Read Chimborazo Highland Quichua DEUTERONOMIO 2 Bible Online

DEUTERONOMIO 2 - Chimborazo Highland Quichua bible

DEUTERONOMIO 2

¹Chai q'uipaca Mandaj Dios ñucata mandashca shinallatajmi, Puca Cuchaman rina ñanta shitashca pambaman tigrashpa rircanchij. Chaipica Seir urcutami achca huatacunata muyurcanchij.

²Chaipimi Mandaj Diosca ñucataca:

³Cai urcutaca ñami achcata muyushpa puringuichij. Cunanca janaj ladoman tigraichij.

⁴Israelcunataca cashna mandai: Seirpi causaj cancunapurallataj Esaupaj huahua huahuacunapaj llajtatami cancunaca pasana canguichij. Paicunaca cancunataca manchangacunami. Chashna cajpipish yuyaipimi cana canguichij.

⁵Paicunahuanca ama macanacunguichijchu. Paicuna causacun llajtataca cancunamanca chaqui saruillatapish mana cushachu. Seir urcucunataca ñucami Esaupaj huahua huahuacunapaj cachun paicunaman curcani.

⁶Paicunamanca micunatapish cullquihuan randishpami micuna canguichij. Yacutapish cullquihuan randishpami ubyana canguichij nircami.

⁷Mandaj Dios, cancunapaj Taita Diosca cancuna imata ruranapipish allimi nishcami. Shitashca jatun pambapi cancuna puricujtaca paica yachanmi. Cai tucui chuscu chunga huatatami Mandaj Dios cancunapaj Taita Diosca cancunahuan cashca. Paica cancunataca ima mana illajtami pushamushca.

⁸Chai q'uipaca Esaupaj huahua huahua ñucanchij huauquicuna causaj Seir llajtamantaca caruyashpami shamurcanchij. Chaimantaca Arabaman rij ñanta Elat, Ezión-geberman rij ñanta catishpa rishpami Moab shitashca pambaman chayarcanchij.

⁹Chaipimi Mandaj Diosca ñucataca: Moabpi causajcunataca ama p'iñachinguichijchu, paicunahuanca ama macanacushun ninguichijchu. Ñucaca paicunapaj llajtataca cancunamanca mana cushachu. Ashtahuanpish Ar llajtataca Lotpaj huahuacunamanmi, paicunapajtaj cachun curcani nircami.

¹⁰(Chai llajtapica ñaupa punllacunaca, emitacuna nishcacunami causajcuna carca. Paicunaca yallitaj achcami carca. Paicunaca Anacpaj huahuacuna shinallataj jatun runacunami carca.

¹¹Chashna cajpimi paicunataca Anacpaj huahuacunata shinallataj yallitaj jatun runacuna nishcacuna carca. Moabpi causajcunaca, paicunataca emitacuna nijcunami carca.

¹²Seirpica horeocunami ñaupamanca causajcuna carca. Mandaj Dios paicunapajtaj cachun cushca llajtata israelcuna ima shina rurashca shinallatajmi Esaupaj huahua huahuacunaca paicunataca paicunapaj ñaupajmanta llujshichishpa cachashpa chaipi causarcacuna).

¹³Cunanca jatarichij, Zered yacu huaicuta ch'imbaichij nijpimi, ñucanchijca chai yacu huaicuta ch'imbarcanchij.

¹⁴Cades-barneamanta llujshishpa, Zered yacu huaicuta ch'imbanacamaca ñucanchijca quimsa chunga pusaj huatacunatami purircanchij. Chaicamaca Mandaj Dios chashna rurashatajmi nishca shinallataj israelcunapaj macanacuj runacuna tucuicuna huañungacamami chashna purircanchij.

¹⁵Mandaj Diospaj maquica macanacuj runacunata paicunapaj carpa huasicunamanta tucui chingachingapajmi, paicunapaj jahuaman shamurca.

¹⁶Macanacunata alli yachaj israelcunapurapi cajcuna ña tucui huañujpimi,

¹⁷Mandaj Diosca ñucataca:

¹⁸Canca cunanllatajmi Moab llajtata ch'imbashpa, chai llajtapi caj Ar puebloman rina cangui.

¹⁹Ña cancuna amonitacunapajman chayashpaca, paicunataca ama p'iñachinguichij, paicunahuanca ama p'iñanacuita mashcanguichij. Chai amonitacunapaj llajtataca Lotpaj huahua huahuacunapaj cachun paicunaman cushca cashcamanta cancunamanca manataj cushachu.

²⁰(Chai llajtataca jatun runacunapaj llajta nijcunami carca. Ñaupamanca chai llajtapica jatun runacunami causaj carca. Paicunatami amonitacunaca zomzomeocuna nijcuna carca.

²¹Paicunaca yallitaj achcacunami carca. Anacpaj huahuacuna shinallataj jatun runacunami carca. Mandaj Diosca chaicunata amonitacunapaj ñaupajmanta tucuita chingachijpimi, amonitacunaca tucui paicunata chingachishpa, chai llajtapi causai callarircacuna.

²²Paicunapish Esaupaj huahua huahuacuna shinami rurarca. Mandaj Diosca Esaupaj huahua huahuacunataca horeocunata Seir urcumanta tucuita chingachishpami paicunata chaipi churarca. Cunancamami chaipi causacuncuna.

²³Uchilla llajtacunapi causaj aveocunatapish Gaza pueblocamami chashna chingachirca. Chaitaca Caftormanta shamuj caftoreo nishcacuna shamushpa chingachishpami chai llajtacunapica paicuna causarcacuna).

²⁴Chaipimi Mandaj Diosca: Jatari, Arnón yacu huaicuta ch'imbashpa ri. Ñucami Hesbonta jatun mandaj Sehón amorreotaca paipaj llajtandij cambaj maquipi ña churarcani. Paipaj llajtaman yaicushpa paihuan macanacushpa quichui callarichijlla.

²⁵Cunanmi tucui cai pachapi causajcunapica, canta manchana, chujchuna yuyaita callarichigrini. Can ima shina ruracujta uyashpaca, cantaca manchashpa chujchucungacunami nircami.

²⁶Chaimi ñucaca Cademot shitashca pambamanta, Hesbonta jatun mandaj Sehonpajmanca, sumajta rimachun huillajcunata cashna nishpa cacharcani:

²⁷Ñucami cambaj llajta jatun ñanta pasasha nini. Chai ñanmantaca allimanpish lluquimanpish mana llujshishpallami risha.

²⁸Ashtahuanpish micunatapish cullquipimari c'atungui chaitami micusha. Yacutapish cullquipimari c'atungui chaitami ubyasha. Jatun ñanllatami pasasha.

²⁹Seir urcupi causaj Esaupaj huahua huahuacuna, Arpi causaj moabitacuna ñucahuan ima shinami rurarca chai shinallataj rurapai. Mandaj Dios, ñucanchij Taita Dios cusha nishca llajtaman Jordán yacuta ch'imbashpa chayagringapajmi chashna roganchij nichunmi cacharcani.

³⁰Ashtahuanpish Hesbón llajtata jatun mandaj Sehonca, paipaj llajtata pasachunca mana saquisha nircachu. Mandaj Dios, cancunapaj Taita Diosmi chai llajtata cancunapaj maquipi entregangapaj chai llajtata jatun mandajpaj yuyaitapish, shungutapish sinchiyachirca. Chaimi cunancama chai llajtaca cancunapaj.

³¹Chaipimi Mandaj Diosca ñucataca: Ñucami cunanllataj jatun mandaj Sehontaca paipaj llajtandij cancunapaj maquipi churai callarini. Chaimanta paipaj llajtaca cancunapaj cachun japi callarichijlla nircami.

³²Sehonca tucui paipaj cajcunandijmi, ñucanchijhuan macanacungapaj Jahaza puebloman shamurca.

³³Ashtahuanpish Mandaj Dios ñucanchij Taita Diosmi chai jatun mandajtapish, paipaj churicunatapish, tucui paipaj cajcunatapish ñucanchij maquipi churajpi misharcanchij.

³⁴Tucui chai pueblocunata japishpami c'aricunatapish, huarmicunatapish, huahuacunatapish shujllatapish mana saquishpa tucuita tucuchina tucurcanchij.

³⁵Paicunapaj huagracunata, chai pueblocunapi imallata ñucanchij japishcacunallatami ñucanchijpaj cachun japircanchij.

³⁶Arnón yacu huaicu c'uchupi caj Aroer pueblopi, pugru pambapi tiyaj pueblopi causajcunamanta callarishpa, Galaadpi causajcunacamaca ñucanchij maquimantaca shuj pueblollapish mana saquirircacunachu. Mandaj Dios, ñucanchij Taita Diosmi tucui chai pueblocunataca ñucanchijpaj cachun ñucanchij maquipi churarca.

³⁷Amonitacunapaj llajtaman, Jaboc yacu huaicu uricunapi caj tucui llajtacunaman, urcupi tiyaj pueblocunallamanmi mana chayagrircanchij. Mandaj Dios ñucanchij Taita Dios ama chayanguichijchu nishca maijan llajtacunamanpishmi mana chayagrircanchij.