Read Chimborazo Highland Quichua DEUTERONOMIO 31 Bible Online

DEUTERONOMIO 31 - Chimborazo Highland Quichua bible

DEUTERONOMIO 31

¹Israelcunapajman Moisés rishpaca,

²cashnami nirca: “Ñucaca ñami 120 huatacunata charini. Ñucaca pushashpa llujshinata, pushashpa tigrachinata mana valinichu. Ashtahuancarin Mandaj Diosmi ñucataca: “Cai Jordán yacutaca ña mana ch'imbanguichu” nirca.

³Mandaj Dios cancunapaj Taita Diosmi cancunata ñaupashpa ringa. Mandaj Diosmi chai llajtacunataca cancunapaj ñaupajpi chingachinga. Chaipimi cancunapaj cachun japinguichij. Mandaj Dios nishca shinallataj Josuemi cancunata ñaupashpa ringa.

⁴Mandaj Diosca chai llajtapi causajcunataca, amorreocunata jatun mandaj Sehonta, jatun mandaj Ogta, paicuna mandacushca llajtacunandij chingachishca shinallatajmi chingachinga.

⁵Mandaj Diosmi chai runacunataca, cancunapaj maquipi churanga. Paicunataca ñuca ima shina mandashca shinallatajmi rurana canguichij.

⁶Fuerzarichij, c'ari c'ari caichij, ama manchaichijchu. Paicunataca ama imata manchanguichijchu. Mandaj Dios cancunapaj Taita Diosmi cancunahuanca ringa. Paica cancunataca manataj saquingachu, manataj shitangachu” nircami.

⁷Chai q'uipaca Moisesca Josueta cayashpami, tucui israelcunapaj ñaupajpi cashna nirca: “Fuerzari, c'ari c'ari cai. Canmi cai gentecunataca Mandaj Dios paicunapaj ñaupa yayacunaman cushatajmi nishca llajtaman pushangui. Chai llajtataca canmi paicunapaj cachun cungui.

⁸Mandaj Diosmi cantaca ñaupanga. Paica canhuanmi canga. Cantaca mana saquingachu, canmantaca mana anchuringachu. Ama manchanguichu, ña mana valishachu ama ninguichu” nircami.

⁹Moisesca tucui cai mandashcata quillcashpami, Mandaj Dioshuan ari ninacushca quillcata huaquichina arcata apaj levita curacunamanpish, tucui israelcunata cunaj yuyajcunamanpish curca.

¹⁰Moisesca cashna nishpami mandarca: “Cada canchis huatapi ramacunahuan rurashca chugllacunata rurashca fiesta punllacunapi divicunata perdonana huata chayamujpi,

¹¹tucui israelcuna Mandaj Dios cancunapaj Taita Dios agllashca puebloman paipaj ñaupajman rijpi tucui israelcunapaj ñaupajpi tucui paicuna uyajta cai mandashcata rezangui.

¹²Cai mandashcata uyashpa Mandaj Dios cancunapaj Taita Diosta manchanata yachachun, cai mandashcapi tucui imalla nishcacunata chai yuyailla tucushpa pajtachijcuna cachunca, tucui c'aricunata, huarmicunata, huahuacunata, cancunapaj pueblocunapi causaj shujtaj llajtamanta cajcunata tandachinguichij.

¹³Paicunapaj huahuacunaca cai mandashcata manaraj uyashca cashpapish chaipi uyashpami yachangacuna. Chashna cashpami paicunaca cai Jordán yacuta ch'imbashpa japigricun llajtapica tucui causai punllacunapi Mandaj Dios cancunapaj Taita Diosta manchanata yachangacuna” nircami.

¹⁴Chai q'uipami Mandaj Diosca Moisestaca: “Riqui, ñami can huañuna punllaca quichquiyamun. Ñucahuan tupanacuna carpa huasiman Josueta cayashpa chaipi shuyaichij. Chaipimi imalla rurana cashcataca mandasha” nircami. Moisespish, Josuepish Dioshuan tupana carpa huasiman rishpami chaipi shuyarcacuna.

¹⁵Mandaj Diosca suni p'uyupi ricurishpami, chai carpa huasiman yaicuna pungu jahuapi shayarirca.

¹⁶Chaipimi Mandaj Diosca Moisestaca: “Riqui, canca ñami cambaj yayacunahuan samarigringui. Cai israelcunaca paicuna causagricun llajtaman rishpa chai llajtapi tiyaj shujtaj dioscunata catishpami chai dioscunahuan huainayangacuna. Chaipica ñucata mana valichishpami ñucamanta anchurishpa, ñuca paicunahuan ari ninacushcatapish p'aquingacuna.

¹⁷Chai punllacunapica nina sindirij shina paicunahuan ñuca yallitaj p'iñarishpami, paicunata shitashpa manataj tigrashpa ricusha. Paicunapaj jahuaman achca llaquicuna, mana allicuna shamushpami paicunataca tucuchinga. Chai punllapimi paicunaca: 'Ñucanchij Dios ña mana ñucanchijhuan cajpimari, cai tucui llaquicunaca ñucanchij jahuaman shamushca' ningacuna.

¹⁸Ashtahuanpish ñucaca paicuna chashna yuyaricujpipish manataj tigrashpa ricushachu. Paicuna shujtaj dioscunapajman rishpa tucui mana allita rurashcamantami chashna rurasha.

¹⁹Cunanca cai cantota quillcashpa tucui israelcunaman yachachichij. Cai cantota israelcuna cantashpaca paicunallatataj llaquichina cashcata yuyachij cachun paicunapaj shimipi churaichij.

²⁰Lechepish, sacha, chuspipaj mishquipish yacu llujshicuj shina tiyan llajtata paicunapaj ñaupa yayacunaman cushatajmi nishca llajtaman ñuca chayachijpica, huijsa pajtata micushpami yallitaj huirayangacuna. Shujtaj dioscunaman tigrarishpa, chai dioscunapaj ruranacunata rurashpa, ñucahuan ari ninacushcata p'aquishpami ñucataca yallitaj p'iñachingacuna.

²¹Paicunapajman jatun llaquicuna, llaquichijcuna shamujpica paicuna cantajpimi chai cantoca paicuna ima shina cashcamanta chashna cashcata ricuchinga. Paicunapaj huahua huahuacuna cantajpipish chashnallatajmi yuyachinga. Ñuca paicunaman cushatajmi nishca allpaman manaraj ñuca chayachishpa, paicuna chaipi cashpa ima shina yuyana cashcataca ñaupamanmi ñucaca ña yachani” nircami.

²²Moisesca chai punllallataj, cai cantota quillcashpami israelcunamanca yachachirca.

²³Chai q'uipami Mandaj Diosca Nunpaj churi Josuetaca: “Fuerzarilla, c'ari c'ari cailla. Ñuca cushatajmi nishca llajtamanca canmi israelcunataca yaicuchingui, ñucaca canhuanmi casha” nirca.

²⁴Moisesca cai mandashca shimicunata shuj libropi quillcashca q'uipaca,

²⁵Mandaj Dioshuan ari ninacushca quillcata huaquichina arcata apaj levita curacunatami cashna mandarca:

²⁶“Cai mandashcacunata quillcashca librota japishpa, Mandaj Dios cancunapaj Taita Dioshuan ari ninacushca quillcata huaquichina arca c'uchullapi churaichij. Chaitaca cancuna imallata rurashcata ricuchij cachunmi chaipi churana canguichij.

²⁷Ñucaca cancuna mana cazujcuna, millaita ruranaman aticujcuna cashcatami yachani. Cunan cancunahuan ñuca causacujpipish cancunaca Mandaj Diosta c'ariyajcunami canguichij. Ñuca huañushca q'uipacarin ima shinachari canguichij.

²⁸Cunanca cancunapaj tucui aillucunamanta tucui cunaj yuyajcunata, cancunata mandajcunata ñucapajman tandachimuichij. Chaipica jahua pacha cai pacha ricucunpimi israelcunaman rimashpa cai shimicunata uyachisha.

²⁹Ñuca huañushca q'uipaca Diospajca ismucuj shina tucushpa, ñuca mandashca ñancunamanta anchurina cashcataca yachanimi. Cancunapaj maquihuan rurashcacunahuan Mandaj Diosta yallitaj p'iñachishcamantaca, q'uipa punllacunataca jatun llaquicunami cancunapaj jahuaman shamunga” nircami

³⁰Moisesca, tucui tandanacushca israelcunamanmi cai cantotaca callarimanta tucurincama tucuita uyachirca: