Read Chimborazo Highland Quichua JUAN 11 Bible Online

JUAN 11 - Chimborazo Highland Quichua bible

JUAN 11

¹María, Marta causan Betania pueblopica paicunapaj turi Lazaromi ungushca carca.

²(Chai ungushca Lazaropaj pani Mariami Mandaj Jesustaca mishquijllata ashnacujhuan chaquipi tallishpa paipaj ajchahuan chaquichirca).

³Chai panicunami Jesuspajmanca: — Mandaj Jesús, can c'uyashca Lazaroca ungushcamari — nishpa huillachun cacharcacuna.

⁴Chaita Jesús uyashpaca: — Chai ungüica mana huañunapajchu. Ashtahuanpish Taita Dios tucuita rurai tucuj cashcata ricuchinapajmi. Taita Diospaj Churipish chai ungüimantami jatunyachishca canga — nircami.

⁵Jesusca Lazarotapish, Martatapish, Mariatapish c'uyarcami.

⁶Lázaro ungushca cashcata uyashpapish, ishqui punllacamami, pai maipi cashca llajtallapitaj saquirirca.

⁷Chai q'uipami Jesusca yachacujcunataca: — Jacuchij, cutin Judeaman — nijpi,

⁸yachacujcunaca: — Yachachij, sarunllatajmi judiocunaca rumicunahuan shitashun nircacuna. ¿Cutinchu chaiman risha ningui? — nircacuna.

⁹Chaimi Jesusca: — ¿Manachu punllaca chunga ishqui horasta charin? Punllapi purijca, cai pachapaj luz achijyachicujpica mana ñitcanchu.

¹⁰Ashtahuanpish tutapi purijca, luz paipi mana tiyashcamantami ñitcanlla — nircami.

¹¹Chashna nishca q'uipaca Jesusca: — Ñucanchij c'uyashca Lazaroca dormicunmi. Paita rijchachinamanmi rigrini — nijpimi,

¹²paipaj yachacujcunaca: — Mandaj Jesús, dormicushpaca alliyangallami — nircacuna.

¹³Chashna nishpaca Jesusca Lazaroca huañushcami nisha nircami. Ashtahuanpish paicunaca dormishpa samaricujllapimi, chashna nicun yuyarcacunami.

¹⁴Chashna yuyacujpimi Jesusca: — Lazaroca huañushcatajmi — nishpa alli huillarca.

¹⁵— Ñucaca cancuna alli crij cachun ñuca mana chaipi cashcamantaca cushicunimi. Cunanca paipajman jacuchij — nircami.

¹⁶Shina nijpimi ishqui huacharishca Tomasca, caishuj yachacujcunataca: — Shinashpaca, ñucanchijpish Jesushuan huañungapaj jacuchijlla — nirca.

¹⁷Jesús chayanapajca, Lazaroca ñami chuscu punllata jutcupi churashca cashca carca.

¹⁸Betaniaca, Jerusalenmanta mana carupichu carca. Quimsa kilómetro shinallapimi carca.

¹⁹Chaimantami Martata, Mariatapish paicunapaj turi huañushcamanta llaquilla cajpi cushichingapaj achca judiocuna shamushca carca.

²⁰Martaca Jesús chayamun nijta uyashpami, tupanaman llujshishpa rirca. Mariaca huasi ucupimi carca.

²¹Martaca Jesustaca: — Mandaj Jesús, can caipi cashca cajpica, ñuca turica mana huañunmanchu carca.

²²Cunanpish Taita Diosta can mañajpica, imatapish Taita Diosca cuna cashcata yachanimi — nijpimi,

²³Jesusca: — Cambaj turica causaringami — nirca.

²⁴Chashna nijpi Martaca: — Huañushcacuna causarina punllapi paipish causarina cashcataca yachanimi — nijpimi,

²⁵Jesusca: — Ñucami causachijpish, causaiyujpish cani. Maijanpish ñucata crijca, huañushca cashpapish causaringami.

²⁶Maijan causacujcunapish ñucata crijca, huiñaita manataj huañungachu. ¿Chaitaca cringuichu? — nircami.

²⁷Chaimi Martaca: — Ari, Mandaj Jesús. Ñucaca cantaca Cristo, cai pachaman shamuna cashca Taita Diospaj Churi cashcatami crini — nirca.

²⁸Chashna nishca q'uipami Martaca paipaj ñaña Mariapajman rishpaca: — Yachachijca caipimi, cantami cayacun — nishpa allijlla huillarca.

²⁹Shina nijta uyashcahuan jatarishpami Mariaca Jesuspajman rirca.

³⁰Jesusca chai uchilla llajtamanca, manaraj chayarcachu. Martahuan maipi tupashcallapitajmi cashca carca.

³¹Mariataca huasimanta callpashpa llujshishpa rijta ricushpami, paita cushichinaman shamushpa paipaj huasipi tiyacuj judiocunaca, jutcupimari huacagrin ninacushpa paita catishpa shamurcacuna.

³²Mariaca Jesuspajman chayashpaca paipaj ñaupajpi cungurishpami: — Mandaj Jesús, can caipi cashca cajpica, ñuca turica mana huañunmanchu carca — nirca.

³³Chashna nishpa María huacajpi, paita catishpa shamuj judiocunapish huacajta ricushpa Jesuspish yallitaj llaquishpa llaquinachishpami,

³⁴— ¿Maipitaj paitaca churarcanguichij? — nijpi paicunaca: — Mandaj Jesús, jacu ricungui — nircacuna.

³⁵Jesuspish huacarcami.

³⁶Chaita ricushpami judiocunaca: — ¡Riquichij, ima shinami Lazarotaca c'uyashca! — nircacuna.

³⁷Chaipi cajcunamanta maijancunaca: — Paica, ñahui mana ricujtapish alliyachircamari. Pai caipi cashpaca Lázaro ama huañuchunpish imallatapish ruranmanmi carca — nircacunami.

³⁸Jesusca cutinllataj yallitaj llaquirishpami Lazarota churashca jutcuman shamurca. Chai jutcuca, jatun rumihuan huichcashcami carca.

³⁹Jesusca ña chayashpaca: — Rumita anchuchichij — nircami. Shina nijpi Lazaropaj pani Martaca: — Mandan Jesús, jutcupi churashcaca ñamari chuscu punlla, ashnacungamari — nijpi,

⁴⁰Jesusca: — Can crishpaca Taita Diosca tucuita rurai tucuj cashcata ricunguimi nishpa ¿manachu nircani? — nircami.

⁴¹Jesús chashna nijpica, huañushcata churashca jutcuta huichcashca rumita anchuchijpimi Jesusca jahuanta huichilla ricushpa cashna nirca: — Yayitu, ñuca mañashcata uyashcamanta pagui ninimi.

⁴²Ñuca mañashcata uyaracuj cashcataca yachanimi. Ashtahuanpish cai ñuca muyundijpi caj achcacuna can cachashca cashcata crichunmi chashnaca nini — nircami.

⁴³Chai q'uipaca: — ¡Lázaro, chaimanta llujshimui! — nishpami sinchita caparirca.

⁴⁴Shina nijpi chai huañushcaca chaquicunandij, maquicunandij maitushca, umatapish linsohuan pilluchishcami llujshimurca. Chaimi Jesusca: — Pilluchishcacunata pascaichij purichun — nirca.

⁴⁵Jesús chashna rurajta ricushpaca, Mariata cushichinaman shamushca judiocunapuramantaca achcacunami Jesusta crircacuna.

⁴⁶Cutin maijancunaca, Jesús imallata rurashcatami fariseocunaman huillagrircacuna.

⁴⁷Chaimantaca curacunata mandajcuna, fariseocunapish, mandajcunapurallami tandanacurcacuna. Chashna tandanacushpaca: — Cai runaca pi mana rurai tucuipajtamari achcata ruracun ¿imatataj rurashunri?

⁴⁸Paita chashna rurashpa catichun saquijllapica, ñataj paita tucuicuna crinman, ñucanchij Taita Diospaj huasitapish Roma llajtamanta shamushpa urmachishpa shitanman, cai ñucanchij llajtatapish ñataj quichunman — nircacunami.

⁴⁹Chashna nijpi tandanacushcapuramanta, chai huatapi curacunata mandaj Caifás curami cashna nirca: — Cancunaca imata mana yachanguichijchu.

⁵⁰Cai ñucanchij llajtapi tucui causajcuna huañunapaj randica, shuj runalla huañunamari ñucanchijpajca tucuimanta yalli alli. Chaitaca manamari yachanguichijchu — nircami.

⁵¹Shina nishpaca mana paipaj quiquin yuyaimantachu nirca. Ashtahuanpish chai huatapi curacunata mandaj cajpimi, llajtapi tucui causajcunamanta Jesús huañunataj cashcata Taita Dios huillachijpi chashna huillarca.

⁵²Mana chai llajtallamantachu huañuna carca. Ashtahuanpish tucui cai pachapi urapi janajpi caj Taita Diospaj huahua cajcunata tandachingapajmi chashnaca huañuna carca.

⁵³Chai punllamantami, Jesustaca huañuchinatajmi nishpa yuyarinacurcacuna.

⁵⁴Chaita yachashpami Jesusca judiocunapaj paca pacalla puricushpaca, shitashca pamba c'uchulla llajtapi caj Efraín shuti puebloman rishpa, paipaj yachacujcunandij chaipi carca.

⁵⁵Judiocunapajca Pascua fiestami chayamucurca. Chaimantami chai llajtacunamantaca, Pascua punllapi Taita Diospaj ñaupajpi alli ricuringapaj, imallata rurana cashcata rurangapaj achcacuna ñaupaman Jerusalenmanca huichiyarcacuna.

⁵⁶Chai rijcunaca Jesusta mashcarcacunami. Taita Diospaj huasipi cashpapish: — ¿Imatataj yuyanguichij? ¿Cai fiestamanca shamungachu imashí? — nishpami, caishuj chaishuj tapunacurcacuna.

⁵⁷Curacunata mandajcunapish, fariseocunapish Jesús maipi cashcata maijanpish yachashpaca, huillaj shamuchun paita japigringapaj nishpami, shuj mandashcata churashcacuna carca.