Read Chimborazo Highland Quichua DEUTERONOMIO 3 Bible Online

DEUTERONOMIO 3 - Chimborazo Highland Quichua bible

DEUTERONOMIO 3

¹Chaimanta tigramushpaca ñucanchijca Basanman rina ñantami huichiyamurcanchij. Chaipimi Basan llajtata jatun mandaj Ogca tucui paipaj cajcunahuan Edrei pueblopi ñucanchijhuan macanacungapaj tupanaman llujshimurca.

²Ashtahuanpish Mandaj Diosca ñucataca: Paitaca ama manchaichu, ñucami jatun mandajtaca paipaj tucui gentecunandij, paipaj llajtandij cambaj maquipi ña churarcani. Paicunataca Hesbonpi causaj amorreocunata jatun mandaj Sehonta ima shina rurashca shinallataj ruraichij nircami.

³Mandaj Dios ñucanchij Taita Dios, Basan llajtata jatun mandaj Ogta paipaj cajcunandijta ñucanchij maquipi churajpimi, ñucanchijca paicunataca shujllatapish mana saquishpa tucuita chingachircanchij.

⁴Tucui chai pueblocunatami japircanchij. Shuj pueblollatapish mana saquishpami tucuita japircanchij. Basán llajtata jatun mandaj Og mandacun tucui Argob llajtapi tiyaj sujta chunga pueblocunatami japircanchij.

⁵Tucui chai pueblocunaca jatun pircacunahuan muyujta rurashca, pungucunapish barracunata quinriman churashcami carca. Muyundijta pircacuna illajlla shujtaj achca pueblocunatapish mana yupashcami chashna carca.

⁶Hesbonta jatun mandaj Sehonta ima shinami tucuchircanchij, chai shinallatajmi paicunatapish cada pueblopi c'aricunata huarmicunata, huahuacunata tucuchircanchij.

⁷Chaipica paicunapaj tucui huagracunahuan, chai pueblocunapi imallata ñucanchij japishcahuanmi saquirircanchij.

⁸Chai huatacunaca Jordán yacu ura ladopi caj ishqui jatun mandaj amorreo mandacun llajtacunatapish Arnón yacu huaicumantaca, Hermón urcucamami japircanchij.

⁹(Chai Hermón urcutaca, sidoniocunaca Sirión nincunami, amorreocunaca Senir nincunami).

¹⁰Pambacunapi tiyaj tucui pueblocunata, tucui Galaad llajtata, tucui Basán llajtatami japircanchij. Shinallataj jatun mandaj Og chai Basán llajtapi mandacushca Salca, Edrei pueblocunacamami japircanchij.

¹¹Yallitaj jatun runacunapuramantaca Basán llajtata jatun mandaj Og runallami saquirirca. Paipaj camaca fierromanta rurashcami carca. ¿Manachu Amón llajtapi caj Rabá pueblopi chaica tiyacun? Chai camaca sunimanca chuscu metro pichca centímetro, anchomanca shuj metro pusaj chunga centimetromi. Shuj runapaj codo medidapi medishcami carca.

¹²Chai huatacunapi ñucanchij japishca llajtacunataca Arnón yacu c'uchupi caj Aroer pueblomantaca Galaadpi caj chaupi urcucunacamami chaipi tiyaj pueblocunandij Rubenpaj, Gadpaj aillucunaman curcani.

¹³Janaj ladoman caj chaupi Galaad llajtata, jatun mandaj Og mandacushca tucui Basan llajtata, yallitaj jatun runacuna causan nishca Argob tucui llajtatami Manasespaj chaupi ailluman curcani.

¹⁴Manasespaj huahua huahuacunapuramanta Jair runaca, tucui Argob llajtatami Gesur, Maaca shuti llajta lindecunacama japirca. Chai llajtataca Basán-havot-jair shutitami shutichirca. Chai llajtaca cunancama chai shutillatajmi.

¹⁵Galaab llajtataca Maquirmanmi curcani.

¹⁶Rubenpaj, Gadpaj aillucunamanca Galaad llajtahuan Arnón yacu huaicuhuan caj llajtacunatami curca. Chaupi pugru pambacunandij Jaboc yacu huaicucamami curcani. Paicunapaj c'uchulla llajtaca amonitacunapaj llajtami carca.

¹⁷Inti llujshinman caj Arabá llajtatapish inti llujshinman caj Pisga llajtatapishmi curcani. Chai llajtapaj lindeca Jordán yacuhuan Cineret llajtaman rin ladota rishpa cachisapa cuchacamami.

¹⁸Chaipimi cancunataca cashna nircani: Mandaj Dios, cancunapaj Taita Diosmi chai llajtataca cancunapaj cachun curca. Chaimanta c'ari c'ari runacunaca macanacunalla, cancunapaj huauqui israelcunata ñaupashpa ringuichij.

¹⁹Cancuna achca animalcunata charishcataca ñucallataj yachanimi. Chaimanta cancunapaj huarmicuna, cancunapaj huahuacuna, cancunapaj animalcunalla ñuca cancunaman cushca pueblocunapica saquirichun.

²⁰Mandaj Dios cancunaman shinallataj cancunapaj huauquicunaman samarinata cungacama chaipi saquiringuichij. Mandaj Dios cancunapaj Taita Dios Jordán yacu ch'imbanijman paicunapaj cachun cusha nishca llajtata paicuna japingacama chaipi saquiringuichij. Chai q'uipaca cancunapaj cachun ñuca cushca llajtaman cada quiquin tigranguichij nircanimi.

²¹Chai punllacunami Josuetapish cashna nishpa mandarcani: Mandaj Dios cambaj Taita Dios chai ishqui jatun mandajcunata ima shina rurashcataca cambaj quiquin ñahuicunahuantajmi ricurcangui. Can maillata rina mandana llajtacunatapish Mandaj Diosca chashnallatajmi ruranga.

²²Paicunataca ama manchaichu, Mandaj Dios cambaj Taita Diosmi canmantaca macanacunga nircanimi.

²³Chai punllacunallatajmi Mandaj Diostaca cashna nishpa mañarcani:

²⁴Mandaj Jatun Dios quiquinpajta ruraj ñucamanmi quiquinpaj tucuita ruraj cashcata, quiquinpaj maquica tucuita rurai tucuj cashcata ricuchi callarircangui. Quiquin rurashcacuna shinata ruraj, mancharinacunata ruraj shujtaj diosca jahua pachapipish, cai pachapipish mana tiyanchu.

²⁵Cunanca ñucataca Jordán caishuj ladoman caj ashtahuan alli llajtatapish, chaipi caj alli urcutapish, Líbano llajtatapish ricungapaj ch'imbachihuai nishpami mañarcani.

²⁶Chashna mañajpipish Mandaj Diosca cancunapaj juchamanta ñucahuan p'iñarishcamantami, ñuca mañashcataca mana uyasha nishpa ashtahuanpish ñucataca cashna nirca: Can chai llajtaman ch'imbanamantaca ama ashtahuan rimaichu.

²⁷Canca Jordanta mana ch'imbana cashcamantaca Pisga urcuman huichiyashpa janaj ladotapish, ura ladotapish, inti llujshin ladotapish, inti huashicun ladotapish tucuita muyushpa cambaj quiquin ñahuihuan ricui.

²⁸Josueta yachachishpa animachishpa sinchiyachi. Paimi cai gentecunata pushashpa Jordanta ch'imbanga. Paimi cunan can ricugrin llajtataca paicunaman cunga nircami.

²⁹Ñucanchijca, Bet-peor ch'imbapura pugru pambapimi saquirircanchij.