Read Chimborazo Highland Quichua HECHOS 18 Bible Online

HECHOS 18 - Chimborazo Highland Quichua bible

HECHOS 18

¹Chashna huillashca q'uipami Pabloca Atenasmanta llujshishpa Corintoman rirca.

²Chaiman chayashpaca Ponto llajtamanta caj Aquila shuti judiohuanmi tuparca. Jatun mandaj Claudiomi tucui judiocunata cai Roma llajtamanta llujshishpa richij nishca cajpi, chai Aquilaca paipaj huarmi Priscilandij Italiamanta chai ñaupalla shamushca carca. Pabloca paicunapajmanmi rirca.

³Aquila paipaj huarmindijca carpacunata ruraj cajpimi, Pablopish chaillatataj ruraj cashcamanta paicunahuan saquirirca.

⁴Pabloca samana punllacunapica sinagogaman rishpami judiocunahuanpish griegocunahuanpishparlanacushpa Jesusta catijcuna cachun yachachirca.

⁵Silasndij, Timoteondij Macedoniamanta shamujpicarin Pabloca ashtahuan Taita Diospaj Shimita huillana yuyailla tucushpami, judiocunamanca Jesusca Quishpichij Cristomi nishpa huillacurcalla.

⁶Ashtahuanpish judiocunaca p'iñarishpami mana alli shimicunata rimashpa c'amircacuna. Chaimi Pabloca pai huillashcata mana uyashun nishcata ricuchingapaj churanata chaspishpaca: — Cancunapaj juchacunamanta Taita Dios llaquichijpica cancunapaj jahuallatajmi canga. Ñucataca imata mana juchachi tucunguichijchu. Ñucaca tucui imalla huillana cashcataca huillarcanimi. Cunanca mana judiocunapajmanmi rigrini — nirca.

⁷Chai ucumanta llujshishpaca, Taita Diosta manchaj Justo shuti runapaj huasimanmi rirca. Chai huasica, sinagoga c'uchupimi carca.

⁸Sinagogapi mandaj Crispo shutipish, paipaj tucui huasi ucu familiandijmi Mandaj Jesusta crircacuna. Corintocunapish uyashpaca, achcacunami crishpa bautizarircacuna.

⁹Shuj tutami Mandaj Jesusca, Pablomanca muscuipi shina ricurishpa cashna nirca: “Ama manchaichu, ama upallashpa huillacunguilla.

¹⁰Ñucaca canhuanmi cani. Chaimanta cantaca pi imata mana rurai tucungachu. Ñucaca cai pueblopica, ñucapaj canacunataca achcacunatami charini” nircami.

¹¹Chaimi Pabloca Taita Diospaj Shimita yachachishpa, huata sujta quillata Corintopi causarca.

¹²Jatun mandaj churashca Galión Acayapi mandacui punllacunami judiocunaca, shuj yuyailla tucushpa Pablota japishpa chai mandajcunapajman pushashpaca,

¹³cashna nirca: — Cai runaca Taita Diosta adorachun nishpa yachachishpaca, mandashcapi nishca shinaca, mana yachachinchu — nircacunami.

¹⁴Pablo ña rimagrijpica Galionrajmi judiocunataca cashna nirca: — Judiocuna, cai runa ima jatun mana allita ruraj, huañuchij cajpica, mandashcapi nishca shina ñucaca cancuna huillashcata uyaimanmi carcani.

¹⁵Cai runataca shujtajta yachachishcamanta, shujtaj shuticunamanta yachachishcamanta, cancunapaj mandashcapi nishca shina mana yachachishcallamanta cajpica, ñucaca chaitaca caimi alli, chaimi alli mana nisha ninichu. Chaitaca cancunallataj ricuichijlla — nircami.

¹⁶Chashna nishpami paicunataca pai mandashpa tiyana ucumanta llujshichishpa cacharca.

¹⁷Ña chaimanta llujshishpaca tucui griegocunami sinagogapi mandaj Sostenestaca, Galión mandashpa tiyana huasi ñaupajllapitaj macarcacuna. Chashna macacujpipish Galionca imata mana nircachu.

¹⁸Pabloca Corintollapitajmi achca punllacunacama saquirirca. Chai q'uipaca crijcunata shujtaj punllacama nishpaca Priscilandij, Aquilandij Siriaman barcopi manaraj rishpami, Cencreapi ajchata rutuchirca. Taita Diospajta rurasha nishcata ña pajtachishcata ricuchingapajmi chashna rurarca.

¹⁹Efesoman chayashpaca, paicunata chaipi saquishpami, sinagogaman yaicushpa, judiocunahuan rimanacurca.

²⁰Chaimi paicunaca Pablotaca: — Paicunahuan saquirichunraj — nircacuna. Paica mana saquirisha nishpami,

²¹paicunata shujtaj punllacama nishpaca cashna nirca: — Ñucami cai shamuj fiestataca ima shinapish Jerusalenpitaj cana cani. Taita Dios munajpica, cutinmi cancunapajman tigramusha — nishpaca, Efesomantaca barcopi rircallami.

²²Cesareaman Pablo chayashpaca, tandanacushca crijcunata allillachu canguichij ningapajmi, Jerusalenman rirca. Chai q'uipaca Antioquiamanmi rirca.

²³Chaipi asha punllacunata cashca q'uipaca Galacia, Frigia llajtacunatami, callarishpa chaipi causaj Jesusta caticujcunata ashtahuan alli catina yuyaita curca.

²⁴Chai punllacunallatajmi Alejandriamanta caj Apolos shuti judío runa Efesoman shamurca. Paica alli rimanata yachaj, Dios Quillcachishcacunatapish alli yachajmi carca.

²⁵Paica, Jatun Dios munashca shina causanatapish alli yachachishcami carca. Chashna cashpami Juan bautizashcallata yachashpapish, tucui shunguhuan Mandaj Jesusmanta alli huillashpa yachachirca.

²⁶Chashna cashpami Apolosca sinagogapica, mana manchashpa huillai callarirca. Priscilapish, Aquilapish, Apolos huillashcata uyashpaca, paillata ch'ican pushashpami, Jatun Diospaj Shimimantaca alli yachachircacuna.

²⁷Acayaman Apolos risha nijpica, Efesopi causaj crijcunaca paiman ayudashpa, Acayapi causaj crijcuna paita alli chasquichunpish shuj quillcatami cacharcacuna. Chaiman pai chayashpaca, Taita Diosca mana c'uyaipaj cajpipish c'uyajpi cunanlla crishcacunata yachachishpami paicunapaj achca allita rurarca.

²⁸Judiocunataca paicuna pandarishpa mana entendicushcata ricuchishpami tucuicunapaj ñaupajpi Dios Quillcachishcata alli ricuchishpa Jesucristomi Quishpichij nishpa alli entendichirca.