Read Chimborazo Highland Quichua HECHOS 22 Bible Online

HECHOS 22 - Chimborazo Highland Quichua bible

HECHOS 22

¹“Huauquicuna, yayacuna, cunanca cancunapaj ñaupajpi ñuca ima shina cashcata huillasha, uyapaichij” nircami.

²Hebreo rimaipi rimajta uyashpacarin, tucuicunami upallarcacuna. Chaimi, cashna nirca:

³Ñucaca, Ciliciapi caj Tarsopi huacharishca judiotajmi cani. Ashtahuanpish cai Jerusalenpimi huiñarcani. Ñucaca ñaupa yayacunata Mandashcapi nishcacunata Gamaliel callarishpa tucuita alli yachachishcami cani. Chaimi cunan cancuna shinallataj Taita Diospajta pajtachina yuyailla huañucuj carcani.

⁴Chashna cashpami ñucaca alli huillaita caticujcunataca huañuchichun c'aricunatapish, huarmicunatapish carcelman pushaj carcani.

⁵Chaitaca curacunata mandajpish, cunaj yuyajcunapish allimi yachan. Damascopi caj crijcunata prezu apamuchunpish paicunallatajmi ñucamanca quillcata curcacuna. Chaimantami chaiman rishpa paicunata chaipi mashcashpa cai Jerusalenpi llaquichingapaj prezu apanaman rircani.

⁶Damascoman ñuca chayagricujpica, chaupi punlla shinatami, jahua pachamanta ñapish achij nishpa ricurircalla.

⁷Chashna achij nijpi pambaman urmashpaca: “Saulo, Saulo, ¿ima nishpataj ñucataca p'iñashpa llaquichina yuyailla llaquichicungui?” nijtami uyarcani.

⁸Chaimi ñucaca: “Amito ¿pitaj cangui?” nijpi chai rimajca: “Ñucaca, can p'iñashpa llaquichina yuyailla llaquichicun Nazaretmanta Jesusmi cani” nirca.

⁹Ñucahuan cajcunaca achij nijta ricushpami, achcata mancharircacuna. Ashtahuanpish ñucaman rimaj imata nishcataca mana entendircacunachu.

¹⁰Chaimi ñucaca: “¿Imatataj rurana cani? nijpi Mandaj Jesusca” “Jatarishpa, can ricushca Damascoman ri. Chaipimi can imata rurana cashcata ña mandashcataca tucuita huillanga” nircami.

¹¹Chai achij nicuj, achij nishcamantami, ñucaca imata mana ricurcani. Chaimantami ñucahuan cajcuna maquimanta aisajllapi, Damascoman chayarcani.

¹²Chaipica Ananías shuti runami causashca carca. Paica mandashcapi nishcata tucuita pajtachishpa Taita Dios yuyailla causajmi carca. Chaimantami tucui judiocunapish alli nishca carca.

¹³Pai ñucapajman shamushpa c'uchuyashpaca: “Huauqui Saulo, cutin canca ricujmi tucungui” nincami, ña cutin ricui tucurcani.

¹⁴Chaimi paica cashna nirca: “Ñucanchij ñaupa yayacunapaj Taita Diosmi pai munashcata rijsichun, pai cachashca Cashcata Ruraj rimashcatapish uyachun cantaca ñaupaman agllashca.

¹⁵Chaimanta canca imallata ricushcata, imallata uyashcataca tucui gentecunaman huillajmi cangui.

¹⁶Chaimanta cunanca imata ama shuyashpa jatarishpa bautizari. Jesuspaj shutipi rogashpa cambaj juchacunata maillachi” nircami.

¹⁷Jerusalenman tigramushpa, Taita Diospaj huasipi mañacushpami muscuipi shinata ricurcani.

¹⁸Chaipica Mandaj Jesusmi ñucaman ricurishpaca: “Cai Jerusalenmanta utca llujshishpa ri. Ñucamanta can huillashcataca caipica mana chasquingacunachu” nirca.

¹⁹Chaimi ñucaca: “Mandaj Jesús, canta crijcunataca sinagogacunaman rishpa carcelman apaj, azotijmi carcani. Chaitaca paicunaca yachanmi.

²⁰Shinallataj canmanta huillaj Estebanta yahuarsapata rurashpa huañuchicujpipish allimi nishpa, huañuchijcunapaj churanacunatapish cuidashpami ñucaca shayacurcani” nircanimi.

²¹Chashna nijpimi Jesusca: “Ri, ñucami cantaca caru llajtacunapi caj mana judiocunapajman cachagrini” nircami nishpami parlarca.

²²Chai tucuita Pablo parlangacamaca allimi uyarcacuna. Mana judiocunapajman cachashcami cani nijta uyashpaca: — ¡Cai runaca cai pachamantaca anchunami can, pai cai pachapi causanaca mana allichu! — nishpami sinchita caparircacuna.

²³Chashna caparishpaca paicunapaj churanacunata pambapi shitashpami, allpatapish jahuata shitarcacuna.

²⁴Chaimi huaranga soldadocunata mandajca: — Cuartel ucuman Pablota yaicuchichij, imamanta chashna paita p'iñashpa caparicushcata yachangapaj azotishpa tapuichij — nishpa mandarca.

²⁵Chaipi paita macangapaj huatacujpimi, Pabloca patsaj soldadocunata mandajtaca: — ¿Romano runataca, imata manaraj alli tapushpaca azotinalla ninchari? — nircami.

²⁶Chaita patsaj soldadocunata mandaj uyashpaca: — ¿Imatataj ruragringui? Cai runaca romano runami cashca — nishpa, huaranga soldadocunata mandajman huillajpi,

²⁷huaranga soldadocunata mandaj c'uchuyashpaca: — ¿Canca romano runachu cangui? — nijpi, Pabloca: — Ari — nircami.

²⁸Chaimi huaranga soldadocunata mandajca: — Ñucaca romano tucungapajca achca cullquitami curcani — nijpi Pabloca: — Ñucacarin, huachari pachamantami romano runa cani — nirca.

²⁹Shina nincami, macashun nicujcunaca Pablomanta anchurircacuna. Shinallataj huaranga soldadocunata mandajpish romano runa cashcata yachashpami, paita huatachishcamantaca achca manchaihuan carca.

³⁰Cayandij punllaca huaranga soldadocunata mandajca, imamanta Pablota judiocuna huañuchishun nishcata yachashataj nishpami, curacunata mandajcunatapish, mandajcunapuralla tandacushcatapish tucuicunata tandachirca. Chaipica Pablotaca cadenacunahuan huatashcamanta cacharichishpami, paicunapaj ñaupajman pusharca.