Read Chimborazo Highland Quichua JUAN 17 Bible Online

JUAN 17 - Chimborazo Highland Quichua bible

JUAN 17

¹Caicunata nishca q'uipami, Jesusca jahua pachata huichilla ricushpa cashna nirca: — “Yayitu, ñucata jatunyachina ñami chayamushca. Quiquinta jatunyachingapaj, ñucata jatunyachihuai.

²Quiquinca ñucataca cai pachapi tucui causajcunata mandaj cachunmi churarcangui. Maijanllata quiquin ñucaman cushcacunamanca tucuicunaman huiñai causaita cuchunmi ñucamanca curcangui.

³Huiñai causaita charinapajca: Quiquinlla shujlla Taita Diostaj cashcata crina. Jesucristotapish quiquin cachajpi shamushca cashcata crinami.

⁴Ñucaca cai pachapica tucui quiquin ima nishcata rurashpami quiquintaca jatunyachini.

⁵Cunanca Yayitu, cai pacha manaraj tiyajpi, ima shinami ishquindij sumaj, tucuita rurai tucuj carcanchij, chashnallataj cunanpish quiquinpaj c'uchupi tucuita rurai tucuj cashcata ñucataca ricuchihuai.

⁶Cai pachapi causajcunamanta agllashpa ñucaman cushcacunamanca quiquin ima shina cashcatami huillarcani. Paicunaca quiquinpajmi carca. Quiquinpaj Shimitapish cazurcacunami.

⁷Paicunaca cunanca ñuca imalla charishcacunataca quiquin ñucaman cushcatami yachancuna.

⁸Quiquin ñucata huillai nishcacunatami paicunamanca huillarcani. Paicunaca chasquircacunami. Ñucataca quiquinpajmantataj shamushcatami yacharcacuna. Quiquin cachajpi shamushcatapish crircacunami.

⁹Ñucaca paicunamantami mañacuni. Cai pachapaj cajcunamantaca mana mañanichu. Ashtahuanpish quiquin ñucaman cushcacunaca, quiquinpaj cajpimi paicunamanta mañacuni.

¹⁰Tucui ñucapaj cajca quiquinpajmi, tucui quiquinpaj cajca ñucapajmi. Chaimantami paicunamanta jatunyachishca cani.

¹¹Ñucaca ña mana cai pachapichu cagrini. Paicunaca cai pachapirajmi saquirigrin. Ñucaca quiquinpajmanmi shamugrini. Jucha illaj Yayitu, ima shinami quiquinpish ñucapish shujlla canchij, chashnallataj paicunapish shujlla cachun. Quiquin ñucaman cushcacunataca quiquin tucuita rurai tucuj cashcahuan huaquichihuai.

¹²Paicunahuan cai pachapi cashpaca, quiquin ñucaman cushcacunataca quiquinpaj maquipimi huaquichircani. Paicunaca shujllapish mana chingarircachu. Quillcachishcapi nishca pajtachunmi, chai chingarina cashca runalla chingarirca.

¹³Cunanca ñucaca quiquinpajmanmi tigragrini. Ñuca cushicushca shinallataj paicunapish cushicuchunmi cai pachapi cashparaj chashna nini.

¹⁴Ñucaca paicunamanca quiquin huillai nishcatami huillarcani. Ima shinami ñucaca mana cai pachapaj cani, shinallatajmi paicunapish mana cai pachapaj. Chaimantami cai pachapaj cajcunaca paicunataca p'iñancuna.

¹⁵Cai pachamanta paicunata anchuchichunca mana mañanichu, ashtahuanpish millaimanta huaquichichunmi mañani.

¹⁶Ima shinami ñucaca mana cai pachapaj cani, chashnallatajmi paicunapish mana cai pachapaj.

¹⁷Cambaj Shimica manataj llullajchu: Chaita uyajcunataca cambaj mana llullahuan cambajllata rurapai.

¹⁸Ima shinami ñucataca cai pachapi causajcunaman huillachun cacharcangui. Chashnallatajmi ñucapish cai pachapi causajcunaman huillachun paicunataca cachani.

¹⁹Paicunapish cambaj manataj llullapi shujlla tucuchunmi, ñucallataj canman curini.

²⁰Paicunallamanta mana mañanichu. Paicuna huillajpi, q'uipata ñucata crina cashcacunamantapishmi mañani.

²¹Paicunaca tucuicuna shujlla cachunmi mañacuni. Ima shinami can Yayapish ñucahuan, ñucapish can Yayahuan shujlla canchij, chashnallataj paicunapish ñucanchijhuan shujlla cachunmi mañacuni. Chashna cajpimi ñucataca cai pachapi causajcunaca, can cachashca cashcata cringacuna.

²²Ima shinami ñucanchij shujlla canchij, chashnallataj paicunapish shujlla cachunmi, can ñucaman cushca rurai tucunataca paicunamanpish curcani.

²³Paicunaca pi mana juchachipaj shuj shinalla cachunmi, paicunahuan shujlla cani. Canhuan ñucahuanpish shujllami canchij. Chashna cajpimi cai pachapaj cajcunaca, ñucataca can cachashca cashcata yachangacuna. Ñucata ima shina c'uyaj shinallataj paicunatapish c'uyashcatami yachangacuna.

²⁴Ñuca Yayitu, can cushca ñucata catijcunaca, can ñucaman cushca rurai tucunata ricuchun, ñuca maipimi cani paicunapish chaipi cachunmi munani. Canca cai pachata manaraj rurashpami ñucataca c'uyarcangui.

²⁵Cashcata ruraj Yayitu, cai pachapaj cajcunaca cantaca mana rijsircacunachu, ashtahuanpish ñucaca rijsinimi. Ñucapaj cajcunapish can ñucata cachashcataca rijsincunami.

²⁶Ñucaca quiquin ima shina cashcatami ricuchircani. Ashtahuan ricuchishpa caticushallami. Can ñucata c'uyashca c'uyaica paicunapi cachunmi ñucaca paicunahuan shujlla cani” nircami.