Read Chimborazo Highland Quichua JUAN 13 Bible Online

JUAN 13 - Chimborazo Highland Quichua bible

JUAN 13

¹Pascua fiesta callarinapajca ashallami illarca. Jesusca, cai pachamanta Yayapajman rina ña chayamugrishcata yachashpami, cai pachapi caj paipajcunataca, sarunmanpish c'uyaj cashpa, cunanpish ima shina achcata c'uyashcata ricuchisha nirca.

²Jesusca paipaj yachacujcunandijmi micucurca. Simonpaj churi Judas Iscariotepaj shungupica, ñaupamanmi diabloca Jesusta huañuchichun japichina yuyaita churashca carca.

³Jesusca paipaj maquipi paipaj Yaya Dios tucuita churashcata, Taita Diospajmanta shamushcata, Taita Diospajman cutin tigrana cashcatapishmi yacharca.

⁴Chaimi micucushcamanta jatarishpa, paipaj jahua churanata llujshichishpa, shuj linsota japishpa chumbillirirca.

⁵Chai q'uipaca shuj bateapi yacuta churashpami, yachacujcunapaj chaquicunata maillai callarirca. Chumbillishca linsohuanca chaquicunatami chaquichirca.

⁶Simón Pedropaj chaquita maillasha nijpimi: — Mandaj Jesús, ¿Maitataj ñuca chaquicunata quiquinca maillanguiyari? — nirca.

⁷Chaimi Jesusca: — Ñuca imapaj chashna rurashcataca, cunanca manaraj entendinguichu, ashtahuanpish q'uipatamari imapaj cashcataca entendingui — nijpimi,

⁸Pedroca: — Ñuca chaquicunatatajca manataj maillanguichu — nijpimi Jesusca: — Cambaj chaquicunata ñuca mana maillajpica, ñucapajta rurajca mana cai tucunguichu — nirca.

⁹Chaimi Simón Pedroca: — Mandaj Jesús, ama ñuca chaquicunallata maillahuaichu. Ashtahuanpish maquicunandij, umandij armachihuai — nirca.

¹⁰Chaimi Jesusca: — Maijanpish cunanlla armashca cashpaca, tucui chuya cashcamanta mana cutin armanchu, chaquicunallatami maillarin. Cancunaca mana tucuicuna chuya cashpapish, chuyayachishcami canguichij — nircami.

¹¹Jesusca, pi paita huañuchichun cuna cashcataca yachashcamantami: “Mana tucuicunachu chuya canguichij” nirca.

¹²Chaquicunata tucui maillashca q'uipaca, paipaj jahua churanata churarishpa mezapi cutin tiyarishpami cashna nirca: — ¿Cancunata ñuca imapaj chashna rurashcataca entendinguichijchu?

¹³Cancuna ñucataca Yachachij nishpapish, Mandaj nishpapish allitamari ninguichij, chaillatajmari cani.

¹⁴Ñucaca cancunapaj Mandaj cashpapish, Yachachij cashpapish, cancunapaj chaquicunatami maillani. Cancunapish chai shinallatajmi, caishuj chaishujta maillana canguichij.

¹⁵Caitaca cancunapish ñuca rurashca shinallataj rurachunmi ricuchini. Cancunapish ñuca rurashca shinallataj ruraichij.

¹⁶Amopajta rurajca mana paipaj amota yallichu. Mandashpa cachashcapish mana cachajta yallichu. Chaica chashnatajmi.

¹⁷Cai nishcacunata alli entendishpa chaitataj rurashpaca cushichishcami canguichij.

¹⁸Mana tucui cancunatachu chashna nini. Maijanlla ñuca agllashcataj cajtaca yachanimi. Ashtahuanpish: “Ñucahuan micujllatajmi, ñucataca jaitanga” nishpa Quillcachishca pajtachunmi chashna tucun.

¹⁹Chashna tucujpica ñuca pi cani nishcata crichunmi ñaupaman cancunamanca huillani.

²⁰Pipish ñuca cachashcata chasquijca, ñucatami chasquin. Pipish ñucata chasquijca, ñucata cachajtami chasquin. Chaica chashnatajmi — nircami.

²¹Chashna nishca q'uipami Jesusca yallitaj llaquirishpa: — Cancunamanta shujmi ñucataca huañuchichun cunga. Chaica chashnatajmi canga — nirca.

²²Chaimi yachacujcunaca, maijanta chashna nicushcata mana yachashpa caishuj chaishuj ricunacurcacuna.

²³Paipaj yachacujcunamanta Jesús c'uyashca shuj yachacujmi, Jesuspaj c'uchupi quinrilla sirishpa micucurca.

²⁴Paitami Simón Pedroca, pita chashna nicushcata tapuchun señaschirca.

²⁵Chaimi paica, Jesuspi huancarishpaca: — Mandaj Jesús ¿maijantaj canta japichijca? — nijpi,

²⁶Jesusca: — Tandata ñuca pimanmi nuyuchishpa cuni, chaimi canga — nirca. Tandata nuyuchishpaca, Simonpaj churi Judas Iscariotemanmi curca.

²⁷Chai tandata japincami Satanasca Judaspi yaicurca. Chaimi Jesusca: — Imata ruracushcataca ña utca ruragrilla — nirca.

²⁸Mezapi Jesushuan micucujcunaca, imata nisha nishpa chashna nishcataca pi mana entendircacunachu.

²⁹Judasca cullquita huaquichijmi carca. Chaimantami maijancunaca: “Fiestapaj imalla illashcata randigri”, mana cashpaca: “Huajchacunaman ashata cugri” nishpa, Jesús mandashca canata yuyarcacuna.

³⁰Judasca chai tandata micushcahuan llujshishpa rircallami. Ña tutami carca.

³¹Judas ña llujshishpa rijpica Jesusca cashnami nirca: — Runa Aichayuj tucushcaca cunanmi tucuita rurai tucuj cashcata ricuchishca canga. Taita Dios tucuita rurai tucuj cashcapish Runa Aichayujmantami ricunringa.

³²Taita Dios tucuita rurai tucuj cashcataca Churimi ricuchin. Taita Diosca Churillapitajmi tucuita rurai tucuj cashcaca ricuringa. Chashna cashcataca Taita Diosca ñami ricuchigrin.

³³Huahuacuna, ashacamallami caipi cancunahuan tiyacuni. Cancunataca judiocunata nishca shinallatajmi nini: Ñucataca mashcanguichijmi. Ñuca maiman ricunmanca, cancunaca mana ri tucunguichijchu.

³⁴Ñucaca cancunataca manaraj mandashcatami mandani. Cancunaca caishuj chaishuj c'uyanacuichij. Ima shinami ñuca cancunata c'uyarcani, chashnallataj cancunapish caishuj chaishuj c'uyanacuichij.

³⁵Chashna caishuj chaishuj c'uyanacujpimi, cancunataca ñuca yachacujcunataj cashcata tucuicuna rijsingacuna — nircami.

³⁶Simón Pedroca: — Mandaj Jesús ¿maimantaj ricungui? — nijpi Jesusca: — Ñuca maiman ricunmanca, cunanllatajca mana ri tucunguichu. Q'uipatami catingui — nirca.

³⁷Chaimi Pedroca: — Mandaj Jesús ¿ima nishpataj cunanllatajca mana ri tucuni? ¡Ñucaca canmantaca huañuna cajpipish huañushallami! — nijpimi,

³⁸Jesusca: — ¿Canca ñucamantaca huañui tucunguichari? Ashtahuanpish gallo manaraj cantajpimi quimsa cutin ñucataca mana rijsinichu ningui. Chaica chashnatajmi canga — nircami.