Read Chimborazo Highland Quichua JUAN 5 Bible Online

JUAN 5 - Chimborazo Highland Quichua bible

JUAN 5

¹Chashna rurashca q'uipami Jesusca Jerusalenpi Taita Diosta adorangapaj judiocuna tandanacushcaman rirca.

²Jerusalenpica, Ovejacunata yaicuchina pungu c'uchupimi, shuj cucha tiyan. Chai cuchaca, hebreo rimaipica, Betesda shutimi. Chai cucha c'uchupica pichca corredorcunami tiyan.

³Chai corredorcunapica achca ungushcacunami mana ricujcuna, cojocuna, mana cuyurijcunapish yacu cuyurijta shuyacurcacuna.

⁴Shuj angelmi yacuta cuyuchinaman huaquin huaquinllapi uriyamuj carca. Yacuta cuyuchijpi maijanpish cuchaman punta huashicujmi, ima ungüimantapish alliyaj carca.

⁵Chaipica, shuj runami quimsa chunga pusaj huatacunata ungushca carca.

⁶Jesusca pai siricujta ricushpami, achca huatacunata ungushca cashcata yachashcamanta: — ¿Alliyasha ninguichu? — nijpi,

⁷ungushca runaca: — Amito, yacu cuyurijpi ñucata yacuman uriyachijca pi mana tiyanchu. Ñuca yaicusha ningacamaca, shujtajrajmari mishashpa yaicunlla — nirca.

⁸Chaimi Jesusca: — Jatari, can mantashpa siricushcata apashpa ri — nirca.

⁹Chashna ninca, chai runa alliyashpaca, pai mantashpa siricushcata apashpa rircallami. Chai punllaca samana punllami carca.

¹⁰Aparishpa ricujpimi judiocunaca chai alliyashca runataca: — Samana punllamari, mandashcapi nishca shinaca can siricushcataca mana aparishpa rina punllachu — nircacuna.

¹¹Chaimi chai runaca: — Ñucata alliyachijmari: “Can mantashpa siricushcata aparishpa rilla” nirca — nishpa huillajpica:

¹²— “Can mantashpa siricushcata aparishpa rilla” nijca ¿pitagari? — nishpami tapurcacuna.

¹³Alliyachishca runaca achcacuna chaipi cashcamanta, Jesuspish chaimanta ña llujshishpa rishcamanta, paita alliyachijca pi cashcata mana yachashpa judiocunamanca imata mana ni tucurcachu.

¹⁴Chai q'uipami Jesusca, chai runataca Taita Diospaj huasipi tupashpa: — Riqui, cunanca ñamari alli cangui. Cutinca millaita ama rurangui. Ñataj caita yalli ashtahuan jatun llaqui tucunguiman — nirca.

¹⁵Chaimi chai runaca, ñucata alliyachijca Jesusmari cashca nishpa judiocunaman huillagrirca.

¹⁶Samana punllapi alliyachishca cashcamantami judiocunaca, p'iñarishpa Jesustaca ima shinapish huañuchinata yuyacurcacuna.

¹⁷Chaimi Jesusca: — Ñuca Yayaca, trabajanataca mana saquinchu. Ñucapish trabajanataca mana saquinichu — nirca.

¹⁸Samana punllapi ungushcata alliyachishpa mana cazushcallamantaca mana carcachu. Taita Dios shina tucushpa Taita Diostapish ñuca quiquin Yayami nishcamantami judiocunaca ima shinapish huañuchinata yuyarcacuna.

¹⁹Shina nishcamanta cutichishpami Jesusca paicunataca: — Churi cashpapish pai quiquin yuyaillamantaca imata mana rurai tucunchu. Ashtahuanpish Yaya imallata rurajta ricushpami, Yaya rurashca shinallataj Churipish ruran. Chaica chashnatajmi.

²⁰Yayaca paipaj Churitaca c'uyanmi. Chaimantami Churimanca tucui imallata pai ruracushcataca ricuchin. Chaimanta cunan ruracushcacunamanta yallitapishmi rurachishpa cancunamanca ricuchinga. Chaita ricushpaca cancunaca mancharinguichijmi.

²¹Ima shinami Yayaca, huañushcacunataca causaita cushpa causachin, chashnallatajmi Churipish pai cusha nishcacunaman causaita cun.

²²Cai pachapi causajcunataca Yayaca pita paicuna imalla rurashcacunataca mana ricunchingachu. Imalla rurashcacunata ricuchichunca paipaj Churimanmi tucuita curca.

²³Tucuicuna Yayata jatunyachij shinallataj, paipaj Churita jatunyachichunmi paiman curca. Pipish paipaj Churita mana jatunyachijca, paita cachaj Yayatami mana jatunyachin.

²⁴Pipish ñuca shimita uyashpa, ñucata cachaj Yayata crijca huiñai causaitami charin. Huañushca cashpapish huiñai causaiman ch'imbashca cashcamanta jatun llaquimanca manataj ringachu. Chaica chashnatajmi.

²⁵Taita Diospaj Churi rimashcata huañushcacuna uyana chayamunmi. Chaica cunanmari. Paita uyajcunaca causangacunami. Chaica chashnatajmi.

²⁶Yayaca paillapitajmi causaita charin. Shinallatajmi Churimanpish, paillapitaj causaita charichun curca.

²⁷Runa Aichayuj cajpimi, tucuicuna imalla rurashcata ricuchinatapish paiman curca.

²⁸Chashna nishcamanta ama mancharichijchu. Tucui pambashcacuna Runa Aichayuj rimashcata uyana chayamucunmi.

²⁹Chaipica allita rurajcunaca, huiñaita causangapajmi causaringacuna. Ashtahuanpish mana allita rurajcunaca, jatun llaquiman ringapajmi causaringacuna.

³⁰Ñucaca ñuca yuyaillamantaca imata mana rurai tucunichu. Alli cashcata, mana alli cashcata ima shina ricuchinataca ñuca Yaya ricuchichun mandashca shinami ricuchini. Chaimanta alli cashcata mana alli cashcata ñuca ricuchishcaca mana pandachu. Ñuca munaita ruranataca mana mashcanichu. Ashtahuanpish ñucata cachaj Yayapaj munaitami rurani.

³¹Ñucallamantataj huillarijpica, ñuca huillarishcaca yangallami canman.

³²Shujtajmi ñucamantaca huillacun. Pai ñucamanta huillashcaca mana llullachu.

³³Cancunaca ñuca pi cashcata tapuchunca Juanpajmanmi cacharcanguichij. Paica mana llullashpami ñucamantaca huillarca.

³⁴Shujtajcuna ñuca pi cashcata huillachunca mana ninichu. Cancuna quishpirichunllami, Juan ñucamanta huillashcataca yuyachini.

³⁵Juanca nina sindi shinami achijyachirca. Cancunaca paipaj luzpimi ashacama cushicurcanguichij.

³⁶Ñuca Yaya rurai nishcatami ñucaca ruracuni. Chaita ñuca rurashcacunallatajmi Juan huillashcatapish yalli ñucataca ñuca Yaya cachashca cashcata ricuchicun.

³⁷Ñucata cachaj Yayapish ñucamantaca huillarcami. Pai rimashcataca manataj uyashcanguichijchu. Pai ima shina cajtapish manataj ricushcanguichijchu.

³⁸Ñuca Yaya ñucata cachashcata mana crishcamantami, paipaj Shimicunapish cancunapaj shungupica mana saquirin.

³⁹Quillcachishcacunata yachashpami huiñai causaita charishun yuyanguichijmi. Chai Quillcallatataj callarishpa alli ricuichij. Chai Quillcachishcacunaca ñucamantamari huillacun.

⁴⁰Chashna cajpipish huiñai causaita charingapajca, manamari ñucapajman shamushun ninguichijchu.

⁴¹Runacunalla alli nichunca mana munanichu.

⁴²Cancunataca allimi rijsini. Taita Diospaj c'uyaitaca mana charinguichijchu.

⁴³Ñucaca ñuca Yaya cachajpimi shamurcani, mana chasquishun ninguichijchu. Maijanpish manapish cachajpi shamujtarajmi chasquinguichijlla.

⁴⁴Caishuj chaishuj alli nishca canallatami cancunaca munanguichij. Shujlla Taita Dios alli nishca canataca mana munanguichijchu. Chashna yuyashpaca ¿ima shinataj ñucataca cri tucunguichigari?

⁴⁵Ñuca Yayapaj ñaupajpi cancunata ñuca juchachishpa huillana cashcataca ama yuyaichijchu. Shujtajmari juchachij tiyan. Cancuna shunguta churashca Moisesmari juchachicun.

⁴⁶Moisesca ñucamantami quillcarca. Pai quillcashcata crishpaca, ñucatami cringuichijman.

⁴⁷Pai quillcashcacunata mana crishpaca ¿ima shinataj ñuca huillashcataca cringuichigari? — nircami.