Read Chimborazo Highland Quichua DEUTERONOMIO 23 Bible Online

DEUTERONOMIO 23 - Chimborazo Highland Quichua bible

DEUTERONOMIO 23

¹Lulun llapirishca cashpa, mana cashpaca paipaj charishca aichata p'itishca cashpaca Mandaj Diospaj tandanacuimanca ama yaicuchun.

²Mandaj Diospaj tandanacuimanca huainapaj huahuacunaca mana yaicungacunachu. Chunga huahua huahuacunacamapish, Mandaj Diospaj tandanacuimanca mana yaicungacunachu.

³Mandaj Diospaj tandanacuimanca amonitacunapish, moabitacunapish mana yaicungacunachu. Chunga huahua huahuacunacamapish Mandaj Diospaj tandanacuimanca nunca manataj yaicungacunachu.

⁴Egiptomanta llujshishpa cancuna paicunapaj ñanta pasacujpica yacutapish, micunatapish mana curcacunachu. Ashtahuanpish Mesopotamia llajtapi caj Petor pueblopi causaj Beor runapaj churi Balaamman cullquita cushpami, cancunataca ima llaqui tucushpa alli canman nichun cacharcacuna.

⁵Chashna cajpipish Mandaj Dios cancunapaj Taita Diosca Balaam imata nishcata mana uyashpami llaqui tucushca canman nishca canataca Mandaj Dios cancunapaj Taita Diosca alli cashca cachun nishca canaman tigrachirca. Mandaj Dios cancunapaj Taita Diosca cancunata c'uyashcamantami chashna rurarca.

⁶Paicunahuan sumaj causaita charinatapish, paicunapaj ima allita ruranatapish ama mashcanguichijchu. Cancunapaj tucui causaipimi chashna cana canguichij.

⁷Edomitacunataca cancunapurallataj cashcamanta ama p'iñanguichijchu. Cancunaca Egiptopica shujtaj llajtamanta purij runa shinallami causarcanguichij. Chaimanta egipciocunataca ama p'iñanguichijchu.

⁸Paicunapuramanta huacharishcacunaca quimsa huahua huahuacuna cashpami Mandaj Diospaj tandanacuimanca yaicungacuna.

⁹Cancunata p'iñajcunahuan macanacungapaj carpa huasicunata shayachishpa tiyarigrishpaca, tucui mana allimanta huaquichiringuichij.

¹⁰Cancunapurapica maijanca yuraj yacu tuta cacharirishpa mapayashcamanta mapacuna tiyanguichijchari. Chaicunaca carpa huasicunamanta canllaman llujshishpa ama cutin yaicugrichun.

¹¹Shina cajpipish chai runaca chishiyamujpi yacuhuan maillarishpa inti ña huashicugrijpica carpa huasicunaman cutin yaicui tucunmi.

¹²Cancuna mapanacunatapish, carpa huasicunamanta caruman charinguichij.

¹³Cancuna apana macanacunacunapica shuj ishtacatapish apanguichij. Cancuna mapaj tiyarigrishpaca chai ishtacahuan pambata jutcushpa chaipi mapashpa, allpahuan tapachinguichij.

¹⁴Mandaj Dios cancunapaj Taita Diosca cancunata quishpichingapaj, cancunata p'iñajcunata cancunapaj ñaupajpi churangapajmi carpa huasicuna chaupipi puricun. Chaimantami cancunapaj carpa huasicuna tiyanca ima mapa illaj cana can. Cancunapaj chaupipi ima mapata mana ricushpaca paica cancunapaj chaupimantaca mana anchungachu.

¹⁵Amopajta ruraj cancunapajman miticushpa rijpica, ama paipaj amoman tigrachinguichijchu.

¹⁶Cancunapaj llajtapi caj pueblocunamanta maijan pueblopi causanata pai agllajpica, chaipi cancunahuan causachun saquinguichijlla. Paitaca ama p'iñanguichijchu.

¹⁷Israelcunapurapica huainayashcahuan causaj huarmica ama tiyachun. C'aricunapish c'aripurallataj siririjcunaca ama tiyachun.

¹⁸Mandaj Dios cancunapaj Taita Diosman imata cushatajmi nishcataca cullqui jahua huainayaj huarmi cushca cullquitapish, allcu shina runa cushca cullquitapish ama apamunguichijchu. Chaicunaca caishujpish chaishujpish Mandaj Dios millanachinami.

¹⁹Cancunapurallatatajca cullquita mañachishpapish ama huahua cullquita cobranguichijchu. Granota mañachishpapish ima shujtajta mañachishpapish ama yallihuan cobranguichijchu.

²⁰Mana cancunapura cajcunataca huahua cullquita cobrai tucunguichijmi. Ashtahuanpish cancunapurallataj caj israelcunataca ama chashna ruranguichijchu. Chashna rurajpimi Mandaj Dios cancunapaj Taita Dios cancunapaj cachun cushca llajtapica cancunapaj maquihuan imata rurashcapipish allicunata cunga.

²¹Mandaj Dios cancunapaj Taita Diosman imata cuna tucushpaca ama uniyashpa utca pajtachinguichij. Cancuna mana pajtachijpica, Mandaj Dios cancunapaj Taita Diosca llaquichingami. Paipaj ñaupajpica juchayujmi tucunguichij.

²²Can imata mana cuna tucushca cashpaca, mana juchayuj tucunguichu.

²³Ashtahuanpish cambaj quiquin munaimanta Mandaj Dios cancunapaj Taita Diosman imata cushatajmi nishcataca cancunapaj shimihuan nishca shinallataj chai yuyailla tucushpa pajtachinguichij.

²⁴Maijanpaj uva chagraman yaicushpaca, huijsa pajtata micui tucunguichijmi. Ashtahuanpish cancunapaj canastapica ama imata apanguichijchu.

²⁵Maijanpaj cozichanalla trigo chagraman yaicushpaca trigo caspacunataca maquillahuan p'itinguichij. Ama hoceshuan c'uchunguichijchu.