Chashna rurajpimi cancunapurapica, huajchacunaca mana tiyanga. Mandaj Dios cancunapaj Taita Diosmi cancunapaj cachun cugricun llajtapica cancunamanca jahuanpi jahuanpi allicunata cunga.

⁵Cunan ñuca cushca mandashcacunata, Mandaj Dios mandashcacunata huaquichingapaj tucui shunguhuan pai rimashcata uyashpa pajtachijpimi chashna canga.

⁶Chashna cajpi Mandaj Dios cancunapaj Taita Dios pai nishca shinallataj cancunaman allicunata cujpimi, cancunaca achca llajtacunaman mañachingapajpish charinguichij. Cancunaca shujtaj llajtacunataca mana imata mañanguichijchu. Ashtahuanpish cancunaca achca llajtacunatami mandanguichij. Paicunaca cancunataca mana mandangacunachu.

⁷Mandaj Dios cancunapaj Taita Dios cancunaman cushca llajtapi ña cashpaca cancunapurapi maijan pueblocunapi, imata mana charij huajchacuna tiyajpica, rumi shungu ama tucunguichijchu ama maqui lutsashca canguichijchu.

⁸Paicunapaj ima illashcamanta mañajpica maquita cacharishpa pai mañashcata cunguichijlla.

⁹Mañachishcata mana tigrachichina canchis huataca ñamari chayamun nishpa cambaj huajcha huauqui mañajpi p'iña ñahui tucushpa mana mañachisha nina millai yuyaita cancunapaj shungupi charinamanta huaquichirichij. Cancuna chashnajpica paicunaca cancunata juchachishpami Mandaj Diosman huillangacuna. Chai juchamantaca cancunami llaquita apana canguichij.

¹⁰Chaimanta cunatajmi canguichij. Cushpaca ama mitsa shunguhuan cunguichij. Chashna cajpica tucui cancuna imata ruranapipish imata rurashcapipish Mandaj Dios cancunapaj Taita Diosmi allicunata cunga.

¹¹Cai pachapica huajchacunaca manataj illangachu. Chaimantami ñucaca cashna nini: Cancunapaj llajtapi cajcunamanca cancunapaj huauquicunaman, huajchacunaman, ima illajllacunamanca cancunapaj maquita cacharishpa cunguichijlla nishpami mandani.

¹²Cancunapura hebreocunallataj c'ari cashpa, huarmi cashpa canman c'aturishpaca, sujta huatacunallatami cancunapajta rurangacuna. Canchis huata pajtajpica richun saquinguilla.

¹³Ña cacharishpa cachashpapish, ama chushaj maquillataca cachanguichijchu.

¹⁴Ashtahuanpish Mandaj Dios canman cushcacunataca cambaj ovejacunamantapish, trigomantapish, vinomantapish mana llaquishpallami cushpa cachana cangui.

¹⁵Cancunaca Egiptopi, shujtajpajta rurashpa causajcuna cashcatami yuyarina canguichij. Mandaj Dios cancunapaj Taita Diosmi cancunataca chaimanta llujshichirca. Chaimantami cunan cancunataca cashna mandani.

¹⁶Quiquinhuan alli cashcamanta, quiquintapish quiquinpaj huasi ucupuratapish c'uyashcamanta mana risha ninichu ningachari.

¹⁷Chaipica, cambajta rurajtaca cambaj huasi pungu caspipi quimichishpami, shuj puntajlla fierrohuan paipaj rinrinta jutcuna cangui. Chashna rurajpica huañungacamami paica cambajta rurajllataj saquiringa. Cambajta ruraj huarmitapish chashnallatajmi rurana cangui.

¹⁸Cambajta rurajca sujta huatatami shuj trabajaj runa japina cashcataca chaupillata japishpa cambajta rurashpa causarca. Chaimanta paita cacharishpa cachana tucujpica ama llaquiringuichijchu. Ashtahuanpish paita cacharishpa cachashcamantaca canta Mandaj Diosca can tucui ima ruranapimi allicunata cunga.

¹⁹Cambaj vacacuna, cambaj ovejacuna punta huachashca c'ari animalcunataca Mandaj Dios cambaj Taita Diospajlla ch'icanchingui. Punta huacharishca c'ari huagrahuanca, ama imata trabajanguichu. Punta huacharishca oveja millmatapish ama rutunguichu.

²⁰Ashtahuanpish chaicunataca Mandaj Dios cambaj Taita Diospaj ñaupajpi canpish, cambaj familiapish pai agllashca pueblopi cada huata micunguichij.

²¹Chai animalcuna ñahui mana ricuj cajpi, mana cashpaca cojo cajpi, mana cashpaca imapish mana alli cajpica ama Mandaj Dios cambaj Taita Diosman cushpa huañuchinguichu.

²²Ashtahuanpish cancuna causacun pueblollapitaj micunguichij. Chai aichataca Diospaj ñaupajpi allichirishca cashpapish, mana allichirishca cashpapish gacela nishca, ciervo nishca tarugacunapaj aichata micuj shina micunallami canguichij.

²³Ashtahuanca yahuartatajca ama micunguichijchu, yacuta shina pambapi tallinguichijlla.