Read Chimborazo Highland Quichua JUAN 15 Bible Online

JUAN 15 - Chimborazo Highland Quichua bible

JUAN 15

¹Ñucaca uva yuratajmi cani, ñuca Yayaca chagrayujmi.

²Ñucapi caj ramacuna maijanpish mana p'ucujpica anchuchingami. Maijanpish p'ucujpica, ashtahuan p'ucuchun mana allita anchuchirangami.

³Cancunaca ñuca huillashca Shimicunata chasquishcamantaca ñami chuyacuna canguichij.

⁴Cancunaca ñucahuan shuj shinalla catichij, ñucapish cancunahuanca shuj shinallami casha. Ima shinami ramaca yurapi mana cashpaca, paillatajca mana p'ucui tucun. Ñucahuan mana shuj shinalla catishpaca, cancunapish chashnallatajmi mana p'ucui tucunguichij.

⁵Ñucaca uva yurami cani. Cancunaca ramacunami canguichij. Maijanpish ñucahuan shuj shinalla cajhuanca, ñucapish paihuanmi casha. Paica achcatami p'ucunga. Ñucamanta ch'icanyashpaca, imata mana rurai tucunguichijchu.

⁶Mana p'ucuj ramataca p'itishpa canllaman shitajpi, chaquirijpica tandachishpa rupachinmi. Maijanpish ñucapi cashpapish ñucahuan mana shuj shinalla cajtaca, chai ramata shinallatajmi rurashca canga.

⁷Cancuna ñucahuan shuj shinalla catijpica, ñuca Shimicunapish cancunahuan shuj shinallami canga. Chashna cashpa cancuna imatapish ñuca Yayata mañajpica paica cungallami.

⁸Cancunaca ñuca yachacujcuna shinataj causashpa achca granota p'ucushpaca, ñuca Yayatami jatunyachinguichij.

⁹Ñuca Yaya ñucata c'uyashca shinami, ñucapish cancunataca c'uyarcani. Chaimanta ñuca c'uyaipi shuj shinalla catichij.

¹⁰Ima shinami ñuca Yaya mandashcacunata cazushpa paipaj c'uyaihuan shujlla cani, shinallataj cancunapish ñuca mandashcacunata cazushpa ñuca c'uyaihuan shujlla catichij.

¹¹Chaicunataca ñuca cushicui cancunapi cachunmi chashnaca nini. Chaimi ñuca cushicuj shinallataj cushicunguichij.

¹²Caimi ñuca mandashcaca: Ima shinami ñuca cancunata c'uyarcani, chashnallataj cancunapish caishuj chaishuj c'uyanacuichij.

¹³Maijanpish paihuan alli apanacujcunamanta huañujca yallitaj c'uyajmi. Chashna c'uyajca pi mana tiyanchu.

¹⁴Ñuca ima shina mandashca shinatataj rurashpaca, ñucahuan alli apanacujcunami canguichij.

¹⁵Cancunataca ña mana ñucapajta rurajcunami canguichij nishachu. Amopajta rurajca, paipaj amo imallata ruracujtaca mana yachanchu. Cancunamanca ñuca Yaya imallata ruracujtaca tucuitami yachachircani. Chaimanta cancunaca ñucahuan alli apanacujcunami canguichij.

¹⁶Mana cancunachu ñucataca agllarcanguichij, ñucami cancunata agllarcani. Cancuna rishpa granota p'ucuchun, chai granoca cancunapi p'ucushpa caticuchunllami agllarcani. Chashna cashpa ñucamanta imatapish Yayata mañajpica, paica cungallami.

¹⁷Cancunataca caishuj chaishuj c'uyanacuchunmi mandani.

¹⁸Cai pachapaj cajcuna cancunata p'iñajpica, ñucata p'iñacushcata yuyanguichij.

¹⁹Cai pachapaj cajpica, cai pachapaj cajcunaca paicunapaj cashcamanta c'uyanmanmi. Cai pachapaj cajcunahuan cajpipish ñuca agllajpimi, mana cai pachapaj canguichij. Chaimantami cancunataca cai pachapaj cajcunaca p'iñancuna.

²⁰“Amopajta rurajca amotaca mana yallichu” nishpa ñuca huillashcataca yuyarichigari. Ima shinami ñucatapish llaquichina yuyailla llaquichirca chashnallatajmi cancunatapish llaquichingacuna. Ñuca huillashcata cazushpaca, cancuna huillashcatapish cazungacunami.

²¹Ñucata cachajta mana rijsishcamanta, ñuca shutita p'iñashpami tucui caicunataca chashna rurangacuna.

²²Ñuca mana shamushca cajpi, paicuna juchayuj cashcata ñuca mana huillashca cajpica, juchayuj cashcataca mana yachanmanchu carca. Cunan paicunaca ñucanchijca mana juchayuj canchijchu mana ni tucuncunachu.

²³Maijanpish ñucata p'iñajca, ñuca Yayatapish p'iñanmi.

²⁴Nunca pi mana rurashcata paicunapaj ñaupajpi ñuca mana rurashca cajpica, juchayuj cashcataca mana yachanmanchu carcacuna. Cunanca ashtahuanpish juchayuj cashcata ricuchishcamantami ñucatapish, ñuca Yayatapish p'iñancuna.

²⁵Quillcachishpa paicunaman cushca mandashcapi: “Mana ima cajpipish ñucataca p'iñancunami” nishca pajtachunmi chashnaca rurancuna.

²⁶Ashtahuanpish ñuca yayapajmanta mana llullaj Espirituta cachajpi pai shamushpaca cushichingami. Paica imatapish cashcatataj nij Espiritumi. Paica Yayamanta shamushcamanta, ñuca ima shina cashcatami huillanga.

²⁷Ñuca rurana cashcata callari pachamantami ñucahuan carcanguichij. Chaimantami cancunapish ñucamantaca huillanataj canguichij.