Read Chimborazo Highland Quichua HECHOS 23 Bible Online

HECHOS 23 - Chimborazo Highland Quichua bible

HECHOS 23

¹Chaipimi Pabloca, mandajcunapuralla tandanacushcata ricushpaca: — Huauquicuna, ñucaca cunan punllacamaca Taita Diospaj ñaupajpica alli yuyaihuan, alli shunguhuanmi causacuni — nijpimi,

²curacunata jatun mandaj Ananiasca, Pablopaj c'uchupi cajcunataca shimipi huajtachun mandarca.

³Chaimi Pabloca: — ¡Canca yurajyachishca pata shinallami cangui! Chaimanta Taita Diosmi cantapish huajtanga. Canca mandashcapi nishca shina rurangapajmari tiyacungui. ¿Ima nishpataj canca ñucata huajtai nishpa mandashcata p'aquingui? — nircami.

⁴Chaimi chaipi cajcunaca: — ¿Taita Diospaj curacunata jatun mandaj curatachu maipish cachun rimangui? — nircacuna.

⁵Chaimi Pabloca: — Huauquicuna, paica curacunata jatun mandaj cashcataca ñucaca mana yachashcanichu. Cashnami quillcashca tiyacun: “Cambaj llajtata mandajtaca, ama llaqui tucushca canman ningui” ninmi — nircami.

⁶Pabloca chaipi caj mandajcunapuralla tandanacushcacunaca maijancunaca saduceocuna, maijancunaca fariseocuna cajta ricushpami cashna nirca: — Huauquicuna, ñucaca fariseomi cani, fariseopaj churimi cani. Chashna cashpa huañushcacuna causarinata crishcamantami, cancuna juchachishca cani — nishpami sinchita rimarca.

⁷Chashna nijpica fariseocunapish, saduceocunapish paicunapura rimanacuita callarishpami, chai tandanacuipica chaupirircacuna.

⁸Saduceocunaca huañushcacuna causarinata, angelcuna tiyashcata, espiritucuna tiyashcatapish mana crincunachu. Fariseocunaca tucui chaicuna tiyashcatami crincuna.

⁹Chashna ninacushpaca jatun bullami jatarirca. Chaimi fariseocunapuramanta mandashcacunata quillcaj shayarishpaca: — Cai runapica, ima millaita mana japinchijchu. Shuj espiritumi, mana cashpaca shuj angelmi rimashca canga. Chaimanta Taita Diostaca ama p'iñachishunchij — nircami.

¹⁰Chashna rimanacuica ashtahuan ashtahuan sinchiyajpimi, huaranga soldadocunata mandajca, paicunaca Pablota ñutungacunami nishpa mancharirca. Chaimi soldadocunataca uriyamushpa, paicunapaj chaupimanta quichushpa, Pablota cuartelman apachun mandarca.

¹¹Mandaj Jesús chai tuta ricurishpami Pablotaca: “Pablo, ama manchaichu. Ima shinami cai Jerusalenpi ñucamanta huillacungui, chashnallatajmi Romapipish huillana cangui” nirca.

¹²Chai cayandij tutamantami maijan judiocunaca, Pablota huañuchishun nishpa: — Pablota huañuchingacama manataj micushunchu, manataj ubyashunchu. Ñucanchij mana chaita pajtachijpica, Taita Dios ñucanchijta llaquichichun — nishpami shuj yuyailla tucurcacuna.

¹³Chashna shuj yuyailla tucujcunaca chuscu chunga yallimi carcacuna.

¹⁴Paicunami curacunata mandajcunapajman, cunaj yuyajcunapajmanpish rishpaca cashna nircacuna: — Ñucanchijca Pablota huañuchingacamami, imata mana micushun. Ñucanchij mana chaita pajtachijpica Taita Dios ñucanchijta llaquichichun nishpami shuj yuyailla tucurcanchij.

¹⁵Chaimanta cunan cancunaca mandajcunapuralla tandanacushcahuan tucushpa, huaranga soldadocunata mandajpajman rishpa cashna nigrichij: “Pablota ashtahuan alli tapungapaj caya ñucanchij ñaupajman pushamui” nij tucuichij. Ñucanchijca pai manaraj chayamujpimi, chapashpa huañuchishun — nircacunami.

¹⁶Paicuna chashna ninacucujtaca Pablopaj panipaj churi uyashpami, cuartelpi Pabloman huillanaman rirca.

¹⁷Pabloca patsaj soldadocunata mandajcunamanta shujta cayashpami: — Cai huambrataca huaranga soldadocunata mandajpaj ñaupajman pushapai. Paimi imatatajshi huillasha nicun — nirca.

¹⁸Chaimi chai huambrata huaranga soldadocunata mandajpajman pushashpaca: — Prezupi tiyacuj Pablomi ñucata cayashpa, cai huambrata cambajman pushamuchun rogarca. Paimi canman imatatajshi huillasha nin — nircami.

¹⁹Chashna nijpimi, huaranga soldadocunata mandajca huambrata maquimanta japishpa, paillata ch'icanchishpaca: — ¿Imatataj huillasha ningui? — nishpa tapujpi,

²⁰huambraca: — Judiocunaca ashtahuan alli tapushun nij tucushpami, mandajcunapuralla tandanacushcapaj ñaupajman Pablota caya can pushachun rogashun nicuncuna.

²¹Chashna nijpipish paicunataca pajta cringuiman. Chuscu chunga yalli gentecunami pacalla chapacuncuna. Paicunaca: “Pablota huañuchingacama mana micushunchu, mana ubyashunchu. Ñucanchij chaita mana pajtachijpica Taita Dios ñucanchijta llaquichichun” ninacucuncunami. Cunanca can imata nijllatami shuyacuncuna — nircami.

²²Chaimi, huaranga soldadocunata mandajca: — Ñucaman huillashcataca pajta piman huillanguiman — nishpa chai huambrataca cacharca.

²³Huaranga soldadocunata mandajca, patsaj soldadocunata mandaj ishquita cayashpami, cashna nishpa mandarca: — Cunan iscun horas tutata Cesareaman rinapaj chaquillahuan purijcunatapish ishqui patsaj soldadocunata, caballopi purijcunatapish canchis chunga soldadocunata, lanzahuan shitajcunatapish ishqui patsaj soldadocunata tandachichij.

²⁴Caballota allichishpa, Pablotaca chaipi tiyachishpa mandaj Felixpajman ima mana tucushcata alli chayachigringuichij — nircami.

²⁵Shuj quillcatapish cashna nishpami quillcashpa cacharca:

²⁶“Claudio Lisiasmi, alli nishca can mandaj Felixta allillachu cangui nini.

²⁷Cai runataca, judiocuna japishpa huañuchigrijpimi, paica romano cashcata yachashpa soldadocunahuan rishpa ñucaca quichumurcani.

²⁸Chaimi imamanta paita huañuchigrishcata yachangapaj, paicunapaj mandajcunapuralla tandanacushcaman pusharcani.

²⁹Chaipica, paicunapaj Mandashcata mana pajtachishcallamantami juchachicushca carca. Ñucapica paica huañunapaj, mana cashpaca carcelpi churanapajllapish ima millaita mana rurashcachu.

³⁰Chashna cajpipish judiocunaca cai runataca huañuchishuntaj ninacucujta yachashpami, cambajman cachanata yuyarircani. Paita juchachicujcunapish imamanta juchachicushcataca cambajman rishpa huillachun nircanimi. Chashna nishpaca, allilla cashca canguiman” nircami.

³¹Chai soldadocunaca paicunata mandashca shinallatajmi Pablotaca chai tutallataj Antipatriscama pusharcacuna.

³²Cayandij punllaca, chaquillahuan purij soldadocunaca caballocunapi tiyarij soldadocunallata Pablohuan cachashpami, paicunaca cuartelman tigrarcallacuna.

³³Pablota pusharij soldadocunaca Cesareaman chayashpaca, mandaj Felixman quillcata cushpami, Pablotapish paipaj ñaupajman chayachircacuna.

³⁴Mandaj Félix chai quillcata rezashpaca, Pablotaca mai llajtamanta cashcatami tapurca. Ciliciamanta cashcata yachashpaca:

³⁵— Canta juchachijcuna shamujpimi, can imata nishcataca uyasha — nishpami, Herodes mandashpa tiyana huasipi churashpa soldadocunata cuidachirca.