Read Chimborazo Highland Quichua JUAN 20 Bible Online

JUAN 20 - Chimborazo Highland Quichua bible

JUAN 20

¹Semana callari tutamanta manaraj alli pacarijpimi, Magdalamanta Mariaca, Jesusta pambashca jutcuman rirca. Chaiman chayashpaca, jutcumanta rumita anchuchishcatami ricurca.

²Chaimantaca Simón Pedropajman, Jesús c'uyashca caishuj yachacujpajmanpish callpashpa rishpami paica: — Mandaj Jesustaca jutcumanta apashcacunamari. Maipichari churarcacuna, mana yachanchijchu — nirca.

³Chaimi Pedropish, caishuj yachacujpish llujshishcahuan jutcuman rircacuna.

⁴Ishquindij callpashpa rishpaca caishuj yachacujca, Pedrota mishashpami jutcumanca punta chayagrirca.

⁵Paica cumurishpa ricushpami, linsocunalla chaipi cajta ricurca. Ashtahuanpish mana yaicurcachu.

⁶Simón Pedroca, paipaj q'uipa chayashpaca jutcuman yaicujta rishpami linsocunalla chaipi cajta ricurca.

⁷Jesuspaj umata c'hungullichishca linsoca, mana caishuj linsocunahuanchu cashca carca. Pilluchishpa ch'ican churashcami cashca carca.

⁸Chai q'uipami, jutcuman punta chayaj caishuj yachacujpish yaicurca. Chaita ricushpami crirca.

⁹Quillcachishcapi nishca shina: Huañushcacunapaj chaupimanta Jesús causarinataj cashcataca, manaraj entendircacunachu.

¹⁰Chashna ricushpaca yachacujcunaca paicunapaj huasiman tigrarcallacunami.

¹¹Ashtahuanpish Mariaca jutcu c'uchupi canllallaman huacacushpami, chai jutcu ucuta cumurishpa ricurca.

¹²Chashna ricushpaca Jesuspaj cuerpota maipi churashca cashcapi ishqui angelcuna yurajlla churanata churashca shujca umaman, caishujca chaquiman tiyacujtami ricurca.

¹³Chai angelcunaca: — Huarmi ¿imamantataj huacacungui? — nijpi, chai huarmica: — Ñuca Mandaj Jesustamari apashcacuna. Paita maipi churashcatamari mana yachani — nirca.

¹⁴Shina nishcahuan tigrarishpa ricujpica, Jesusmi chaipi shayacushca carca. Ashtahuanpish paica Jesús cashcataca mana rijsircachu.

¹⁵Jesusca: — Huarmi ¿imamantataj huacacungui? ¿Pitataj mashcacungui? — nijpimi, huertata allichijmi yuyashpa chai huarmica: — Mandaj Jesusta, can apashca cashpaca, maipi churashcata huillahuai, ñuca apangapaj — nirca.

¹⁶Chaimi Jesusca: — ¡María! — nijpi, pai tigrarishpaca: — ¡Raboni! — nirca. (Raboni nishcaca: “Yachachij” nisha ninmi).

¹⁷Chaimi Jesusca: — ¡Ama ñucapi charirichu! ñuca Yayapajman manaraj huichiyanichu. Ñuca Yayapajman, cancunapaj Yayapajman, ñuca Taita Diospajman, cancunapaj Taita Diospajman huichiyagrinimi ninmi nishpa ñuca huauquicunaman huillagri — nircami.

¹⁸Chaimi Magdalamanta Mariaca, Mandaj Jesusta ricushcata, tucui pai imalla nishcacunatapish yachacujcunaman huillagrirca.

¹⁹Chai punllallataj semana callari ña tutayacujpimi, yachacujcunaca judiocunata manchashcamanta pungucunata huichcashpa tandanacushpa tiyacurcacuna. Chaipimi Jesusca paicunapaj chaupipi shayarishpaca: — ¡Sumaj causai cancunahuan cachun! — nirca.

²⁰Chashna nishpaca paipaj maquicunata, costillatapishmi ricuchirca. Yachacujcuna Mandaj Jesusta ricushpaca, yallitajmi cushicurcacuna.

²¹Jesusca cutinllatajmi paicunataca: — ¡Sumaj causai cancunahuan cachun! Ima shinami Yaya ñucata cacharca, chashnallatajmi ñucapish cancunataca cachani — nircami.

²²Chashna nishpa paicunata p'ucushpaca cashnami nirca: — Jucha illaj Espirituta chasquichij.

²³Maijanpaj juchacunata cancuna perdonajpica, Taita Diospish paitaca perdonangami. Maijanpaj juchacunata cancuna mana perdonajpica, Taita Diospish paitaca mana perdonangachu — nircami.

²⁴Ishqui huacharishca Tomasca chunga ishqui yachacujcunapuramantami carca. Paica Jesús ricurinapajca mana paicunahuanchu carca.

²⁵Tomás chayamujpica caishuj yachacujcunaca: — Mandaj Jesustami ricurcanchij — nijpimi paica: — Paipaj maquicunapi clavocuna jutcushcata mana ricushpa, ñuca dedota clavocuna jutcushcapi mana satishpa, paipaj costillapi ñuca maqui dedota mana satishpaca, mana crishachu — nirca.

²⁶Pusaj punlla q'uipami, cutin chai yachacujcunaca, Tomasndij huasi pungucunata huichcarishca tiyacurcacuna. Jesusca pungucuna huichcashca cajllapitaj yaicushpa paicunapaj chaupipi shayarishpaca: — ¡Sumaj causai cancunahuan cachun! — nirca.

²⁷Chaipimi Jesusca Tomastaca: — Cambaj dedota ñuca maqui chugripi churashpa ricui. Cambaj maquita chutashpa, ñuca costillas quinripi sati. Ama mana crij caichu, ashtahuanpish crij cairi — nijpimi,

²⁸Tomasca: — ¡Ñucata Mandaj, ñuca Taita Dioslla! — nirca.

²⁹Chaimi Jesusca: — Tomás, ñucataca ricushcallamantami canca cringui. Ñucata mana ricushpapish crijcunaca, cushichishcacunami — nirca.

³⁰Jesusca paipaj yachacujcunapaj ñaupajpica, pi mana ruraipajcunataca achcatami rurarca. Chaicunataca cai libropica mana quillcashcachu.

³¹Jesustaca Quishpichij Cristo cashcata, Taita Diospaj Churi cashcatapish crishpa paimanta huiñai causaita charichunmi cai tucui quillcataca quillcashca.