Read Chimborazo Highland Quichua HECHOS 19 Bible Online

HECHOS 19 - Chimborazo Highland Quichua bible

HECHOS 19

¹Corintopi Apolos cajpirajmi, Pabloca jahua llajtacunata rishpa Efesoman chayarca. Chaipimi maijan crijcunahuan tupashpaca,

²cashna nirca: — Cancuna crishpaca ¿jucha illaj Espirituta chasquircanguichijchu? — nijpi paicunaca: — Jucha illaj Espíritu tiyashcataca mana uyashcanchijllapishchu — nircacuna.

³Chaimi Pabloca: — ¿Ima bautizmopitaj bautizashca canguichij? — nijpi, paicunaca: — Juanpaj bautismollapimi bautizarircanchij — nircacuna.

⁴Chaimi Pabloca: — Juanca Diosman cutirijpimi bautizarca. Chaipica paica, paipaj q'uipa shujtaj shamunata, paita crina cashcatami huillarca. Chashna nishpaca Quishpichij Cristo Jesusmantami chashnaca — nirca.

⁵Caita uyashpaca, Mandaj Jesuspaj shutipimi bautizarircacuna.

⁶Chai q'uipaca paicunapaj jahuapi maquita Pablo churajpimi, jucha illaj Espíritu paicunapaj jahuaman shamujpi, paicunaca shujtaj rimaicunapi rimarcacuna, Taita Dios huillachishcatapish huillarcacuna.

⁷Chaicunaca chunga ishqui runacuna shinami carca.

⁸Chai pueblopi cashpaca Pabloca quimsa quillatami, sinagogaman purirca. Chaipica Taita Dios mandacujta paicunapish crichunmi tucuicunaman mana manchashpa alli huillarca.

⁹Chashna huillajpipish maijancunaca rumi shungu tucushpami mana crircacuna. Chaimi Jesusmanta huillashcataca tucuicunapaj ñaupajpi mana allichu nishpa c'amircacuna. Chaimi Pabloca Jesusta caticuj tucuicunandij paicunamanta anchushpa, Tiranno shutipaj yachana huasiman rishpa chaipi punllanta parlanacushpa yachachirca.

¹⁰Chashnami Pabloca ishqui huatata chaipi causarca. Chaipi yachachicujpica, Asiapi tucui causajcunaca, judiocunapish, griegocunapish tucuicunami Mandaj Jesusmanta huillashcata uyarcacuna.

¹¹Chaipimi Pablotaca Taita Diosca pi mana rurai tucuipaj jatun mancharinacunata rurachirca.

¹²Chaimi Pablo tuparishca pañuelocunata, churanacunatapish ungushcacunapaj jahuapi churangapaj aparcacuna. Chashna rurajpica ungüicunaca, paicunamanta anchurcallami, millai espiritucunapish llujshircallami.

¹³Judiocunamanta maijancunaca supaicunata llujshichishpa purijcuna cashpami, Mandaj Jesuspaj shutipi, millai espiritucunata llujshichishun yuyarcacuna. Paicunaca: “¡Cancunataca, Pablo huillashca Jesuspaj shutipimi llujshichij nini!” nircacunami.

¹⁴Chashna rurajcunaca Esceva shuti judiopaj canchis churicunami carca. Chai runaca curacunata mandajmi carca.

¹⁵Shina nijpi millai espirituca paicunataca: “Jesustaca rijsinimi. Pablo pihuan cashcatapish yachanimi. Cancunaca, ¿pitaj canguichij?” nircami.

¹⁶Millai espirituhuan caj runaca, paicunapaj jahuaman saltashpami paicunata macashpa, churanacunatapish lliquishpa chugrichirca. Chaimi chai runacunaca chai huasimantaca lluchulla miticushpa rircacuna.

¹⁷Chaitaca judiocunapish, griegocunapish Efesopi tucui causajcunami yachashpa mancharishpaca: “Mandaj Jesustaca tucuita rurai tucujmari” nishpa jatunyachircacuna.

¹⁸Chaita ricushpaca crijcunapish taucacuna shamushpami paicuna ñaupa imalla mana allita rurashcata huillarcacuna.

¹⁹Chashnallatajmi yumbocunapish brujianata yachachij librocunata apamushpa tucui gentecunapaj ñaupajpi rupachircacuna. Chai librocunata rupachishca q'uipa yupajpica, pichca chunga huaranga cullquimi cana cashca carca.

²⁰Chashnami Jatun Diospaj Shimica, tucuita ruraj cashca, tucuipi uyarishpa mirarishpa catirca.

²¹Chai q'uipami Pabloca, Macedoniata, Acayata rishpa, Jerusalenman rinata yuyarirca. Chaipi cashca q'uipaca Roma pueblomanpish rinami cani nircami.

²²Chashna yuyarishpaca paita ayudajcunamanta Timoteota, Erastotami ishquita Macedoniaman cacharca. Paica Asiallapitajmi ashacama saquirirca.

²³Chai punllacunallatajmi Éfeso pueblopi maijancunaca alli huillaita mana uyashun nishpa achcata p'iñarishpa jatarircacuna.

²⁴Cullquimanta imatapish ruraj Demetrio runami tiyarca. Paica, Diana diospaj uchilla huasicunata rurajmi carca. Chaipica paipaj trabajajcunapish achca cullquitami japijcuna carca.

²⁵Chaicunatapish pai shina ruraj shujtajcunatapish tandachishpaca cashnami nirca: — Caipi caj ñuca shina rurajcuna. Cancunallataj yachanguichijmi, cai ñucanchij yachashcata rurashcamantami achcata charij canchij.

²⁶Chai Pablo ima shina nishpa puricujtaca cancunallataj ricunguichijmi, uyanguichijmi. Maquihuan rurashcalla dioscunaca mana Taita Diostajchu nishpami achcacunata crichishpa puricun. Chashna nishpaca mana cai Efesollapichu, tucui Asia llajtapimari achcacunata crichishca.

²⁷Chashna rurajpica, mana ñucanchij rurashpa c'atunacunallachu chingarishpa llaqui tucugrin. Mana chaillapishchu. Ñucanchij jatun Diana shuti diostapish, paita adorana huasitapish shitashpa mana yuyaringacunachu. Asiapi tucui causajcuna, tucui cai pachapi causajcunapish paita adoranami chingaringa — nircami.

²⁸Chaita uyashpaca, achcata p'iñarishpami: — Ñucanchij cai Efesocunapaj Dianaca jatunmari — nishpa caparircacuna.

²⁹Chaimantaca chaipi causajcuna musparinacushpami, Pablohuan purij Macedoniamanta Gayotapish, Aristarcotapish tucuicuna huaicashpa japishpaca, tandanacushpa imatapish ricuna ucuman pusharcacuna.

³⁰Chai ucuman Pablo yaicusha nijpica, Jesusta caticujcunaca mana saquircacunachu.

³¹Asia llajtata maijan mandajcunapishmi, Pablopaj alli rijsishca cashpa, ama chai ucumanca yaicupangui nichun jarcajcunata cacharca.

³²Chaipi cajcunaca musparinacushpami, shujcunaca shujta, caishujcunaca shujtajtami caparircacuna. Chaupi yallicarin imapaj tandanacushcatapish mana yacharcacunachu.

³³Chai tandanacushcacunapaj chaupimantami, judiocunaca Alejandrotaca imamanta chashna caparicushcata huillagri nishpa t'angashpa cacharcacuna. Chaimi Alejandroca upalla cachun maquihuan jarcashpa, tucuicunapaj ñaupajpi judiocunapaj allipaj rimasha nirca.

³⁴Ashtahuanpish Alejandrotaca judío cajta rijsishpacarin tucuicunami: “¡Ñucanchij Efesocunapaj Dianaca jatunmari!” nishpa ishqui horas shinata shuj shinalla caparircacuna.

³⁵Chai pueblopaj quillcajca, tucuicunata maquihuan upallachishpaca cashnami nirca: “Júpiter luceromanta shamushca Dianatapish, paipaj huasitapish cai Efesopi causajcuna cuidana cashcataca ¿pitaj mana yachan?

³⁶Chaitaca ¿pitaj mana chashnachu ningari? Chaimanta manapish alli yuyarishpaca, ama imatapish maipish cachun ruraichijchu.

³⁷Cai runacunataca ¿imapajtaj pushamurcanguichij? Paicunaca cancunapaj dioscunata mana shuhuashcacunachu, mana c'amishpa rimashcacunachu.

³⁸Demetriotapish, paipajta rurajcunatapish maijan caicuna p'iñachijpica, jatun mandaj churashca mandaj tiyanmi. Paimanmi huillagrina. Chaimanta caishuj chaishuj juchachicushcataca chaipi ricuchigrichij.

³⁹Ima shujtajta allichichun nijpica, mandashcapi nishca shinami tandanacushpa yuyarina canchij.

⁴⁰Cunan cashna jatarishcata mandajcuna tapujpica, llaquimari tucushun. ¿Imamantataj jatarircanguichij? nijpica, mana imata ni tucushunchu” nircami.

⁴¹Chashna nishca q'uipaca chai tucui tandanacushcacunataca cayacamachij nircami.