Read Chimborazo Highland Quichua DEUTERONOMIO 17 Bible Online

DEUTERONOMIO 17 - Chimborazo Highland Quichua bible

DEUTERONOMIO 17

¹Mandaj Dios cancunapaj Taita Diosmanca huagrata cashpa, c'ari ovejata cashpapish, ima tucushca cajpi, ima mana alli cajpica ama cunguichijchu. Chaicunaca Mandaj Dios cancunapaj Taita Diospajca millananami.

²Mandaj Dios cancunapaj Taita Dios cancunaman cushca maijan pueblocunapi maijan c'ari cashpa, huarmi cashpa Mandaj Dioshuan ari ninacushcata p'aquishpa Mandaj Dios cancunapaj Taita Diospaj ñaupajpi millaita rurashpa,

³ñuca ama rurangui nishcacunata, rurashcalla shujtaj dioscunapajta ruranaman, chaicunapaj ñaupajpi cungurinaman, intita, lunata, jahua pachapi tiyaj tucui luzerocunata cungurinaman rishcata yachanguichari.

⁴Chaitaca maijan cancunaman huillashca cajpica, alli alli tapunguichij. Israelcunapurapi chashna millananata ruracushcaca chashnataj cajpica,

⁵chashna millananata ruraj c'arita cashpa, huarmita cashpapish cancunapaj pueblo punguman llujshichishpa, chai c'arita, chai huarmitaca huañungacama rumicunahuan shitanguichij.

⁶Chaicunataca ishqui cashpa, mana cashpa quimsa cashpa huillajcuna tiyajllapi huañuchinguichij. Shuj huillajlla tiyajpica ama huañuchinguichijchu.

⁷Chai millaita rurajta huañuchingapajca huillajcunarajmi rumicunahuan shitangacuna. Chai q'uipami tucuicuna rumicunahuan shitashpa huañuchingacuna Chashna rurashpami, cancunapuramantaca millaita rurajcunataca anchuchinguichij.

⁸Yallitaj cai shina llaquicuna mana allichipaj ricuringachari. Huañuchishcamanta, p'iñacuimanta, chugrichishcamanta mana cashpaca cancunapaj pueblopi imata rurangapaj ari ninacushcata mana pajtachinacushpa juchachinacushcamanta cambajman shamujpica, Mandaj Dios cambaj Taita Dios agllashca puebloman apashpa ringuichij.

⁹Chaiman rishpaca, chai punllacuna Diospajta ruracuj levita curacunata, chaipi caj juezcunata tapunguichij. Paicunami chai juchachishca cajta imata ruranataca yachachingacuna.

¹⁰Mandaj Dios agllashca pueblopi cajcuna ima shina rurachun mandashca shinataj ruranguichij. Paicuna yachachishcataca tucuita chai yuyailla pajtachinguichij.

¹¹Chai llaquicunataca paicuna ima shina allichichun yachachishca shinataj allichinguichij. Paicuna yachachishcataca alli ladomanpish, lluqui ladomanpish amataj llujshishpa chai shinataj ruranguichij.

¹²Mandaj Dios cancunapaj Taita Diospaj ñaupajpi imalla rurana cashcata ruracuj curata cashpa, juezta cashpa jatun tucushpa c'ariyaj runaca huañungatajmi. Chashna rurashpami, israelcunapuramantaca millaita anchuchinguichij.

¹³Chaita tucui israelcuna yachashpaca manchangacunami mana jatun tucungacunachu.

¹⁴Mandaj Dios cancunapaj Taita Dios cushca llajtaman chayashpa chai llajtata japishpa chaipi causacushpaca: Ñucanchij llajta muyundijpi caj caishuj llajtacunapi causajcuna shinallataj ñucanchijpish shuj jatun mandajta charishunchij ninguichijmi.

¹⁵Chaipica Mandaj Dios cancunapaj Taita Dios agllashca cancunapurallataj caj shuj jatun mandajtami churana canguichij. Shujtaj llajtamanta caj mana cancunapurallataj cajtaca mana churanachu canguichij.

¹⁶Ashtahuanpish chai jatun mandajca caballocunata ama achcata charichun. Caballocunata apanamanpish Egiptomanca pita ama tigrachishpa cachachun. Mandaj Diosmi cancunataca: “Cai ñantaca amataj tigranguichijchu” nishca carca.

¹⁷Taita Diosmanta paipaj shunguta ama anchuchingapajca chai jatun mandajca mana achca huarmicunata charinachu can. Shinallataj achca cullquitapish, curitapish mana yallitaj montonanachu can.

¹⁸Jatun mandaj pai mandanapi ña tiyarishpaca, levita curacuna huaquichishpa charicun mandashca libromanta shujtaj libropi chai shinallatataj copiashpa charichun.

¹⁹Chashna pai charishpami tucui paipaj causaipi punllanta rezanga. Mandaj Dios paipaj Taita Diosta manchanata yachangapajmi chashna rezanga. Chashna cashpami mandashcacunapi nishcacunata, chaitataj pajtachichun nishcacunata chai yuyailla tucushpa pajtachinga.

²⁰Chashna rurashpami paipaj huauqui israelcunataca mana yalli jatun cashcata yuyanga. Cai mandashcacunamantaca alli ladomanpish lluqui ladomanpish manataj anchuringachu. Paipish, paipaj huahuacunapish israelcunata mandanamantaca mana anchuchishca cangacunachu.