Read Chimborazo Highland Quichua HECHOS 17 Bible Online

HECHOS 17 - Chimborazo Highland Quichua bible

HECHOS 17

¹Pabloca Silasndijmi Anfípolis pueblota, Apolonia pueblota rishpa, Tesalonicaman chayarcacuna. Chaipica, judiocunapaj sinagogapish tiyarcami.

²Pabloca maiman chayashpapish sinagogaman yaicuj cashpami chaipipish yaicurca. Chaipimi quimsa semanata samana punllacunapi, chaipi cajcunahuan parlanacushpaca,

³Taita Diospaj Shimi ima nicushcata paicunaman huillashpa: — Cristoca llaquita apashpa, huañushcacunapaj chaupimanta causarinatajmi carca. Cunan cancunaman huillacushca Jesusca paitajmari Quishpichij Cristoca — nishpami alli entendichirca.

⁴Chaimi tauca judiocuna crishpa Pablohuan, Silashuan tandanacurcacuna. Judío tucushpa Taita Dios yuyailla caj achca griegocunapish, alli nishca huarmicunapish achcacunami crircacuna.

⁵Chaimantami mana crij judiocunaca yallitaj p'iñarishpa q'uilla, millai maijan runacunata tandachishpa, caparichun jatarichircacuna. Chaimi Pablota, Silasta japishpa tucuicunapaj ñaupajman pushashun nishpa, Jasonpaj huasipi mashcangapaj huaicashpa yaicurcacuna.

⁶Chaipi Pablota Silasta mana japishpaca, Jasontami shujtaj crijcunandij japishpa chai pueblopi mandajcunapaj ñaupajman cashna caparinacushpa pushamurcacuna: “Cai runacunaca tucui cai pachapimari, umashpa puricuncuna. Chaipajmari caimanpish shamushca.

⁷Cai Jasonpish, paipaj huasipimi paicunataca chasquij cashca. Tucui paicunami César mandashcataca yanganchishpa: Ñucanchijpajca, shujtaj jatun mandajmi tiyan, paica Jesusmi nincuna” nircacunami.

⁸Chaita uyashpaca, tucui chaipi cajcunapish, mandajcunapish jatun bullatami rurarcacuna.

⁹Jasonpish paihuan cajcunapish paicunapaj randi cullquita saquijpica cacharircallacunami.

¹⁰Chai tutallatajmi crijcunaca Pablotapish Silastapish Berea puebloman cacharcacuna. Paicuna chaiman chayashpaca, judiocunapaj sinagogamanmi yaicurcacuna.

¹¹Bereapi causajcunaca Tesalonicapi causajcunata yalli ashtahuan alli yuyaiyujcunami carca. Chashna cashpami paicuna huillashcata alli uyashpa chashna cashcata mana chashna cashcata yachangapaj Taita Dios Quillcachishcacunataca punllanta alli ricujcuna carca.

¹²Chashna cashpami achca judiocunapish, griegocunapuramanta alli nishca huarmicunapish, achca c'aricunapish crircacuna.

¹³Tesalonicapi caj judiocunaca, Bereapipish Taita Diospaj Shimita Pablo huillacujta yachashpami chaiman rircacuna. Chaipipish achcacunatami jatarichircacuna.

¹⁴Chaimantami chai crijcunaca, Pablotaca mama cucha uriman utca cacharcacuna. Silashuan, Timoteohuanca chaillapitajmi saquirircacuna.

¹⁵Pablota saquinaman cachashcacunaca, Atenas pueblomanmi pusharcacuna. Paita saquishpa tigragrijpica: — Timoteotapish Silastapish utca caiman tandanacungapaj shamupaichij ninmi ninguichij — nishpami Pabloca cacharca.

¹⁶Pabloca Atenaspi Timoteota, Silasta shuyacushpaca, chai puebloca rurashcalla dioscunahuan junda cashcata ricushpami paipaj shungupica yallitaj llaquirirca.

¹⁷Chaimi sinagogapica judiocunahuan, judío tucushpa Taita Diosta yuyarijcunahuan rimanacurcacuna. Plazaman shamujcunahuanpish punllantami parlanacurcacuna.

¹⁸Epicúreos nishca, estoicos nishca maijan jatun yachajcunapishmi Pablohuan rimanacungapaj tandanacurcacuna. Pabloca paicunamanca Jesusmanta alli huillaitapish, huañushcacuna causarinamantapishmi huillarca. Chaimi paicunapuramanta maijancunaca: — Cai rimaricujlla runaca chashna nishpaca ¿imatashi nisha nin? — nircacuna. Shinallataj maijancunaca: — Paica mushuj dioscunamanta yachachijmari yuyachin — nircacunami.

¹⁹Chaimantami Pablotaca tucuicuna tandanacuna Areópago jatun huasiman pushashpa cashna nircacuna: — ¿Can yachachicushca mushuj yachaitaca ñucanchijpish yachai tucunchijchu?

²⁰Can yachachishcacunaca ñucanchij manaraj uyashcamari. Chaimi ñucanchijca can yachachishcacuna imata nisha nishcata yachashun ninchij — nircacuna.

²¹(Atenaspi tucui causajcunapish, shamushpalla chaipi causajcunapish imapish manaraj uyashcata parlana yuyailla, manaraj uyashcata uyana yuyaillami causarcacuna).

²²Chaimi Pabloca, Areopagopi caj tandanacushcacunapaj chaupipi shayarishpaca: — Atenas runacunalla. Cancunaca dioscunata alli yuyarijcuna cashcatami maipipish ricuni.

²³Cancunapaj pueblota puricushpaca cancunapaj dioscunata adorana altarcunatami ricurcani. Chai dioscunapaj pircashca altarcunapaj shuj altarpica: “Mana rijsishca Diospaj” nishpa quillcashcatami ricurcani. Chaitaca mana rijsishpapish adoracunguichijmi. Ñucapish chai Taita Diosmantami cancunamanca huillacuni.

²⁴“Taita Diosca cai pachata, chaipi tucui imalla tiyajcunatapish rurajmi. Jahua pachatapish, cai pachatapish rurajmi. Mandaj Diosca maitataj gentecunapaj maquihuan rurashca huasicunapica causangari.

²⁵Paica causaitapish, samaitapish tucui imatapish cuj Taita Diosmi. Chaimanta gentecuna paita alli nishpa ima cushcacunallahuanca mana cushicunchu.

²⁶Taita Diosca tucui cai pachapi mirarishpa causachunpish shuj runallatami churarca. Taita Diosllatajmi llajtacunapish maillata canata, maillapi causanatapish mandarca.

²⁷Causacushparaj Taita Diosta mashcashpa ima shinapish paihuan tupachun nishpami chashna rurarca. Chashna mashcana cajpipish Taita Diosca ñucanchijmantaca mana carupichu.

²⁸Ñucanchijca Taita Dios causaita cujpimi causanchij, purinchij, paillamantatajmi tiyanchij. Chaimantami cancunapuramanta sumaj shimicunata rimajcunapish: “Taita Diosmanta miramushcacunami canchij” nincuna.

²⁹Taita Diosmanta miramushcacuna cashpaca, Taita Diostaca curita, cullquita, rumita labrashpa gentecunapaj yuyaillamanta rurashca dios shina cana cashcataca mana yuyanachu canchij.

³⁰Ñaupa causajcunaca Taita Diosta mana rijsishcamanta paicunapaj munaita rurashpa causajpipish Taita Diosca paicunataca mana llaquichircachu. Cunanca tucuicunallataj maipi causajcuna cashpapish juchayuj cashcamanta llaquirishpa paiman cutirichunmi mandan.

³¹Taita Diosca tucui cai pachapi causajcunata paicuna ima shina cashcatataj ricuchingapajca ñami shuj punllata agllashcata charin. Tucui chaicunata rurashpa ricuchij cachunca pai agllashca runatami huañushcacunapaj chaupimanta causachishpa ricuchirca” nircami.

³²Huañushcacunapaj chaupimanta causarina nijta uyashpaca maijancunaca achcatami asircacuna. Maijancunaca: “Shujtaj punllami can huillashcataca uyashun” nircacunami.

³³Chaimi Pabloca, paicunapaj chaupimanta rircalla.

³⁴Shina cajpipish Pablo huillashcata uyashpa crishpami maijancunaca paihuan tandanacurcacuna. Chai crijcunapurapica, Areopagopi tandanacuj mandajcunapuramanta Dionisio shuti runapishmi carca. Shinallataj Dámaris shuti shuj huarmipish, shujtajcunapishmi carcacuna.