Read Chimborazo Highland Quichua HECHOS 11 Bible Online

HECHOS 11 - Chimborazo Highland Quichua bible

HECHOS 11

¹Mana judiocunaman Taita Diospaj Shimita huillajpi paicunapish chasquishcatami apostolcunapish, Judeapi causaj tucui crijcunapish uyarcacuna.

²Chaimantami Jerusalenman Pedro huichiyajpica, circuncisionta rurashcacunaca Pedrohuanca,

³cashna rimanacurcacuna: — ¿Ima nishpataj circuncisionta mana rurashca runacunapaj huasiman yaicushpa, paicunahuan micurcangui? — nijpimi,

⁴Pedroca, tucui imalla tucushcata callarishpa cashna huillai callarirca:

⁵— Ñucaca Jope pueblopi cashpami, Taita Diosta mañacurcani. Chaipimi muscuipi shina cashnata ricurcani: Shuj jatun linsota chuscu puntapi huatashca shinami, ñuca tiyacunman jahua pachamanta uriyamurca.

⁶Chaita ñuca alli ricushpaca, chai linsopica chuscu chaquihuan purij animalcunata, manchanana animalcunata, huijsahuan purij animalcunata, jahuata purij pajarocunatapishmi ricurcani.

⁷Chaita ricucujpica: “Pedro, jatari, huañuchishpa micui” nishpa rimajtami uyarcani.

⁸Chaimi ñucaca: “Mana, Mandaj Jesús, imapish mana micuna cashcata, mapami nishcacunataca manataj micushcanichu” nircanimi.

⁹Chaipimi chai rimajllataj jahua pachamanta cutin rimashpaca: “Taita Dios chuyayachishcataca, canca ama mapami nichu” nirca.

¹⁰Chashnata quimsa cutin ricuchishpaca, chai linsotaca jahua pachallamantajmi aparca.

¹¹Chaita ricushca q'uipaca ñapish ñuca pozacun huasimanca quimsa runacuna chayarcallami. Paicunataca Cesareamantami ñucapajman cachashca carca.

¹²Chaipica Taita Diospaj Espiritumi rishachu manachu risha ama yuyashpa paicunahuan rilla nirca. Cai sujta huauquicunandijmi chai runapaj huasimanca rircani.

¹³Paica, paipaj huasipi shuj ángel ricurishpa cashna nishcatami parlarca: “Pedro nishca Simonta Jope pueblomanta pushanaman cachai.

¹⁴Paimi canpish, cambaj familiacunapish ima shina quishpirina cashcata huillanga” nircami, nishpami parlarca.

¹⁵Paicunaman ñuca huillai callarijpica, callaripi ñucanchijpaj jahuaman, jucha illaj Espíritu shamushca shinallatajmi paicunapaj jahuamanpish shamurca.

¹⁶Chaimantami Mandaj Jesusca: “Juanca yacullapimi bautizarca, ashtahuanpish cancunaca jucha illaj Espiritupimi bautizashca canguichij” nishcata yuyarircani.

¹⁷Mandaj Jesucristota ñucanchij crijpi Taita Diosca paipaj Espirituta cushca shinallatajmi paicunamanpish curca. Taita Dios chashna rurajta jarcangapajca ñucaca ¿imataj caniyari? — nircami.

¹⁸Chaita paicuna uyashpaca, tucuicuna upallashpami Taita Diostaca cashna nishpa jatunyachircacuna: — ¡Taita Diosca mana judiocunamanpish mana allita ruracushcata saquishpa paiman cutirina yuyaita cushpami paicunamanpish huiñai causaita cushca! — nircacunami.

¹⁹Estebanta huañuchishpaca, caishuj crijcunatapish llaquina yuyailla llaquichishpa catijpimi, caita chaita rircacuna. Paicunaca Feniciaman, Chipreman, Antioquiacamami rircacuna. Paicuna chai llajtacunaman rishpaca shujtajcunamanca alli huillaitaca mana huillashpa, judiocunallamanmi huillarcacuna.

²⁰Paicunapurapi maijancunaca Chipremanta, Cirenemantami carcacuna. Paicuna Antioquiaman chayashpaca, griegocunamanpishmi, Mandaj Jesusmanta alli huillaita huillarcacuna.

²¹Jatun Diospaj tucuita rurai tucuj maqui paicunahuan cajpimi, achcacuna Mandaj Jesusta crishpa ñaupa causaita saquircacuna.

²²Jerusalenpi tandanacushca crijcuna tucui chaicunata yachashpaca, Bernabetami Antioquiacama richun cacharcacuna.

²³Pai chaiman chayashpaca, Taita Diosca mana c'uyaipajta c'uyashcata ricushpaca achcatami cushicurca. Chaimantami paicunataca Mandaj Jesuspi shunguta churashpa paita catina yuyailla catichun nishpa ashtahuan catina yuyaita curca.

²⁴Bernabeca alli shungu, jucha illaj Espirituhuan junda, Mandaj Jesusta tucui shunguhuan crijmi carca. Chashna cashpa huillajpimi achcacuna Mandaj Jesushuan shujlla tucurcacuna.

²⁵Achcacuna crijpimi Bernabeca, Tarsopi Saulota mashcanaman rirca. Paita japishpaca, Antioquiamanmi pusharca.

²⁶Chaipica huata jundatami achcacunata yachachishpa tandanacushca crijcunahuan causarcacuna. Jesusta catijcunataca chai Antioquiapimi caicunaca Cristota catijcunami ninata callarircacuna.

²⁷Chai punllacunapimi Jerusalenmanta maijan profetacuna, Antioquiaman uriyamurcacuna.

²⁸Paicunapuramanta Agabo shuti runa shayarishpami, Taita Diospaj Espíritu huillachijpi, tucui cai pachapi causajcunapajca jatun yaricai tiyana cashcata huillarca. (Chaica, Claudio mandacui punllacunapimi chashna tucurca.)

²⁹Chashna cajpimi Jesusta catij Antioquiapi cajcunaca paicuna imallata cui tucushcata Judeapi causaj crijcunaman ayudashpa cachanata yuyarircacuna.

³⁰Paicuna tandachishpaca Judeapi caj cunaj yuyajcunaman cuchunmi, Bernabeman, Sauloman cacharcacuna.