Read Chimborazo Highland Quichua HECHOS 24 Bible Online

HECHOS 24 - Chimborazo Highland Quichua bible

HECHOS 24

¹Pichca punlla q'uipami, curacunata jatun pushaj Ananiasca, cunaj yuyajcunamanta maijancunandij, Tértulo shuti abogadohuan Cesareaman rircacuna. Chaipimi llajtata mandajpaj ñaupajpi Pablota juchachingapaj shayarircacuna.

²Pablota Felixpaj ñaupajman pushamujpica, Tértulo runaca Pablota juchachingapajca cashna nishpami callarirca: — Mandaj Félix, canca alli yachaj cashpami, ñucanchij llajtapi alli mandangui. Chaimantami ñucanchijca cushicushpa sumajta causanchij.

³Chashna sumajta causacushcamantami can mandaj Felixtaca, maipi cashpapish tucuicuna alli ninchij.

⁴Chaimanta ama achcata uniyashpa p'iñachingapaj cambaj alli shunguhuan cai ashalla huillashcata uyapai.

⁵Ñucanchijpajca cai runaca purij ungüi shinami. Chashna cashpami paica tucui llajtacunata rishpa judiocunata pandata yachachishpa p'iñanacuita jatarichishpa puricushca. Paica chai nazareno runata catijcunata mandajmi cashca.

⁶Taita Diospaj huasitapishmari mapayachisha nicushca. Chaimi japishpa, ñucanchij Mandashcapi nishca shina tapushun nicurcanchij.

⁷Chashna japishpa charicujpimi, huaranga soldadocunata mandaj Lisias shamushpaca, ñucanchij maquimanta maipish cachun quichurca.

⁸Chaimantami paita juchachijcunata cambajman shamuchun mandashca. Chaitaca canllataj tapushpami, ñucanchij imamanta juchachicushcataca alli yachangui — nircami.

⁹Chashna huillashcataca paihuan caj judiocunapish chashnatajmi nicurcacunami.

¹⁰Shina nijpimi mandaj Felixca, Pablo rimachun maquihuan ricuchijpi, Pabloca cashna nirca: — Canca, achca huatacunata cai llajtapi alli mandaj cashcataca yachanimi. Chaimanta cushicushpa ñuca ima shina cashcataca huillashallami.

¹¹Jerusalenpi Taita Diosta adorangapaj ñuca rishcaca cunan chunga ishqui punllacunallami. Chaitaca canllataj tapushpami ñuca nishca chashnataj cashcataca alli yachangui.

¹²Ñucataca Taita Diospaj huasipi, sinagogacunapi, pueblopipish pihuan rimanacucujta, chaipi cajcunata p'iñanacuita jatarichicujtapish mana japircacunachu.

¹³Cunan ñucata juchachicushcataca, paicunaca chashnatajmi nishpaca mana ni tucuncunachu.

¹⁴Caitami quiquinman huillagrini: Paicuna panda yachachinata caticun nijpipish, ñucaca Mandashcacunatapish, profetacunaman quillcachishcacunatapish ñucanchij ñaupa yayacuna shinallatajmi crishpa caticuni.

¹⁵Ima shinami paicunaca, tucui huañushcacunatami cashcata rurajcunatapish, mana cashcata rurajcunatapish Taita Dios causachinga nincuna. Ñucapish chai yuyaillatajmi cani.

¹⁶Chaimantami Taita Diospaj ñaupajpi, runacunapaj ñaupajpipish pi mana juchachipaj caiman yuyacuni.

¹⁷Tauca huatacunata shujtaj llajtacunapi purishca q'uipami, Taita Diosman cushca cullquita ñuca llajtapi causajcunapaj cungapaj, ñucapish imallatapish Taita Diosman cungapaj Jerusalenman rircani.

¹⁸Cachashca cullquita cushca q'uipaca, Taita Diospajta ruranata pajtachishcata ricuchingapaj maillarishca q'uipaca, ñapish Asiamanta maijan judiocuna Taita Diospaj huasi ucupi ricurircallami. Paicunaca ñuca achcacunahuan cajtapish, pita p'iñanacuchicujtapish mana japircacunachu.

¹⁹Chaicunami ñucata imata juchachishun nishpaca, cambaj ñaupajman shamuna carca.

²⁰Mana cashpaca, mandajcunapuralla tandanacushcapaj ñaupajman ñucata pushajpi ima mana allita rurashcata japishca cashpaca, caipi cajcunallataj huillachun.

²¹Paicunapaj ñaupajpi cashpaca: “Huañushcacunapaj chaupimanta causarinata huillashcamantami, cunanca cancuna juchachishca cani” nishpami sinchita caparircani — nircami.

²²Chashna nijta mandaj Félix uyashpaca, alli huillaimanta ima shina cashcata yachashcamantami: — Huaranga soldadocunata mandaj Lisias shamujpimi, cancuna imata nisha nishcataca alli yachashpa imatapish nisha — nishpami cutinpaj saquirca.

²³Shina nishpaca, patsaj soldadocunata mandajtaca, Pablotaca alli cuidangui, ashataca cacharij shina saquingui, pi paita ricuj shamujcunatapish, imata cusha nijcunatapish ama jarcangui nishpami mandarca.

²⁴Asha punllacuna q'uipami, Felixca paipaj huarmi Drusilandij shamurca. Chai huarmica, judiami carca. Paimi Pablota cayashpa, Jesucristota ima shina crinata parlachirca.

²⁵Pabloca cashcata ruraj canamanta, quiquin munaita jarcarinamanta, shamuj punllapica ima shina cashcatataj ricuchishpa Taita Dios llaquichina cashcatapish huillajpimi, Felixca achcata mancharishpaca: — Cunanca rilla, cutin cayana tucushpaca cayashallami — nirca.

²⁶Pablotaca cullquita cujpi cacharisha yuyashpami Felixca tauca cutin parlanacungapaj cayachicujlla carca.

²⁷Ishqui huata q'uipa, Felixca pai mandacushcamanta llujshijpi Porcio Festomi mandaj tucurca. Chai Felixca, judiocunapi alli ricuringapajmi Pablotaca prezullapitaj saquirca.