Read Chimborazo Highland Quichua JUAN 18 Bible Online

JUAN 18 - Chimborazo Highland Quichua bible

JUAN 18

¹Jesusca chashna mañashca q'uipaca paipaj yachacujcunandij chaimanta rishpami, Cedrón yacuta ch'imbashpa chaipi tiyaj huertaman paipaj yachacujcunandij yaicurca.

²Tauca cutinmi Jesusca paipaj yachacujcunandij chai huertapi tandanacuj carca. Chaimi Jesusta huañuchichun cuj Judaspish chaitaca rijsirca.

³Chaimi Judasca, curacunata mandajcuna, fariseocunapish cachashca achca soldadocunatapish, Taita Diospaj huasita cuidajcunatapish pushashpa shamurca. Paicunaca linternacunahuan, nina sindicunahuan, macanacunatapish apashcami shamurcacuna.

⁴Jesusca tucui imalla tucuna cashcata ña yachashcamantami, pairaj c'uchuyashpaca: — ¿Pitataj mashcacunguichij? — nijpi,

⁵paicunaca: — Nazaretmanta Jesustami mashcacunchij — nijpi, Jesusca: — Ñucami cani — nirca. Paita japichij Judaspish paicunahuanmi carca.

⁶“Ñucami cani” nijpica, siquiman tigrashpami allajman urmarcacuna.

⁷Jesusca cutinmi: — ¿Pitataj mashcacunguichij? — nijpi paicunaca: — Nazaretmanta Jesustami mashcacunchij — nircacuna.

⁸Chaimi Jesusca: — Ñami cancunamanca ñucami cani nircani. Ñucata mashcacushpaca, ñucahuan cajcunataca richun saquichij — nirca.

⁹“Ñuca Yaya ñucaman cushcacunataca, shujllatapish mana chingachircanichu” nishpa ñaupaman nishca pajtachunmi, chashnaca nirca.

¹⁰Shina nicujpi Simón Pedroca, curacunata mandajpajta rurajtami, espadata huaquichinamanta surcushpa, alli lado rinrinta p'itirca. Chai servijca, Malco shutimi carca.

¹¹Chashna rurajpimi Jesusca, Pedrotaca: — Cambaj espadata huaquichinapi churai. Ñuca Yaya cushca copataca ¿manachari ubyachun ningui? — nirca.

¹²Chaipica, achca soldadocunapish, soldadocunata mandajpish, judiocuna cachashcacunapishmi Jesusta japishpa huatarcacuna.

¹³Ña huatashpaca Jesustaca Anaspajmanrajmi pusharcacuna. Anasca Caifaspaj suedromi carca. Caifasca chai huataca curacunata mandaj curami carca.

¹⁴Caifasmi judiocunamanca, cai llajtapi causajcunamantaca, shuj runalla huañunami alli canga nishca carca.

¹⁵Simón Pedroca, shuj yachacujndijmi, Jesusta catishpa rirca. Pedrohuan rij yachacujca, curacunata mandajpaj rijsishcami carca. Chashna cashpami curacunata mandajpaj huasi canllaman Jesusta catishpa yaicurcalla.

¹⁶Pedroca huasi canllaman yaicuna pungu huashallapimi saquirirca. Chaipi cajpimi, curacunata mandajpaj rijsishca yachacujca cutin llujshishpa pungupi cuidacuj huarmihuan rimashpa Pedrotaca yaicuchirca.

¹⁷Pedro yaicujpica pungupi cuidacuj huarmica: — ¿Manachu canpish chai runapaj yachacuj cangui? — nijpi Pedroca: — ¡Mana chaichu cani! — nirca.

¹⁸Servijcunapish, Taita Diospaj huasita cuidajcunapish chiri cajpimi ninata japichishpa, cunushpa shayacurcacuna. Pedropish paicunahuanmi cunushpa shayacurca.

¹⁹Curacunata mandajmi Jesustaca, paipaj yachacujcunamantapish, pai imata yachachicushcamantapish tapurca.

²⁰Chaimi Jesusca: — Ñucaca cai pachapi causajcunamanca tucuicunapaj ñaupajpimi yachachircani. Sinagogapi, Taita Diospaj huasipi, maipi tucui judiocuna tandanacunpimi punllanta yachachircani. Pacallaca imata mana yachachircanichu.

²¹¿Ima nishpataj ñucataca tapungui? ñuca yachachishcacunataca uyajcunata tapui. Paicunami ñuca imata nishcataca yachancuna — nircami.

²²Jesús chashna nijpica, Taita Diospaj huasita cuidajcunamanta shujmi: — ¿Curacunata mandaj cura tapujpichu chashna cutichingui? — nishpa shujta ch'ajyachirca.

²³Chaimi Jesusca: — Ima mana allita rimashca cajpica, chaita ricuchi. Allillatataj rimashca cajpica ¿imamantataj ñucataca huajtangui? — nirca.

²⁴Chai q'uipami Anasca Jesustaca huatashcallatataj, curacunata mandaj Caifaspajman cacharca.

²⁵Chaicamaca Pedroca chaillapitaj cunushpa shayacujpimi: — Canpish ¿manachu chai runapaj yachacujcunapuramanta cangui? — nishpa tapujpi Pedroca: — ¡Ñucaca mana chaichu cani! — nirca.

²⁶Chashna nishca q'uipaca curacunata mandajpajta rurajcunamanta shujmi cutin Pedrotaca: — Cantaca ñucaca chai runahuan huertapi cajtamari ricurcani — nirca. Chai runaca rinrinta Pedro p'itishcapaj familiami carca.

²⁷Chaimi Pedroca: Mana ñucachu cashca casha nicujpica ñapish galloca cantarcallami.

²⁸Tutamanta utcatami Jesustaca Caifaspaj huasimanta, Pilato mandashpa tiyana ucuman pushashpa rircacuna. Pascua micuita micunapaj, mana mapayashun nishpami, paicunaca, chai ucumanca mana yaicurcacuna.

²⁹Chaimantami Pilatoca canllaman llujshishpa: — Cai runataca ¿imata juchachishpataj apamunguichij? — nijpi,

³⁰paicunaca: — Ima millaita mana ruraj cajpica, cambajmanca mana pushamunchijmanchu carca — nircacuna.

³¹Chaimi Pilatoca: — Shinashpaca, cancunallataj paita pushashpa, cancunapaj Mandashcapi nishca shina tapushpa imatapish nichijlla — nirca. Chashna nijpi judiocunaca: — Ñucanchijca maijanta huañuchinapaj mandashcatamari mana charinchij — nircacuna.

³²Paicuna chashna nishpaca, Jesús ima shina pai huañuna cashcata ñaupaman huillashca pajtachunmi chashna nircacuna.

³³Pilatoca pai mandashpa tiyana ucuman cutin yaicushpami, Jesusta cayashpaca: — ¿Canca judiocunata jatun Mandajchu cangui? — nijpi,

³⁴Jesusca: — ¿Canca cambaj yuyaillamantachu chashna ningui, mana cashpaca shujtajcunachu canmanca chashna huillarca? — nirca.

³⁵Chaimi Pilatoca: — ¿Ñucaca judiochari caniyari? Cambaj llajta runacuna, curacunata mandajcunami ñucapajmanca pushamuncuna. ¿Imatataj rurarcanguiyari? — nircami.

³⁶Chaimi Jesusca: — Ñuca mandaj canaca mana cai pachamantachu. Ñuca mandana cai pachamanta cajpica, judiocunapaj maquipi ama entregachun, ñucapajta rurajcunaca macanacunmanmi. Ñuca mandanaca, mana cai pachamantachu — nirca.

³⁷Chaimi Pilatoca: — Shinashpaca canca ¿jatun Mandajchu cangui? — nijpi, Jesusca: — Canllatajmari ñucataca jatun Mandaj ningui. Ñucaca chaipajllatajmi cai pachaman shamushpa huacharircani. Mana llullata huillangapajmi shamurcani. Ñuca huillashcataca mana llullapaj cajcunallami uyancuna — nirca.

³⁸Chaimi Pilatoca: — ¿Mana llullaca imatagari? — nirca. Jesusta chashna tapushca q'uipami, Pilatoca canllaman cutin llujshishpa judiocunataca cashna nirca: — Ñucaca cai runapica imamanta jatunta llaquichinataca mana japinichu.

³⁹Shina cajpipish cancunaca, Pascuapica prezumanta shujta cacharichun nijcunami canguichij. Cunanca ¿judiocunapaj jatun Mandajtachu cacharichun ninguichij? — nircami.

⁴⁰Chashna nijpica: — ¡Jesustaca mana cacharichun ninchijchu! ¡Barrabastami cacharichun ninchij! — nishpami tucuicuna caparircacuna. (Barrabasca shuhuami carca).