Read Chimborazo Highland Quichua DEUTERONOMIO 21 Bible Online

DEUTERONOMIO 21 - Chimborazo Highland Quichua bible

DEUTERONOMIO 21

¹Mandaj Dios cancunapaj Taita Dios cancunapaj cachun cushca llajtapica, maijan shuj huañushca pambapi siricujta japishpa, pi huañuchishcata mana yachashpaca,

²cunaj yuyajcunahuan, juezcunahuan chai huañushca siricun muyundij pueblocunaman maijan puebloman ashtahuan c'uchulla cajta medishpa ricugrichuncuna.

³Chaita ricushpaca, ashtahuan c'uchullapi caj pueblopi causajcunata cunaj yuyajcunami manaraj yapuj, manaraj trabajaj shuj huarmi huagrata japishpa,

⁴chai pueblomanta caj cunaj yuyajcuna, nunca mana yapushca, mana tarpushca, achca yacu llujshicuj pambaman apamushpa chaipi cungata p'aquingacuna.

⁵Tucui imalla rurana cashcata rurachun, paipaj shutipi tucuicunata alli cashca cachun nichun, ima p'iñanacui tiyajpipish, ima llaquichinacui tiyajpipish allichichunca Levipaj huahua huahua curacunatami churarca. Chaimanta chaicunata ruranamanca Levipaj huahua huahua curacuna c'uchuyachun.

⁶Chaipica huañushcamanta ashtahuan c'uchulla pueblocunapi caj cunaj yuyajcunami pugru pambapi cungata p'aquishpa huañuchishca huarmi huagrapaj jahuapi paicunapaj maquicunata maillangacuna.

⁷Chaipica: Cai runapaj yahuartaca mana ñucanchij maquicuna jichashcachu. Pi huañuchijtapish mana ricushcanchijchu.

⁸Mandaj Dioslla, can llujshichimushca cambaj israelcunataca perdonapailla. Manapish huañuipaj yahuarta jichashcataca cambaj israelcunataca ama juchachihuaichu nichun. Chaimi chai yahuarmantaca perdonashca canga.

⁹Manapish huañuipaj yahuarmanta cancuna juchachishca canataca, tucui chaicunata Mandaj Dios mandashca shinataj chai tucuita rurashpami cancunapaj chaupimantaca anchuchinguichij.

¹⁰Cancunata p'iñajcunahuan macanacungapaj llujshijpi, Mandaj Dios cancunapaj Taita Dios paicunata cancunapaj maquipi churajpi cancuna paicunata prezu apacushpaca,

¹¹chai prezu apacuncunapurapi shuj sumaj huarmita ricushpa munashpaca paitaca cambaj huarmi cachun japishpa,

¹²cambaj huasi ucupi churangui. Chaipi paica ajchata ruturishpa, sillucunatapish p'itishpa,

¹³prezu japicuipi churashca cashca churanataca llujshichishpa cambaj huasipi saquirishpa, paipaj yayamanta paipaj mamamanta shuj quilla jundata huacachun. Chai q'uipaca chai huarmipi chayari tucunguimi. Canca paipaj cusami cangui, paica cambaj huarmimi canga.

¹⁴Chai huarmi can munashca shina mana tucujpica richun saquinguilla. Canllataj paita pingachishcamantaca ama cullquipi c'atunguichu, cambajta rurajtapish ama ruranguichu.

¹⁵Maijanca ishqui huarmita charijpi shujca c'uyashca cangachari, caishujca mana c'uyashca cangachari. Ishquindijpitaj huahuacunata charijpica, punta churica mana c'uyashca huarmipi cangachari.

¹⁶Pai imalla charishcacunata paipaj churicunaman chaupina punlla pajtajpica, punta churi japina cashcataca c'uyashca huarmipi charishca punta churimanca mana cui tucunchu. Mana c'uyashca huarmipi charishca huahua punta churi cashcamantami mana cui tucun.

¹⁷Ashtahuanpish mana c'uyashca huarmipaj huahuamanmi punta churi cashpa japinataca cuna. Paimanca caishujcuna japina cashcamanta ishqui cutinhuanmi cuna. Paica yayapaj punta fuerzamanta huahua cashcamanta paimi yayapaj punta churi. Chaimanta punta churi cashpa japinaca paipajmi.

¹⁸Maijanca shuj churita charingachari. Yallitaj mana cazuj, yayapish, mamapish rimashcata mana uyaj, llaquichijpipish manataj cazuj cangachari.

¹⁹Chashna cajpica yaya mamaca paicuna causacun pueblo pungupi caj cunaj yuyajcunapajman llujshichishpa apachun.

²⁰Chai pueblopi caj cunaj yuyajcunamanca: Cai ñucanchij churica mana cazuj, c'ariyaj, ñucanchij imata nishcatapish mana uyasha nij, maipish cachun micuicunapi, machaicunapi puricujllami nishpa huillachuncuna.

²¹Chaipica chai pueblopi causaj tucui c'aricuna rumicunahuan shitashpa huañuchinguichij. Chashnami cancunapuramanta millaitaca tucui anchuchinguichij. Tucui israelcunami chaita uyashpaca manchangacuna.

²²Maijan cashpapish huañuipaj ima juchata rurajpi shuj caspipi huarcushpa huañuchishca cashpaca,

²³chai huañuchishca cuerpotaca caspipi huarcushca pacarichunca ama saquinguichijchu. Huarcushca huañuj runaca Taita Dios mana alli nishca cashcamanta chai punllallatajmi pambana canguichij. Chashna rurashpami Mandaj Dios cancunapaj Taita Dios cancunapaj cachun cushca llajtataca mana mapayachinguichij.