Read Chimborazo Highland Quichua DEUTERONOMIO 30 Bible Online

DEUTERONOMIO 30 - Chimborazo Highland Quichua bible

DEUTERONOMIO 30

¹Cunanca Mandaj Diosta cazushpaca allicunata chasquinata, mana cazushpaca llaquicunata chasquinatami ña yachanguichij. Chaimanta Mandaj Dios llaquichishpa shujtaj llajtaman cachajpi chaipi cashpami,

²cancunaca huananchijtajmi nishpa Mandaj Dios cancunapaj Taita Diospajman cutiringuichij. Chaipimi cancunapish cancunapaj huahua huahuacunapish cunan ñuca cushca mandashca shimicunataca tucui shunguhuan tucui almahuan cazujcuna tucunguichij. Chashna nishpaca cancuna cashpa cancunapaj huahua huahuacuna cashpapish huananchijtajmi nishpa Mandaj Dios cancunapaj Taita Diosman cutirishpa pai rimashcacunata cancunaman cunan ñuca cushpa mandashcacunata tucui shunguhuan, tucui almahuan pajtachina tucunguichij.

³Chashna cajpimi Mandaj Dios cancunapaj Taita Diosca cancunata llaquishpa, prezu cachashcamanta tigrachimuna tucushpa tucui pueblocunata urata janajta pai maillaman cachashcacunataca tandachishpa cutinllataj pai cushca llajtaman tigrachimunga.

⁴Cancunapaj cai llajtamanta tucui cai pachata caru llajtaman cancunata llujshichishpa cachashca cashpapish Mandaj Dios cancunapaj Taita Diosca chaimanta japishpa, cancunata tandachishpami cutinllataj pushamunga.

⁵Mandaj Dios cancunapaj Taita Dios cancunapaj ñaupa yayacuna japishca llajtaman cancunata cutin tigrachimujpimi, chai llajtaca cancunapaj canga. Yallitaj allicunatami cunga. Cancunapaj ñaupa yayacunamanta yallitami mirachinga.

⁶Mandaj Dios cancunapaj Taita Diosmi, cancunatapish cancunapaj huahua huahuacunatapish shungupi circuncisionta ruranga. Mandaj Dios cancunapaj Taita Diosta tucui shunguhuan, tucui almahuan paillata c'uyashpa causachunmi chashna ruranga.

⁷Chaipica Mandaj Dios cancunapaj Taita Diosmi, cancunata llaquichicushca tucui cai llaquicunataca cancunata p'iñajcunapaj jahuaman, cancunata p'iñashpa catirashpa llaquichijcunapaj jahuaman cachanga.

⁸Cancunaca Mandaj Dios rimashcata uyashpa, paiman tigrarishpaca ñuca cunan cancunaman cushca mandashcacunata pajtachina yuyaillami pajtachicunguichij.

⁹Chashna cajpimi Mandaj Dios cancunapaj Taita Diosca, cancunapaj maquihuan tucui imata ruraicunapipish, cancunapaj huahuacunapipish, cancunapaj animalcunapipish, cancunapaj chagracunapipish yallitaj mirachinga. Mandaj Diosca cancunapaj ñaupa yayacunahuan cushicushca shinallatajmi, cancunapaj allita rurashpapish cushicunga.

¹⁰Tucui chaipajca Mandaj Dios rimashcata cazushpa millaita mana rurashachu huananimi nishpa tucui shunguhuan, tucui almahuan Mandaj Diosta cazuna tucushpa, cai libropi quillcashca tiyaj chaitataj pajtachichun nishcacunata, mandashcacunata pajtachijpimi chashna cushicunga.

¹¹Cunan ñuca cancunata mandashca cai mandashcacunaca jahualla pajtachinallamari, pipish pajtachi tucunllami. Cancunamanta mana carupichu.

¹²¿Pitaj ñucanchijpaj randi jahua pachaman huichiyashpa chai mandashcacunata apamushpa ñucanchijman uyachijpi, chaicunataca pajtachishunri? nichunpish chai mandashcacunaca mana jahua pachapichu.

¹³¿Pitaj ñucanchijpaj randi mama cuchata ch'imbashpa chai mandashcacunata apamushpa ñucanchijman uyachijpi, chaicunataca pajtachishunri? nichunpish chai mandashcacunaca mana mama cucha ch'imba ladomanchu.

¹⁴Cai shimicunata cancuna pajtachi tucuchunca cancunapaj c'uchupi, cancunapaj shimipi, cancunapaj shungupimari.

¹⁵Riqui, cunanca caicunataca cancuna agllachunmi cancunapaj ñaupajpi churani, allita chasquinatapish, llaquita chasquinatapish, causaita charinatapish, huañuita japinatapishmi ricuchini.

¹⁶Mandaj Dios cancunapaj Taita Dios cancunapaj cachun pai cushca llajtapi yaicushpa unita causachun, allicunata cuchun, achcata mirachichunca Mandaj Dios cancunapaj Taita Diosta c'uyachun, paipaj ñancunapi purichun, pai mandashcacunata, chaitataj pajtachichun nishcacunata, pajtachinguitaj nishcacunata huaquichichunmi cunan ñucaca mandani.

¹⁷Ashtahuanpish cancunapaj shungu Diosmanta anchurijpi mana cazushpa, shujtaj dioscunata cungurishpa chai dioscunapajta rurashpa paicunapajman apashca tucushpaca,

¹⁸cancunaca chingarinataj cashcatami cunan ñucaca huillani. Jordán yacuta ch'imbashpa cancunapaj cachun chai llajtata japishpaca chai llajtapica mana unita causana cashcatami huillani.

¹⁹Cancunapish cancunapaj huahua huahuacunapish causaita charinata, huañuita japinata, allita chasquinata, llaquita chasquinataca ñami ricuchini. Chaicunataca jahua pacha cai pacha ricucunpimi ricuchini. Chai causaita agllashpaca cancunapish, cancunapaj huahua huahuacunapish,

²⁰Mandaj Dios cancunapaj Taita Diosta c'uyashpa, paita cazushpa paita catishpa causachunmi mandani. Paimantami cancunaca Mandaj Dios cancunapaj Taita Dios cancunapaj ñaupa yaya Abrahamman, Isaacman, Jacobman cushatajmi nishca llajtapica unita causanguichij' nircami.