Read Chimborazo Highland Quichua HECHOS 26 Bible Online

HECHOS 26 - Chimborazo Highland Quichua bible

HECHOS 26

¹Chaimi Agripaca Pablotaca: — Can ima shina cashcata huillai — nijpi Pabloca, pai ima shina cashcata huillai callarishpaca maquita alzashpami cashna nirca:

²— Jatun mandaj Agripalla, ñucata judiocuna imata nishpa juchachicushcata canman huillai tucushcamanta achcatami cushicuni.

³Ashtahuantajca judiocuna imata ruraj cashcata, imamanta rimanacuj cashcatapish canca allimi yachangui. Chaimantami ñuca huillashcataca mana p'iñarishpalla uyachun rogani.

⁴Ñuca llajtapipish, Jerusalenpipish huahua pachamanta ñuca ima shina cashcataca tucui judiocunami alli yachancuna.

⁵Ñucaca uchillamanta pacha fariseo, ñucanchij llajtapi crinataca chaitataj pajtachijcunapuramantami cani. Chaita paicuna huillashun nishpaca huillai tucunmi.

⁶Ñucanchij ñaupa yayacunaman Taita Dios imallata cusha nishcata shuyacushcamantami, cunanca juchachishpa caiman pushamushca shayacuni.

⁷Chai cusha nishcataca ñucanchij ñaupa yayacunamanta chunga ishqui aillucunaca tutapish punllapish, chai cusha nishcata japina yuyaillami Taita Diospajta rurashpa shuyacuncuna. Jatun mandaj Agripalla, ñucapish chai shinallataj shuyacushcamantami, judiocuna juchachishca cani.

⁸Huañushcacunata Taita Dios causachinaca cancunapaj yuyaipica maita mana cripajmari yuyachin.

⁹Nazaretmanta Jesusta caticujcunata llaquichinaca alli cashcatami ñaupaca ñucapish yuyarcani.

¹⁰Chashna cashpami Jerusalenpica chaitataj rurarcani. Chaita rurangapajca curacunata mandajcunata quillcata mañashpami Jesusta caticuj achcacunata carcelcunapi churachircani. Shinallataj huañuchijpipish, allimi nircanimi.

¹¹Mai sinagogacunapipish paicuna crishcataca c'amishpa saquichunmi achcata llaquichij carcani. Paicunataca jatunta p'iñashpami shujtaj pueblocunapi cajcunatapish llaquichishpa purircani.

¹²Ñucaca chashna llaquichina yuyailla cashpami, curacunata mandajcuna quillcata cushcahuan pi mana ima nipaj Damascoman ricurcani.

¹³Jatun mandajlla, chaupi punlla shinata ñanta ricujpimi, intitapish yalli achij nicuj jahua pachamanta ricurirca. Chaica ñucata, ñucahuan ricujcunatapishmi achij nirca.

¹⁴Chaimi ñucanchijca tucuicuna pambaman urmarcanchij. Chaipimi hebreo rimaipi cashna nishpa rimashca uyarirca: “Saulo, Saulo, ¿ima nishpataj ñucataca p'iñashpa llaquichina yuyailla llaquichicungui? Garrucha puntapi huagra jaitashpa chugririj shinami canllataj llaqui tucucungui” nircami.

¹⁵Chaimi ñucaca: “Amito, canca ¿pitaj canguiyari?” nijpi, Mandaj Jesusca: “Ñucaca can p'iñashpa llaquichina yuyailla llaquichicun Jesusmi cani.

¹⁶“Cunanca jatarishpa shayari. Cantaca ñuca mandashcata ruraj cachun, cunan imallata ricushcacunata, q'uipata ñuca ricuchishcacunata huillaj cachun churangapajmi canmanca ricurini.

¹⁷Ñucami cantaca judiocunamanpish, mana judiocunamanpish huillachun cachani. Paicuna imata rurachunpish mana saquishachu.

¹⁸Can huillashpa ñahuita pascajpimi, paicunaca amsamanta luzman cutirishpa Satanaspajta ruracushcata saquishpa Taita Diospajta rurangacuna. Ñucata crishpami juchacunamantapish quishpichishcacuna canga. Chashna cashpami Taita Diospajlla cajcunahuan herenciata japingacuna” nircami.

¹⁹Jatun mandaj Agripalla, jahua pachamanta ricurishpa mandashcataca cazunatajmi carcani.

²⁰Chaimi Damascopi huillai callarishpaca, Jerusalenpipish, tucui Judeapipish huillarcani. Chai q'uipaca mana judiocunamanpishmimana allita ruracushcata saquishpa Taita Diosman cutirichij nishpa huillarcani. Taita Diosman cutirishcata ricuchingapajca allicunata ruraichij nircanimi.

²¹Chaimantami judiocunaca, Taita Diospaj huasipi japishpa ñucataca huañuchishun nircacuna.

²²Chashna cajpipish Taita Dios ñucata huaquichijpimi, profetacunapish, Moisespish imalla tucuna cashcata huillashca pajtashcataca uchillacunamanpish, jatuncunamanpish cunancama chaitataj huillacunilla.

²³Cristoca llaquita apashpa, huañushcacunapaj chaupimanta causarishpami judiocunaman, mana judiocunamanpish ima shina quishpirinataca achijyachishpa ricuchinga nishcatami huillacuni” nircami.

²⁴Pai ima shina cashcata Pablo alli huillajpimi Festoca: — ¡Pablo, canca locomari cangui! ¡Achcata yachacushpallamari loco tucushcangui! — nishpami sinchita rimarca.

²⁵Chaimi Pabloca cashna nirca: — Tucuicuna alli nishca mandaj Festo, ñucaca mana locochu cani. Alli yuyaihuanmari ima shina cashcatataj huillacuni.

²⁶Pai jatun mandaj Agripapish chai tucui imalla tucushcataca allimi yachan. Mai pacallapi mana chashna tucushcachu. Chaimantami ñucaca paipaj ñaupajpi imata mana manchashpa huillacuni.

²⁷Jatun mandaj Agripa, ¿quiquinpish profetacuna huillashcataca cringuimi? Quiquinpish profetacuna huillashcataca crina cashcata yachanimi — nircami.

²⁸Chaimi Agripaca, Pablotaca: — Ashallamantami Cristota catijta mana rurangui — nijpi,

²⁹Pabloca: — ¡Ashallamanta cashpa, achcamanta cashpapish, Taita Dios munajpica mana canlla, ashtahuanpish cunan caipi ñucata tucui uyajcunapish ñuca shina crij cachunmi munani! ¡Cadenahuan ñuca shina huatashca cachunllami mana munani! — nirca.

³⁰Pablo chaicunata nijpica, jatun mandaj Agripapish, llajtata mandaj Festopish, Berenicepish, tucui chaipi paicunahuan tiyacujcunapish jatarishpa,

³¹rishpa paicunapuralla tandanacushpami: — Cai runaca huañuchishca canapaj ima millaitaca mana rurashcachu, prezupi canapajllapish mana cashcachu — nishpa parlanacurcacuna.

³²Chaipimi Festotaca, Agripaca: — César tapushpami ñucataca imatapish ninga nishpa mana nishca cajpica, chai runataca cacharinallami cashca — nircami.