Read Chimborazo Highland Quichua JUAN 3 Bible Online

JUAN 3 - Chimborazo Highland Quichua bible

JUAN 3

¹Judiocunata mandajcunapuramanta Nicodemo shuti shuj runami tiyarca. Paica fariseomi carca.

²Paimi Jesuspajman tuta shamushpaca: — Rabí, canca ñucanchijta yachachichun Taita Dios cachajpi shamushcatami yachanchij. Taita Dios mana paihuan cajpica, pi cashpapish can rurashpa ricuchishca shinataca, mana rurai tucunchu — nirca.

³Chaimi Jesusca: — Pipish mana cutin huacharijca, Taita Dios mandacujpica mana ricungacunachu. Chashnatajmi canga — nircami.

⁴Chaimi Nicodemoca: — ¿Ima shinataj yuyaj runaca, cutin huacharingari? Cutin huacharingapajca ¿ima shinataj mamapaj huijsamanca yaicungari? — nirca.

⁵Chaimi Jesusca: — Pipish yacuhuan, Taita Diospaj Espirituhuan mana huacharijca, Taita Dios mandacujpica mana yaicui tucungachu. Chashnatajmi canga.

⁶Aichayujmanta huacharijca, aichayujmi. Pipish Espiritumanta huacharijca, espiritumi.

⁷“Cutin huacharinami cangui” nishcamantaca, ama mancharichu.

⁸Huairaca, maimantapish p'ucunllami. Huajiajta uyashpapish maimanta shamucujta, maiman ricujta mana yachanguichu. Espiritumanta maijanpish huacharijca chai shinallatajmi — nircami.

⁹Nicodemoca: — ¿Ima shinataj chashnaca canga? — nijpimi,

¹⁰Jesusca cashna nirca: — Canca, israelcunata yachachij cashca jahuachu ¿caitaca mana yachangui?

¹¹Ñucanchijca imata yachashcataca chaitatajmi huillanchij. Imata ricushcatapish chaitatajmi parlanchij. Chashna cajpipish ñucanchij huillashcataca, mana chasquinguichijchu. Chashnatajmi canguichij.

¹²Cai pachapi tiyajcunamanta huillajpipish, mana cringuichu. Jahua pachapi tiyajcunamanta huillajpicarin ¿ima shinataj cringuiyari?

¹³Jahua pachamanca pi mana huichiyarcachu. Ashtahuanpish Runa Aichayujmi jahua pachapi cashpa uriyamurca.

¹⁴Ima shinami shitashca pambapi Moisesca culebratajllata rurashpa caspipi jahuaman huarcurca. Chai shinallatajmi Runa Aichayujpish caspipi huarcushcataj cana can.

¹⁵Pipish paita crijca ama chingarishpa, ashtahuanpish huiñai causaita charichunmi chashnaca tucunga.

¹⁶Taita Diosca, cai pachapi causajcunataca yallitaj c'uyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca.

¹⁷Taita Diosca paipaj Churitaca, cai pachapi causajcunata jatun llaquiman cachachunca mana cacharcachu. Ashtahuanpish cai pachapi causajcunaca, paillamanta quishpirichunmi cacharca.

¹⁸Taita Diospaj Churita crijtaca, jatun llaquiman rina nishcaca mana cangachu. Ashtahuanpish paipaj shujlla Churita mana crijtami jatun llaquiman rinatajmi can nishca.

¹⁹Luzca cai pachamanmi shamurca. Cai pachapi causajcunaca paicunapaj rurashcacuna millai cashcamantami luztaca p'iñashpa amsata munarcacuna. Chashnami jatun llaquiman rina cashcata ricuchircacuna.

²⁰Millaita rurajcunaca, tucuicunami luztaca p'iñancuna. Paicuna rurashcacuna ama ricurichunmi luzmanca mana c'uchuyashun nincuna.

²¹Ashtahuanpish mana llullapi causacujcunaca paicuna rurashcacuna Taita Dios munashcata ruracushca tucuicunapaj ñaupajpi alli ricurichun luzman c'uchuyanllacunami — nircami.

²²Chai q'uipami Jesusca, paipaj yachacujcunandij Judea llajtaman shamurca. Paicunahuan chaipi cashpami bautizarca.

²³Juanpish, Salim pueblo c'uchupi caj Enonpimi, achca yacucuna tiyashcamanta bautizachun paipajman shamujpica bautizarca.

²⁴Chaicamaca, manaraj Juantaca carcelashcachu carca.

²⁵Chaipimi Juanpaj yachacujcunahuan, maijan judiocunahuan Taita Diospaj ñaupajpi alli ricuringapaj maillarinamanta rimanacui callarishca carca.

²⁶Paicuna Juanpajman shamushpaca: — Rabí, canhuan Jordán yacu ch'imbanijpi cajta, ñucanchijman can huillacushca runapish bautizacunmari. Tucuicunami paipajman ricuncuna — nircacunami.

²⁷Chaimi Juanca cashna nirca: — Jahua pachamanta mana cushca cajpica, runaca imata mana chasqui tucunchu.

²⁸“Ñucaca mana Cristochu cani. Paita ñaupashpa richun cachashcallami cani” nishpa ñuca huillashcataca cancunallataj yachanguichijmi.

²⁹Cazamento bodapi amigoca noviohuan cashpa novio rimajta uyashpaca achcatami cushicun. Noviaca noviopajmari, mana amigopajchu. Chashnallatajmi ñucaca noviopaj amigo shina cashpa, chashna nijta uyashpaca achcata cushicuni.

³⁰Jesusca ashtahuan alli nishca tucushpa catinatajmi. Ñucaca yangalla tucunami cani — nircami.

³¹Jahua pachamanta shamujmi, tucuita rurai tucuj. Cai pachamanta cajca, cai pachapajllami. Chaimantami cai pachapi tiyajcunallata riman. Jahua pachamanta shamujmi, tucuita rurai tucuj.

³²Paica imata ricushcata, uyashcatami huillan. Ashtahuanpish pai ricushcata huillajpipish, pi mana chasquinchu.

³³Maijanpish pai ricushcata huillajpi chasquijca, Taita Diosca mana llulla cashcatami ricuchin.

³⁴Chaimanta paica Taita Dios cachashca cashcamantami, Taita Diospaj Shimimanta riman. Taita Diosca paipaj Espiritutaca, mana medishpalla cunchu.

³⁵Yayaca Churita c'uyashpami, tucui imatapish paipaj maquipi churarca.

³⁶Maijanpish Churita crijca, huiñai causaitami charin. Ashtahuanpish Churita mana crijca, huiñai causaitaca mana charinchu. Taita Diosca paitaca p'iñacunllami.