Read Chimborazo Highland Quichua DEUTERONOMIO 32 Bible Online

DEUTERONOMIO 32 - Chimborazo Highland Quichua bible

DEUTERONOMIO 32

¹“Ñucamari rimagrini jahua pachacuna uyaichij. Ñuca shimihuan imalla nishcacunata cai pachapish uyayari.

²Ñuca yachachishcaca tamya shinami urmanga. Ñuca imallata yuyachishcaca shulla shinami shutujyachinga. Gramapi garhuashca shinami canga. Q'uihuapi tamya shutuj shinami canga.

³Mandaj Diospaj shutitami ñucaca cantasha. ¡Ñucanchij Taita Diostaca jatunyachichigari!

⁴Paica ñucanchij miticuna jatun Rumimari. Pai rurashcacunapica ima panda mana tiyanchu. Paipaj ñancunapish ima mana pandachu. Paica mana llullaj Taita Diosmi. Paipica ima millai mana tiyanchu. Paica cashcata rurajmi, imata mana pandajmi.

⁵Ashtahuanpish paipaj huahuacunamari Diospajca ismucuj shina tucushcanchij. Huahua huahua millaicunami tucushcanchij.

⁶Cancunaca yuyai illaj muspacunamari canguichij. Manachari paica, cancunata ruraj cancunapaj yayari. Manachu pai cancunata rurashpa causaiyujta rurarca. Chashna jahuachu cancunaca millaita rurashcahuan cutichinguichij.

⁷Ñaupa huatacunata yuyarichigari. Achca huahua huahuacuna ima shina tucumushcata yuyarichij. Cambaj yayata tapuiyari paica huillangallami. Cancunapaj cunaj yuyajcunata tapuichigari, paicunapish huillangallacunami.

⁸Jahua pacha Diosca gentecunata mirga mirgata rurashpa llajtacunata rurashpaca, tucuicunamanmi quiquin llajtacunata curca. Ashtahuanpish israelcunamanca mashna cashcapaj pajtatami curca.

⁹Chaimantami Mandaj Diosca paipajlla agllashcacunata rurarca. Jacobca pai munashcami carca.

¹⁰Paicunataca shitashca pambapimi japimurca. Imapish mana tiyan llajtapimi japimurca. Paipaj quiquin ñahuita shinami ugllashpa cuidarca. Paipaj quiquin ñahuita shinami huaquichirca. Chashnami cuidashpa yachachirca.

¹¹Aguila paipaj tazin jahuata purishpa paipaj huahuacunata jatarinata yachachij shinami, Mandaj Diosca alasta chutashpa paipaj pluma jahuapi apamurca.

¹²Mandaj Diosllami cuidashpa pushamurca. Paihuanca shujtajcunapaj diosca mana carcachu.

¹³Jahua llajtacunamanmi huichiyachirca. Cai allpacunapi p'ucushca granocunatami cararca. Peñamantami sacha chuspipaj mishquitapish cararca. Rumilla sinchi allpacunamantami aceiteta cararca.

¹⁴Vacapaj mantequillata, ovejacunapaj lechetami cararca. Malta ovejacunapaj huirata, Basán carnerocunapaj, chivocunapaj aichatami cararca. Ashtahuan alli trigotami cararca. Uvapaj yahuarta capishca vinotami ubyarchirca.

¹⁵Ashtahuanpish Jesurún huirayashpaca, huashamanmi jaitarca. Yallitajmi gordoyarcangui, huirami taparca. Ashtahuanpish paita ruraj Taita Diosmantami anchurirca. Paita quishpichij jatun Rumitapish yanganchircami.

¹⁶Paicunaca shujtaj dioscunapajman rishpami yallitaj p'iñachircacuna. Millananacunata rurashpami p'iñachircacuna.

¹⁷Taita Diosman animalcunata huañuchishpa cunapaj randica supaicunamanmi curcacuna. Paicunaca mana rijsishca dioscunamanmi curcacuna. Paicunapaj ñaupa yayacuna mana manchaj cashca, cunanlla ricurij dioscunamanmi curcacuna.

¹⁸Cancunata ruraj jatun Rumitamari cungarishcanguichij. Cancunata ruraj Taita Diostamari cungarishcanguichij.

¹⁹Chaita ricushpami Mandaj Diosca nina sindirij shina yallitaj p'iñarirca. Paipaj churicuna, paipaj ushushicuna yanganchishcamantami yallitaj p'iñarca.

²⁰Chaimi paica: 'Ñuca ñahuitaca paicunamanta anchuchishami. Paicunaca yallitaj millai mana pajtachij huahua huahuacunami. Paicuna ima shina chingarijtaca ricushatajmi.

²¹Paicunaca manapish dios cajta mañashpami ñucataca yallitaj p'iñachircacuna. Paicunapaj rurashcalla dioscunata cungurishpami ñucataca p'iñachircacuna. Ñucapish paicunataca manapish ñucapaj cajcunahuanmi llaquichisha. Ch'ahuan runacunahuanmi llaquichisha.

²²Nina sindirij shina ñuca p'iñarishcami seolcama rupachinga. Paicunapaj allpatapish granocunandijmi millpunga. Urcucunapaj callari rumicunatapish rupachingami.

²³Paicunapaj jahuapica tucui laya llaquicunata ñucami churasha. Paicunata tucuchingapajmi puntajlla caspicunata shitasha.

²⁴Paicunaca yaricaihuanmi huañungacuna. Rupachij fiebrehuan, millai ungüicunahuan tucuchishcami cangacuna. Sacha animalcunatami paicunapajman cachasha. Venenoyuj culebracunatami paicunapajman cachasha.

²⁵Canllaman cajcunatapish espadacunahuanmi huañuchingacuna. Huasi ucupi cajcunapish chujchungacunami. Q'uipa huiñai c'aricunapish, huarmicunapish, chuchucuj huahuacunapish, puzujlla umacunapish chujchungacunami.

²⁶Paicunataca mai caruta cachashpa tsirapanatami yuyarcani. Chashna rurashpami paicunataca pi ama ashtahuan yuyarichun cai pachapi causaj runacuna puramantaca chingachisha' nircani.

²⁷Paicunata p'iñajcuna c'amishpa ñucata asichunca mana munashpami, mana chashna chingachircani. Chai runacuna pugllachunmi mana munarcani. Chai runacunataca: 'Mana Mandaj Dioschu cashna chingachin. Ashtahuanpish ñucanchij alli c'ari c'aricuna cashpami chashna tucuchinchij nishpami' jatun tucunmancuna carca.

²⁸Ashtahuanpish israelcunamanca manamari pi yuyaita cushcachu. Mana yuyaita japi tucuncunachu.

²⁹Caicunata entendingapaj yachaisapacuna cashpachari alli canman. Tucuripica ima tucuna cashcata yachashpachari alli canman.

³⁰Paicunaca shujllamari huarangata manchachishpa catircacuna. Ishquillamari chunga huarangata callpachircacuna. Miticuna jatun Rumi shina ñucanchijta Mandaj Dios, paicunapaj maquipi churajpimari chashna rurarcacuna. Pai Diosllatajmi c'atuj shina paicunaman curca.

³¹Paicunapaj rumica mana ñucanchij Rumi shinachu. Chaitaca ñucanchijta p'iñajcunallataj allimi yachancuna.

³²Paicunaca Sodoma, Gomorra uva chagracunami. Paicunaca huañuchij jayaj uvacunami.

³³Paicunapaj vinoca culebrapaj venenomi. Canishpa huañuchij culebrapaj venenomi.

³⁴¿Manachu sumaj charinacunata huaquichinapi huaquichishpa sellashcata charicuni?

³⁵Chai tucuimantaca ñucami paicunatapish llaquichisha. Paicuna rurashca shinallatajmi cusha. Paicunapaj llaqui punllaca ñallami chayamugrin. Paicunaman cunataca allichishcatami charicuni.

³⁶Mandaj Diosca pai agllashcacunamanta shayaringami. Paipajta rurajcuna llaquita apacujta ricushpaca llaquiringami. Fuerza illajlla cajta ricushpami llaquiringa. Amopajta rurajcunapish, amopajta mana rurajcunapish tucuricujta ricushpami llaquinga.

³⁷Chaipica israelcunaca paicunata p'iñajcunataca: ¿Paicunapaj dioscunaca maipitagari? ¿Paicuna miticuna jatun rumica maipitagari?

³⁸¿Paicuna cushca animalcunapaj huirata micuj, paicuna tallishpa cushca vinota ubyaj dioscunaca maipitagari? Paicuna jatarishpa ayudachunri, paicuna shamushpa mitsachunri.

³⁹Cunanca ñucalla Taita Diostaj cashcataca alli ricuichij. Ñuca shina Diosca pi shujtaj diosca mana tiyanchu. Ñucami causaita quichuni, ñucallatajmi causaita cuni. Ñucami chugrichini, ñucallatajmi alliyachini. Ñuca maquimantaca pi mana quishpiri tucunchu.

⁴⁰Ñuca maquita huichi chutashpami: “Ñucaca huiñaita causacujmi cani” nini.

⁴¹Achij nicuj ñuca espadata ña filosapata rurashpaca, llaquichijta ñuca maquihuan japishpami ñucata p'iñajcunataca paicuna ima shina rurashca shinallataj rurasha. Paicuna ima shina rurashca shinallatajmi ñucata p'iñajcunamanca cusha.

⁴²Ñuca puntajlla caspicunataca yahuarpimi pambasha. Ñuca espadaca aichacunatami millpunga. Huañushcacunapaj, prezucunapaj yahuartami millpunga. Ñucata p'iñaj mandajcunapaj umacunatami p'itinga' ningami.

⁴³Llajtacunapi causajcuna, Diospajlla cajcunahuan tucushpa cushicuichigari. Paipajta rurajcunata huañuchijcunataca, Taita Diosmari huañuchinga. Paita p'iñajcunataca llaquichingatajmi. Pai agllashca llajtamantapish, paipajlla cajcunamantapish juchata anchuchingami” nircami.

⁴⁴Moisesca Nunpaj churi Josuendij, tucui israelcunapajman rishpami, cai cantotaca tononchishpa rezashpa uyachirca.

⁴⁵Chaita tucui uyachishpaca Moisesca tucui israelcunamanca,

⁴⁶cashnami nirca: “Cunan cancunaman ñuca huillashca shimicunataca cancunapaj shungupi cutin, cutin yuyaricunguichijlla. Cancunapaj huahuacuna cai mandashcacunapi nishcacunata pajtachina yuyailla pajtachichun mandangapajmi chashna yuyaricuna canguichij.

⁴⁷Cai mandashcacunaca mana yangachu. Ashtahuanpish cancunaman causaita cujmi. Jordán yacuta ch'imbashpa cancuna japigricun llajtaman chayashpaca cai mandashcacunata pajtachishpami unita causanguichij” nircami.

⁴⁸Chai punllallatajmi Mandaj Diosca, Moisestaca cashna nirca:

⁴⁹“Abarim urcucunaman rishpa chaipi caj Nebo urcuman huichiyagri. Chai urcuca Jericó ch'imbapurapi caj Moab llajtapimi. Chai urcumantami israelcunapaj cachun ñuca cushca Canaán llajtataca ricungui.

⁵⁰Chai urcunaman huichiyashpami chaipi huañungui. Cambaj ñaupa yayacunahuanmi tandanacugringui. Cambaj huauqui Aarón Hor urcupi huañushpa paipaj ñaupa yayacunahuan tandanacugrij shinallatajmi tandanacugringui.

⁵¹Cancunaca ishquindijtajmi, Cades llajtapi cashpaca Zin nishca shitashca pambapi caj Meriba yacucuna c'uchupica ñucata p'iñachishpa tucui israelcunapaj ñaupajpi juchallircanguichij. Ñucataca jucha illaj Jatun Dios cashcata paicunaman mana ricuchircanguichijchu.

⁵²Chaimantami canca tucui israelcunaman ñuca cushca llajtamanca mana yaicugringui. Chai llajtataca carumanta ricushpallami saquiringui” nircami.