Read Chimborazo Highland Quichua HECHOS 20 Bible Online

HECHOS 20 - Chimborazo Highland Quichua bible

HECHOS 20

¹Chai bulla chulunyashca q'uipaca, Pabloca Jesusta caticujcunata tandachishpa alli catinguichij nishpami cunarca. Chashna cunashpaca ugllarishpa cayacamachij nishpaca Macedoniamanmi rirca.

²Chai llajtapi causaj crijcunata alli catinguichij nishpa achcata cunashpaca, Greciamanmi rirca.

³Chai llajtapica quimsa quillatami carca. Chai q'uipaca Siriaman ringapaj barcopi risha yuyacushpaca mana crij judiocuna paita macangapaj chapacushcatami yachaj chayarca. Chaimi Macedonia llajtallatataj chaquillahuan tigrana tucurca.

⁴Pablohuanca, Bereamanta Sopaterpish, Tesalonicamanta Aristarcopish, Segundopish, Derbemanta Gayopish, Asiamanta Timoteopish, Tiquicopish, Trofimopishmi Asiacama rircacuna.

⁵Paicunaca ñucanchijtaca Troaspimi shuyanaman ñauparcacuna.

⁶Ñucanchijca, levadura illajlla tandata micuna punllacuna tucurijpimi, Filiposmanta barcopi huichiyashpa, pichca punllapi Troasmanca chayarcanchij. Chaipimi paicunahuan tupashpa canchis punllacama saquirircanchij.

⁷Semana callari punllapimi, Jesusta caticujcunaca Jesús huañushcata yuyarishpa tandata chaupishpa micungapaj tandanacurcacuna. Pabloca, cayandij punlla llujshina cashpami, yachachishpa chaupi tutacama huillacurcalla.

⁸Paicuna tandanacushca altibajo ucupica, achca lamparacunami japichishca carca.

⁹Chaipica, Eutico shuti huambrami ventanapi tiyacurca. Unita Pablo huillashcamantami, yallitaj dormi atijpi, quimsa altoyuj huasimanta ucuman urmarca. Paita jatarichinaman rishpaca huañushcatami japircacuna.

¹⁰Pabloca chaimanta uriyashpami, paipaj jahuapi siririshpa, ugllarishpaca: — Ama mancharichijchu, causajmari — nirca.

¹¹Pabloca cutin jahuaman huichiyashpami, Jesús huañushcata yuyarishpa tandata chaupishpa curca. Ña micushca q'uipapish pacaringacamami huillacurcalla, chai q'uipaca rircallami.

¹²Chai huambrataca, causajta pushashpami cushicushpa rircacuna.

¹³Pabloca chaquillahuan risha nishcamanta ñucanchijca Ason pueblopi tupashpa paita apashun nishca cashpami, barcopi huichiyashpa chaiman ñauparcanchij.

¹⁴Asonpi Pablohuan tupanacushpaca, barcopi huichiyachishpami Mitileneman shamurcanchij.

¹⁵Mitilenemanta barcopi rishpaca, yacu chaupipi caj Quío ch'imbapurata rishpami, cayandij punllataca Samospi barcocuna shayarinaman chayarcanchij. Chaimantaca Trogilio pueblopi samarishpami, cayandij punllataca Miletoman chayarcanchij.

¹⁶Pentecostés punllapaj ima shinapish Jerusalenpi casha nishpami, Pabloca Asiapi ama achcata uniyangapaj Efesotaca pasashpa rircalla.

¹⁷Pabloca, Miletopi cashpami, Efesopi caj tandanacushca crijcunapaj cunaj yuyajcunata cayaj cacharca.

¹⁸Paicuna chayamujpica cashnami nirca: — Asiaman chayashca pachamanta ñuca ima shina cancunahuan cashcataca cancunallataj allimi yachanguichij.

¹⁹Mana crij judiocuna ñucata llaquichijpipish, llaquihuan huacaihuanmi mana jatun tucushpalla Mandaj Jesuspajtaca ruracurcani.

²⁰Chashna cashpapish ñucaca cancunaman huillanatapish, yachachinatapish manataj saquircanichu. Cancunapaj allipajllatajmi tucuicunapaj ñaupajpipish, cancunapaj huasin huasintapish huillashpa purircani.

²¹Judiocunaman, mana judiocunamanpish mana allita ruracushcata saquishpa cutirichij, ñucanchijta Mandaj Jesucristota crichij nishpami huillacurcani.

²²Cunanca Espíritu rinatajmi cangui nijpimi, ñucaca Jerusalenpi ima tucuna cashcata mana yachashpapish chaiman rigrini.

²³Caillatami yachani. Jucha illaj Espirituca, mai pueblopipish cashnami huillan. Prezujcuna, jatunta llaquichijcunami cantaca shuyacun ninmi.

²⁴Ashtahuanpish chaicunataca mana manchanichu. Ñuca causaitapish mana c'uyanichu. Chaipaj randica Taita Diosca mana c'uyaipajta c'uyaj cashca alli huillaita huillashpa, Mandaj Jesuspajta rurangapaj chasquishcata cushicushpa pajtachina yuyaillami cani.

²⁵Sarun punllacuna cancunahuan cashparajmi, Taita Dios mandacujpica ima shina cashcata huillarcani. Chaita uyajcunaca cunanmanta pacha cutinca pipish ña mana ñucataca ricunguichijchu.

²⁶Chashna tucuita huillashcamantaca, cancunapaj yahuarmantaca ima juchachina illajmi canchij.

²⁷Taita Dios imallata munashcataca, mana pacashpami tucuita huillarcani.

²⁸Mandaj Jesusca paipaj yahuarta jichashpami cancunataca randirca. Chaimanta cancunallatajpish alli cuidaringuichij. Cancunaman mingashca ovejacunatapish alli cuidanguichij. Cancunataca Taita Diospaj tandacushca crijcunata michij obispo cachunmi, jucha illaj Espirituca churarca.

²⁹Ñuca rishca q'uipaca, cancunapaj chaupimanca millpuj atujcuna shina shamushpami, ovejacunataca urata janajta apangacuna.

³⁰Chashna rurangapajca cancunapurallamantatajmi maijancunaca, paicunata catichun crijcunaman imatapish llullashpa huillajcuna ricuringa.

³¹Chaimanta alli yuyaihuan caichij. Quimsa huatatami tutapish, punllapish mana samashpa, huiqui ñahui shujta shujta sinchita cunacurcani. Chaitaca ama cungaringuichij.

³²“Cunanca huauquicuna, Taita Diosmanpish, mana c'uyaipajta c'uyaj paipaj alli huillaimanpishmi cancunataca mingani. Chai alli huillaimi cancunataca ashtahuan ashtahuan sinchiyachishpa catinga. Jucha illajta rurashcacunapura japina cashcatapishmi tucuicunaman cunga.

³³Ñucaca cullquitapish, curitapish, churanatapish maijanpajta mana munashcanichu.

³⁴Chaipaj randica, ñucapajpish ñucahuan purijcunapajpish ima illajpica, ñuca quiquin maquihuanmi trabajarcani. Chaitaca cancunallataj yachanguichijmi.

³⁵Chashna trabajashpa mana charijcunaman cushpa ricuchishpami yachachicurcanilla. “Imatapish cujmi, cushcata japijta yalli cushicun” nishpa Mandaj Jesús nishcatapish yuyaringuichij” — nircami.

³⁶Pabloca tucui chaicunata nishca q'uipaca tucui paicunandij cungurishpami Taita Diosta mañarca.

³⁷Chaimantaca tucuicunami Pablotaca minchacama nishpa achcata huacashpa ugllarishpa mucharcacuna.

³⁸Ñuca ñahuitaca mana ashtahuan ricunguichijchu nishpa Pablo nishcamantami, yallitaj llaquirircacuna. Chaimantaca barcocamami paihuan rircacuna.