Read Chimborazo Highland Quichua HECHOS 28 Bible Online

HECHOS 28 - Chimborazo Highland Quichua bible

HECHOS 28

¹Chashna tucuicuna yacumanta alli llujshishpaca chai yacu chaupipi caj llajtaca, Malta shuti cashcatami yacharcanchij.

²Chaipi causajcunapish ñucanchijtaca llaquishpa allimi chasquircacuna. Tamyahuanpish chirihuanpish caspiyacujpimi, ninata japichishpa ñucanchijtaca cunuchun cayarcacuna.

³Chai ninapi Pabloca, chaquishca yantata tandachishpa churacujpica, huañuchij culebraca nina rupachijpi, ninamanta llujshishpa, ñapish Pablopaj maquita canishpa huarcurircallami.

⁴Maquipi chashna huarcuricujta chaipi causajcuna ricushpaca: “Cai runaca huañuchijtajmi yuyachin. Yacumanta quishpirimujpipish ñucanchij diosca mana saquipajchu yuyachin” ninacurcacuna.

⁵Ashtahuanpish Pabloca chai culebrata paipaj maquimanta ninapi chaspishpa shitashpaca, imapish mana tucurcachu.

⁶Ñallami p'unguinga, mana cashpaca ñallami huañunga nishpami tucuicuna chaparacurcacuna. Ña unita chapacujpi mana ima tucujpimi, shujtaj yuyai tucushpa: “Cai runaca diosmari yuyachin” nircacuna.

⁷Ñucanchij cunucushca c'uchullapi caj allpaca chai llajtata mandaj Publio runapaj allpami cashca carca. Paimi ñucanchijtaca alli chasquishpa, quimsa punllata paipaj huasipi pozachirca.

⁸Chaipica Publiopaj yayami, fiebrehuan yahuarndijta huijsa cacharirishpa, ungushca camapi siricushca carca. Chai ungushcata ricunaman Pablo rishpaca, Taita Diosta mañashpami maquicunata ungushcapaj jahuapi churashpa alliyachirca.

⁹Chashna alliyachijpica, chai llajtapi causaj shujtaj ungushcacunapish shamujpimi paicunatapish alliyachirca.

¹⁰Paicunapish ñucanchijtaca achcata c'uyashcata ricuchishpami, ña rishun nijpica ñucanchijpaj imalla illashcacunata cushpa cacharcacuna.

¹¹Ña quimsa quillata chai llajtapi cashca q'uipami, Cástor nishca, Pólux nishca shutita churashca barcopi huichiyarcanchij. Chai barcoca Alejandriamanta shamushpami, tamya punllacunataca chaipi cashca carca.

¹²Chai barcopi rishpa Siracusa puebloman chayashpaca, quimsa punllacunatami chaipi carcanchij.

¹³Chaimantaca chai llajta c'uchu c'uchullata rishpami Regio puebloman chayarcanchij. Chai cayandij punllaca huichi huaira tiyajpimi, ishqui punllapica Puteoli puebloman chayarcanchij.

¹⁴Chai pueblopi tauca crijcuna tupashpaca: “Canchis punllacunallata caipi saquiripaichij” nijpimi chaipi saquirircanchij. Chai q'uipami Romamanca rircanchij.

¹⁵Romapi causaj crijcunaca ñucanchij shamucushcataca ñami yachashca carca. Chaimi ñucanchijtaca huaquincunaca Apio pueblocama tupanaman shamushcacuna carca. Maijancunaca Tres Tabernas pueblollapimi tupangapaj shuyacushcacuna carca. Paicunata Pablo ricushpaca, Taita Diosta pagui nishpami achcata cushicurca.

¹⁶Romaman ña chayashpaca, patsaj soldadocunata mandajca cuidaj soldadocunata mandajmanmi prezucunataca curca. Ashtahuanpish Pablotaca shuj cuidaj soldadohuanmi shujtaj huasipi ch'ican causachun churarca.

¹⁷Romaman chayashca quimsa punllapimi Pabloca chaipi causaj judiocunata mandajcunata cayaj cacharca. Paicuna ña tandanacumujpica cashnami nirca: — Caipi tandanacushca tucui huauquicuna, ñucaca judiocunapaj ima mana allitaca mana rurarcanichu. Ñucanchij ñaupa yayacunapaj rurashpa catinacunatapish mana p'iñashcanichu. Ashtahuanpish ñucataca Jerusalenpi prezu japishpa romanocunapaj maquipi churajpimi caicama prezu cani.

¹⁸Paicunaca ñucata alli tapushpami, imamanta huañuchinata mana japishpa cacharishun nircacuna.

¹⁹Judiocuna juchachinata mana saquisha nijpimi Cesartajmi tapushpa ñucataca imatapish ninga nircani. Chashna nishpaca ñuca llajtapi causajcunata juchachingaraicuca mana nircanichu.

²⁰Tucui judiocuna shuyacushcata ñucapish crishcallamantami, caipi cashna cadenahuan huatashca cani. Chaita parlangapajmi cancunataca cayarcani — nircami

²¹Chaimi paicunaca cashna nircacuna: — Ñucanchijca can ima shina cashcata huillashpa, Judeamanta quillcashcataca mana chasquishcanchijchu. Chaimanta shamuj maijan huauquicunapish, can mana alli cashcataca imata mana huillarcacunachu.

²²Ñucanchijca can caticushca mushuj yachanata maipipish p'iñashpa rimacushcatami uyarcanchij. Chaimantami can imallata yuyashcata uyashun ninchij nircacunami.

²³Shujtaj punlla tandanacungapaj nishpa yuyarinacushca punllapi shamushpaca, pai pozacun huasimanmi achcacuna shamurcacuna. Chaipimi Pabloca tutamantamanta chishicama Dios mandacunta paicunamanca alli huillarca. Moisés Mandashcatapish, profetacuna huillashcatapish entendinallatami paicunamanca huillarca. Chaitaca paicunapish Jesusta crichunmi chashna huillarca.

²⁴Chashna huillajpica maijancunaca Pablo huillashcata crircacunami, maijancunaca mana crircacunachu.

²⁵Paicunapura mana shuj yuyailla tucushpa ña rigrijpimi, Pabloca cashna nirca: — Jucha illaj Espíritu huillachijpica allimi profeta Isaiasca ñucanchij ñaupa yayacunataca cashna nishca:

²⁶“Cai runacunapajman rishpa cashna nigri: Uyaitapish uyanguichijmi, manataj entendinguichijchu. Ricuitapish ricunguichijmi, manataj ricunguichijchu.

²⁷Cai llajtapi causajcunapaj shunguca rumiyashcami. Paicunapaj rinrinca tapashca shinami. Paicunapaj ñahuipish huichcashca shinami tucushca. Chaimanta uyashpapish ama uyashca shina tucuchun. Ricushpapish mana ricushca shina tucuchun. Paicunapaj shungutapish ñucapajman ama cutirichun mana entendijta ruragri. Paicuna chashna tucujpimi, ñucaca mana alliyachisha” nishcami nircami.

²⁸Chaimanta caita yachaichij: Cai quishpirinataca mana judiocunamanmi Diosca cachashca, paicunami uyangacuna — nircami.

²⁹Pablo chashna nijta uyashpaca, judiocunaca paicunapurallataj achcata rimanacushpami rircacuna.

³⁰Pabloca ishqui huatatami, alquilashca huasipi causarca. Chaipimi paipajman tucui shamujcunataca chasquij carca.

³¹Chaipica Dios mandacujpi ima shina canata, Mandaj Jesucristomantapish mana manchashpa, pi mana jarcashcami yachachishpa causarca.