Read Chimborazo Highland Quichua JUAN 10 Bible Online

JUAN 10 - Chimborazo Highland Quichua bible

JUAN 10

¹Maijanpish ovejacunapaj corralman punguta mana yaicushpa, shujtajta yaicujca shuhuami, chapashpa huañuchijmi. Chaica chashnatajmi.

²Ashtahuanpish ovejacunata michijca pungutami yaicun.

³Chai michijmanmi punguta cuidajca, punguta pascashpa ricuchin. Ovejacunaca michijpaj rimaitami uyan. Michijca paipaj ovejacunataca, shutipi cayashpami llujshichin.

⁴Paipaj ovejacunata canllaman tucuicunata llujshichishpaca, paicunata ñaupashpami rin. Ovejacunaca michijpaj rimaita rijsishcamantami paita catinllacuna.

⁵Mana rijsishcataca mana catincunachu. Mana rijsishcacunapaj rimaitaca mana rijsishcamanta manchashpa maitapish rinllacunami — nircami.

⁶Cai shina parlota Jesús ch'imbapurashpa parlajpica, fariseocunaca imata nisha nishcata mana entendircacunachu.

⁷Jesusca entendichingapajmi cutin cashna parlarca: — Ñucaca ovejacunapaj pungumi cani. Chaica chashnatajmi.

⁸Ñucapaj ñaupa shamujcunaca tucuicunami shuhuacuna, chapashpa huañuchijcuna carca. Paicunataca ovejacunaca mana uyarcacunachu.

⁹Ñucaca pungumi cani: Maijanpish ñucamanta yaicujca quishpichishcami canga. Paica yaicui tucunmi, llujshi tucunmi, micunatapish charingami.

¹⁰Shuhuaca, shuhuangapaj, huañuchingapaj, tucuchingapajllami shamun. Ñucaca causaita charichun, yallitaj charichunmi shamurcani.

¹¹Ñucaca alli michijmi cani. Alli michij cashcamanta ñuca ovejacunamantaca huañushami.

¹²Cullqui raiculla michijca, ovejacuna mana paipaj cajpimi, atuj shamujta ricushpa shitashpa rinlla. Shuj ovejata atuj japijpica, caishujcunaca caita chaitami rin.

¹³Cullqui raiculla michicushcamantaca ovejacuna imapish tucuchun saquishpa rinllami.

¹⁴Ñucaca alli michijmi cani. Ñuca ovejacunataca rijsinimi, paicunapish ñucataca rijsinmi.

¹⁵Ima shinami ñuca Yaya ñucata rijsin, shinallatajmi ñucapish ñuca Yayataca rijsini. Ñuca ovejacunamantaca ñuca causaitami cuni.

¹⁶Mana cai corralpi caj shujtaj ovejacunatapish charinimi. Paicunatapish pushamunami cani. Paicunapish ñuca rimaitami uyangacuna. Shuj canllallami tucunga, shuj michijllami tiyanga.

¹⁷Ñucallataj huañuchijcunaman entregarishpa huañushpa cutin causarina cajpimi, ñuca Yayaca ñucataca c'uyan.

¹⁸Pi mana ñucataca huañuchi tucunchu, ashtahuanpish ñuca huañusha nijpimi huañuchingacuna. Ñucallataj huañui tucunimi, ñucallataj causari tucunimi. Chashna tucuchunmi ñucataca ñuca Yayaca mandarca nircami.

¹⁹Chaita uyashpami judiocunaca cutinllataj paicunapura caita chaita yuyashpa ch'ican ch'ican yuyai tucushpa rimanacurcacuna.

²⁰Paicunapuramanta achcacunami: — Paica supai japishca, juillu illajmari. ¿Ima nishpataj paitaca uyacunguichij? — nircacuna.

²¹Shina nijpipish maijancunaca: — Chai shimicunataca supai japishca cashpaca mana rimai tucunmanchu. Supaica mana ricujcunapaj ñahuitaca ¿ima shinataj alliyachi tucungari? — nircacuna.

²²Jerusalenpica, Taita Diospaj huasita Taita Diosman mingashcata yuyarishpami fiestata ruracurcacuna. Chai punllacunaca tamya punllacunami carca.

²³Taita Diospaj huasipimi Jesusca, Salomonpaj cashca corredorpi puricurca.

²⁴Chaipimi judiocuna muyujta shayarishpa Jesustaca: — ¿Maicamataj ñucanchijtaca muspachicunguilla? Canllataj Cristo cashpaca, alli huillaiyari — nircacuna.

²⁵Chaimi Jesusca: — Ñami cancunamanca huillarcani. Mana cringuichijca. Ñuca Yaya rurai nishcacunata ñuca rurashcacunallatajmi ñuca pi cashcataca huillacun.

²⁶Ashtahuanpish ña nishca shinallataj mana ñuca ovejacuna cashpami, cancunaca mana cringuichij.

²⁷Ñuca ovejacunaca ñuca rimaitaca rijsinmi. Ñucapish paicunataca rijsinimi. Paicunaca ñucata catinllacunami.

²⁸Ñucaca paicunamanca huiñai causaitami cuni, manataj chingaringacunachu. Ñuca maquimantaca, pi mana quichungachu.

²⁹Paicunata ñucaman cuj ñuca Yayaca tucuita rurai tucujmi. Ñuca Yayapaj maquimantaca, pi mana quichui tucunchu.

³⁰Ñuca Yayapish, ñucapish shujllami canchij — nijpimi,

³¹judiocunaca Jesusta huañuchishun nishpa cutin rumicunata japircacuna.

³²Chashna shitashun nijpimi Jesusca: — Ñuca Yaya mandajpi cancunapaj ñaupajpica cai tucui allicunatami rurarcani ¿maijan chaicunamantataj rumihuan shitashun ninguichij? — nirca.

³³Chaimi judiocunaca: — Allita rurashcacunamantaca mana rumicunahuan shitashun ninchijchu. Ashtahuanpish runa cashca jahua, Taita Dios tucushpa, Taita Diosta p'iñachishcamantami rumicunahuan shitashun ninchij — nircacuna.

³⁴Shina nijpi Jesusca: — Cancunata Mandashcapica: “Ñucaca cancunataca dioscunami canguichij” nishpami Taita Diosca quillcachishca.

³⁵Maijancunapajman Taita Diospaj Shimi shamushca cajpica, chaicunataca dioscunami canguichij nishpaca, pai Quillcachishcataca maita mana p'aquipajmari.

³⁶Ashtahuanpish cancunaca: Ñuca Yaya pai munashcata rurachun ch'icanchishpa cai pachaman cachashca cajtaca ¿maitataj Taita Diosta c'amijmi ninguichigari? Ñucaca pai cachashca cashpamari “Taita Diospaj Churimi cani” nircami.

³⁷Ñuca Yaya rurashca shina mana rurajpica, ñucataca ama crichijchu.

³⁸Ñuca Yaya rurashca shinallatajmi ruracuni. Chashna cajpica ¿ima nishpataj mana cringuichij? ñucata mana crishpapish, chai ñuca rurashcacunata ricushpallapish crichigari. Chashna crishpami Yayaca ñucahuan, ñucaca Yayahuan shujlla cashcataca yachanguichij — nircami.

³⁹Chaimi cutinllataj ima shinapish paita japinata yuyarishpa japigrijpica, paicunapaj maquimanta llushpirishpa rircalla.

⁴⁰Chaimanta rishpaca Jordán yacu ch'imbanijpi, ñaupaman Juan bautizacushcamanmi Jesusca tigrashpa rirca. Chaipimi saquirirca.

⁴¹Chaipi cajpi achcacuna paipajman rishpaca: — Juanca ima milagrota mana rurashca cashpapish cai runamanta tucui pai huillashcaca, mana llullachu cashca — nircacunami.

⁴²Chashna nishpaca achcacunami chaipica Jesusta crircacuna.