Read Chimborazo Highland Quichua JUAN 2 Bible Online

JUAN 2 - Chimborazo Highland Quichua bible

JUAN 2

¹Chaimanta quimsa punlla q'uipami Galileapi caj Caná pueblopica cazamiento boda tiyarca. Jesuspaj mamapish chaipimi carca.

²Jesuspish, paipaj yachacujcunapish cayashca cashpami chaiman rircacuna.

³Chai cazamiento bodapica vinomi tucurishca carca. Chaimi Jesuspaj mamaca: — Vinoca ñami tucurin — nijpi,

⁴Jesusca: — Mama, ¿ima nishpataj chashnaca ningui? Ñuca ruranata callarina horasca manaraj chayamushcachu — nirca.

⁵Chaimi paipaj mamaca servijcunataca: — Pai tucui imalla nishcata ruraichij — nirca.

⁶Chaipica, yacuta churanapaj rumimanta rurashca sujta p'unducunami tiyarca. Chai p'unducunaca maijanca quimsa puñu, chuscu puñu yacutami apaj carca. Judiocunaca Taita Diospaj ñaupajpi alli ricuringapaj, maillaringapajmi chaipica yacuta charijcuna carca.

⁷Jesusca servijcunataca: — Cai p'unducunapi yacuta jundachichij — nijpimi, paicunaca jundachircacuna.

⁸Ña jundachijpimi Jesusca servijcunataca: — Cunanca ashata huishishpa, alhuajanoman cugrichij — nijpimi paicunaca cugrircacuna.

⁹Alhuajanoca, yacu vino tucushcata ashata ubyashpaca, maimanta apamushca cashcata mana yacharcachu. (Yacuta apamushpa p'undupi churaj servijcunallami yacharca). Chaimi noviota cayashpaca,

¹⁰cashna nirca: — Tucuicunamari alli vinotaraj cuncuna. Ña achcata ubyashca q'uipamari chagrushca vinotaca cuncuna. Ashtahuanpish canca alli vinotarajmari q'uipapaj charicushcangui — nirca.

¹¹Jesusca Galileapi caj Caná pueblopimi, milagrota ruranataca callarirca. Paica tucuita rurai tucuj cashcata chaipi ricuchijpimi, paipaj yachacujcunaca paita crircacuna.

¹²Chai q'uipami Jesusca, paipaj mamandij, huauquicunandij, yachacujcunandij, Capernaumman rishpa, asha punllacunata chaipi saquirircacuna.

¹³Judiocunapaj Pascua fiesta ñalla chayamucujpimi, Jesusca Jerusalenman rirca.

¹⁴Taita Diospaj huasiman Jesús yaicushpaca huagracunata, ovejacunata, palomacunata c'atucujta, cullquita cambiacujcunapish chaipi cajtami japirca.

¹⁵Taita Diospaj huasi ucupi chaita ricushpaca, huascata azotinata rurashpami azotishpa tucuicunata ovejacunandij, huagracunandij canllaman llujshichirca. Cullquita cambiajcunapaj mizacunatapish t'angashpa shitashpami, tucui paicunapaj cullquitapish pambaman tsirapashpa shitarca.

¹⁶Palomacunata c'atujcunataca: — ¡Caicunata caimanta anchuchichij! ¡Ñuca Yayapaj huasitaca ama c'atuna, randina huasita ruraichijchu! — nircami.

¹⁷Chaita ricushpami paipaj yachacujcunaca: “Cambaj huasita llaquishcamanta huañucunimi” nishpa quillcashca tiyashcata yuyarircacuna.

¹⁸Jesús chashna rurajpimi judiocunaca: — Canca ¿ima cani nishpataj chashnaca rurangui? Shinashpaca ima milagrota rurashpa ricuchiyari — nijpi,

¹⁹Jesusca: — Cai Taita Diospaj huasita urmachichij. Q'uimsa punllapica shayachishallami — nirca.

²⁰Chaimi judiocunaca: — Cai Taita Diospaj huasica, chuscu chunga sujta huatapi shayachishcami carca. ¿Canca quimsa punllallapichu shayachisha ningui? — nircacuna.

²¹Ashtahuanpish Jesusca Taita Diospaj huasita chashna nishpaca, paipaj cuerpotami nicurca.

²²Huañushcacunapaj chaupimanta causarijpimi paipaj yachacujcunaca, Jesús chashna nishcatapish, Taita Dios Quillcachishcatapish, Jesús rimashca Shimicunatapish yuyarishpa crircacuna.

²³Jesusca Pascua fiestapi Jerusalenpi cashpa achca milagrocunata rurajta ricushpami, achcacuna paita crircacuna.

²⁴Crinchijmi nijpipish paicunapaj shungu ima shina cashcata yachashcamantami Jesusca paicunahuanca mana apanacurca.

²⁵Chai gentecunapaj shungu ima shina cashcataca pi mana huillajpipish Jesusca yacharcallami.