Read Chimborazo Highland Quichua JUAN 16 Bible Online

JUAN 16 - Chimborazo Highland Quichua bible

JUAN 16

¹Cancunaca ñucata ña mana catishachu ama nichunmi caicunataca huillacuni.

²Cancunataca sinagogacunaman ama cutin yaicuchun llujshichishpa cachangacunami. Cancunata maijanpish huañuchishpaca, Taita Diospajtami ruracuni nishpa yuyana punllacunapish chayamucunmi.

³Ñuca Yayatapish, ñucatapish mana rijsishcamantami chashna rurangacuna.

⁴Ña chashna ruracujpica, caicunata ñuca huillashcata yuyarichunmi cunanman huillacuni. Caicunataca sarunmanca cancunahuan cashpami manaraj huillarcani.

⁵Cunanca ñucata cachajpajmanmi rigrini. Shina cajpipish cancunamanta shujllapish: “¿Maimantaj ricungui?” nishpa mana tapunguichijchu.

⁶Ashtahuanpish caicunata ñuca nijpica llaquirinallatami yallitaj llaquiringuichij.

⁷Chashna cajpipish, caitaca cancunapaj allipaj huillanatajmi cani: Cancunapaj allipajca ñucaca rinatajmi cani. Ñuca mana rijpica, cushichijca cancunapajmanca mana shamungachu. Ñuca rishpamari paitaca cachasha.

⁸Chai Espíritu shamushpaca cai pachapaj cajcunataca juchayuj cashcatami yuyachinga. Taita Diosca cashcata ruraj cashcata, paica imalla rurashcata ricuchishpa llaquichina cashcatapishmi yuyachinga.

⁹Juchayuj cashcata yuyachinaca, ñucata mana crishcamanta, jucha cashcata yuyachinami.

¹⁰Cashcata ruraj nishcaca, ñuca Yayapajman rijpi cancuna ñucata ña mana ricunami.

¹¹Ima shina cashcata ricuchinaca, cai pachata mandajtaca jatun llaquiman rinapaj ña churashcami nisha ninmi.

¹²Cancunata yachachinataca achcata charinirajmi. Ashtahuanpish cunanca mana tucuita entendi tucunguichijchu.

¹³Imatapish chaitataj huillaj Taita Diospaj Espíritu shamushpami, cancunataca ima shina cashcatataj yachachinga. Paipaj quiquin yuyaimantaca mana rimangachu. Ashtahuanpish tucui imalla uyashcatami rimanga. Shamuj punllacunapi imalla tucuna cashcatapishmi yachachinga.

¹⁴Jucha illaj Espíritu shamushpaca ñuca yachachicushcamanta japishpami tucui ima shinalla cashcata yachachishpa ñucataca jatunyachinga.

¹⁵Ñuca Yaya tucui charishcacunaca ñucapajmi. Chaimantami jucha illaj Espirituca ñuca yachachicushcamanta japishpa cancunataca tucuita yachachinga nircani.

¹⁶Ashacama ñucataca mana ricunguichijchu. Chai q'uipaca cutin ashacama ricunguichijmi. Ñucaca Yayapajmanmi rigrini — nijpimi,

¹⁷paipaj yachacujcunamanta maijancunaca caishuj chaishuj cashna ninacurca: — “Ashacama ñucataca ña mana ricunguichijchu. Chai q'uipaca cutin ñucataca ricunguichijmi. Ñucaca ñuca Yayapajmanmi rigrini” nishpaca ¿imatataj nisha ninchu imamí?

¹⁸Chai ashacama nishcatamari mana entendinchij ¿imatataj nisha ninchu imamí? — nircacuna.

¹⁹Jesusca paicuna tapushun yuyacushcata yachashpami cashna nirca: — “Ashacama ñucataca mana ricunguichijchu, chai q'uipami cutin ñucataca ashacama ricunguichij” ¿nishcatachu cancunapura tapunacucunguichij imamí?

²⁰Cashnatajmi tucunga: Cancunaca huacanguichijmi, achcatami llaquiringuichij. Ashtahuanpish cai pachapaj cajcunaca cushicungacunami. Chashna llaquilla cajpipish, cancunapaj llaquica cushicuimanmi tigranga.

²¹Shuj huarmica huachana pajtajpi huachacushpaca achcatami nanachin. Huahuata huachashca q'uipaca chai nanaita ña mana yuyarinchu, cai pachapi huahuayuj tucushcamanta achcatami cushicun.

²²Chashnallatajmi cancunapish, cunanca llaquilla canguichij. Cutin ñuca ricuj shamujpimi, cancunaca cushicunguichij. Chai cushicuitaca, cancunamantaca pi manataj quichungachu.

²³Chai punllaca ñucataca imata mana tapunguichijchu. Chaipica ricungui cashnatajmi canga. Tucui imatapish ñucamanta Yayata mañajpica, paica cungallami.

²⁴Caicamaca ñuca Yayataca imata mana ñucallamantaca mañashcanguichijchu. Mañaichij chasquinguichijmi. Chashna cashpami cushicuihuantaj canguichij.

²⁵Caicamaca cancunamanca parlocunahuan ch'imbapurashpallami parlarcani. Ña mana parlocunallahuan ch'imbapurashpa huillanami chayamucun. Chaimanta ñuca Yayamantaca cancunamanca allitajmi huillasha.

²⁶Chai punllapica, ñuca Yayata cancunamanta mañashami mana ninichu. Ashtahuanpish cancunamari ñucallamanta ñuca Yayataca mañanguichij.

²⁷Ñucataca Taita Diospajmanta shamushcata crishpa, ñucata c'uyashcamantami cancunataca ñuca Yayallataj c'uyan.

²⁸Ñuca Yayapajmantami cai pachamanca shamurcani. Cai pachata saquishpa, ñuca Yayapajmanmi cutin tigragrini — nijpimi,

²⁹yachacujcunaca: — Cunantajca parlocunahuan ch'imbapurashpalla mana parlashpa allimari huillangui.

³⁰Quiquinca tucuita yachaj cashcamanta pi tapujta mana shuyanguichu. Chaimantami Taita Diospajmanta shamushcata cunantajca crinchij — nircacunami.

³¹Chaimi Jesusca: — ¿Cunanchu cringuichij?

³²Ñucallata saquishpa, cancuna maita ri tucushcata, caita chaita rinami chayamucun. Chaica ñami chayamun. Chashna rurajpipish mana ñucallachu cani, Yayaca ñucahuanmari.

³³Ñucahuan shujlla cashpa sumaj causaita charichunmi, caicunataca rimarcani. Cancunaca cai pachapica llaquita apanguichijmi. Shina cajpipish cai pachata mandajtaca ñami misharcani, ñucapi shunguta churaichijlla — nircami.