Read Chimborazo Highland Quichua HECHOS 5 Bible Online

HECHOS 5 - Chimborazo Highland Quichua bible

HECHOS 5

¹Ananías shuti runapish, paipaj huarmi Safirahuanmi paicunapaj allpata c'aturca.

²Chai c'atushca cullquitaca, chaupishpami huaquichirca. Chaitaca paipaj huarmipish yacharcami. Caishuj asha cullquitaca tucuita apamuj shinami apostolcunaman curca.

³Chaimi Pedroca: — Ananías, ¿ima nishpataj cambaj shungupi Satanás jundachun saquircangui? ¿ima nishpataj allpata c'atushca cullquitaca mana tucui apamushpa, jucha illaj Espirituman llullarcangui?

⁴Allpaca ¿manachu cambaj carca? C'atujpipish cullquica ¿manachu cambaj maquipi carca? ¿Ima nishpataj cambaj shungupi chashna millaita ruranata yuyarircangui? Mana runacunamanchu llullarcangui, Taita Diosmanmi llullarcangui — nircami.

⁵Pedro chashna nijta uyashcahuan Ananiasca pambaman urmashpa huañurcallami. Chashna tucushcata uyajcunapish tucuicunami achcata mancharircacuna.

⁶Chaipi caj q'uipa huiñaicunami Ananiastaca pilluchishpa pambagrircacuna.

⁷Quimsa horas shina q'uipaca Ananiaspaj huarmipish chaimanmi yaicurca. Paica paipaj cusa ima tucushcataca mana yacharcachu.

⁸Chaimi Pedroca: — ¿Allpataca cancunaca chaillapichu c'aturcanguichij? — nishpa tapujpi, paica: — Ari, chaillapimi c'aturcanchij — nijpi,

⁹Pedroca: — ¿Ima nishpataj ishquindij shuj yuyailla tucushpa, Jatun Diospaj Espirituta umashun nishpa llullarcanguichij? Riqui, ñami canlla punguta cambaj cusata pambajcunaca yaicumucun. Cantapish paicunallatajmi apangacuna — nircami.

¹⁰Pedro cashna nincami chai huarmipish paipaj ñaupajpi urmashpa huañurca. Chai q'uipa huiñaicunallataj yaicushpaca, chai huarmitaca huañushcata japishpami cusapaj c'uchullapitaj pambarcacuna.

¹¹Chashna tucushcata tucui uyajcunapajca tandanacushca crijcunapajpish, shujtajcunapajpish yallitaj manchaimi shamurca.

¹²Apostolcunataca pi mana ruraipajcunatapish mancharinacunatapish tucuicunapaj ñaupajpimi Taita Diosca achcata rurachirca. Crijcunaca Salomonpaj nishca corredorpimi, tucuicuna shuj yuyailla tandanacuj carca.

¹³Shujtajcunaca paicunahuan tandanacunataca mancharcami. Shina cajpipish chai llajtapi causajcunaca tucuicunami paicunataca allicunami nijcuna carca.

¹⁴C'aricunapish huarmicunapish Mandaj Jesusta crishpaca, achcacunami ashtahuan mirarircacuna.

¹⁵Pedro pasacujpi paipaj llandu ungushcacunapaj jahuata pasashpa alliyachichunmi, ungushcacunataca camacunapi huanducunapi churashpa ñancunaman apamushpa churarcacuna.

¹⁶Chai c'uchulla pueblocunamantapish ungushcacunata, mapa espiritucuna llaquichicushcacunatapish apashpami, achcacuna Jerusalenman shamurcacuna. Chaicunaca tucuicunatami alliyachirca.

¹⁷Chaipimi curacunata jatun pushajca paihuan caj saduceocunandij yallitaj p'iñarishpaca,

¹⁸apostolcunata japishpa tucuicunata churana carcelpi churarcacuna.

¹⁹Ashtahuanpish Jatun Diospaj shuj angelmi cárcel pungucunata tuta pascashpa, paicunata llujshichishpaca:

²⁰“Richij, Taita Diospaj huasipi shayarishpa, ima shina mushuj causaiyuj tucunata huillaichij” nirca.

²¹Chaita uyashpaca manaraj alli pacarijpimi, Taita Diospaj huasiman rishpa yachachircacuna. Chaicamaca curacunata jatun pushajca, tucui paihuan cajcunandij mandajcunapuralla tandanacushcapi tandanacungapajmi israelcunata, cunaj yuyajcunata tandachirca. Chai q'uipami, apostolcunata carcelmanta pushamuchun cacharca.

²²Ashtahuanpish guardiacuna chayashpa, paicunata carcelpi mana japishpa huillanaman tigrashpami,

²³cashna nircacuna. “Carceltaca alli huichcashcatami japircanchij. Carcelta cuidajcunapish canlla pungucuna ñaupajpimi shayacushcacuna carca. Carcel punguta pascashpaca, pita mana chai ucupica japircanchijchu” nircacunami.

²⁴Chashna huillashcata uyashpaca, curacunata jatun pushajpish, Taita Diospaj huasita cuidajcunata mandajpish, curacunata pushajcunapish achcata mancharishpami caishuj chaishuj: — Chai runacunaca ¿imashi tucurca? — nishpa tapunacurcacuna.

²⁵Ashtahuanpish paicuna chashna ninacucujpirajmi shuj runa ñapish chayamushpaca: “Cancuna carcelpi churashca runacunaca, Taita Diospaj huasipimari tucuicunaman yachachicuncuna” nirca.

²⁶Chaimi Taita Diospaj huasipi mandajca chaipi cuidajcunata pushashpa paicunata japinaman rishpaca chaipi cajcuna rumicunahuan shitanata manchashcamanta mana imata nishpalla pushamurcacuna.

²⁷Paicunata pushamushpaca, mandajcunapuralla tandanacushcapaj ñaupajmanmi pushamurcacuna. Chaipimi curacunata mandajca,

²⁸cashna nirca: — Ñucanchijca cancunataca chai runamantaca amataj yachachinguichij nishpami mandarcanchij. Ashtahuanpish chashna nishca jahuami cunanca, tucui Jerusalenpi cancunapaj yachachinata yachachishcanguichij. Chai runatapish cancunami huañuchircanguichij nishpami ñucanchijta juchachicunguichij — nircami.

²⁹Chaimi Pedropish, caishuj apostolcunapish cashna nirca: — Runacunata cazunapaj randica, Taita Diostami cazuna canchij.

³⁰Cancunami Jesustaca caspipi huarcushpa huañuchircanguichij. Paitaca ñucanchij ñaupa yayacunapaj Taita Diosmi causachirca.

³¹Paitami Taita Diosca jatunyachishpa Mandaj cachun, Quishpichij cachunpish paipaj alli ladopi tiyachirca. Taita Diosca israelcunata Diosman cutirijta rurashpa paicunapaj juchacunata perdonangapajmi chashna rurarca.

³²Ñucanchijca caicunata ricushcata huillajcunami canchij, jucha illaj Espiritupish chaillatatajmi huillacun. Taita Diosca paita cazujcunamanmi, chai Espiritutaca cushca — nircami.

³³Shina nijta chai mandajcuna uyashpaca, yallitaj p'iñarishpami huañuchinata yuyarcacuna.

³⁴Mandajcunapuralla tandanacushcapica, Gamaliel nishca fariseomi tiyacurca. Paica Mandashcata jatun yachachij, tucuicuna alli nishcami carca. Pai shayarishpaca, apostolcunata ashacama canllaman llujshichichishpaca,

³⁵cashnami nirca: — Israelcuna, cai runacunata imata ruranataca alli yuyaringuichij.

³⁶Sarun ima tucushcata alli yuyarichij. Teudas shuti runa alli yachajmi cani nijpi paitaca chuscu patsaj shina runacunami catirca. Paita huañuchijpica tucui paita catijcunaca caita chaitami rircacuna. Pai yachachishcapish chingarircallami.

³⁷Chai q'uipaca shuticunata yupacui punllacunapimi, Galileamanta Judaspish yachachinata callarirca. Paitapish achcacunami catirca. Paita huañuchijpica, paita catijcunapish caita chaita rishpa chingarircallacunami.

³⁸Chaimanta cunanca cai runacunataca ama imata nishpa saquichijlla ninimi. Paicuna yachachicushcapish, imata ruracushcapish runallamanta cashpaca chingaringallami.

³⁹Taita Diosmanta cajpica, mana chingachi tucunguichijchu. Ñataj Taita Dioshuan macanacucunguichijman — nircami.

⁴⁰Gamaliel chashna nishcaca paicunapaj yuyaipica alli yuyachijpimi tucuicuna alli nircacuna. Chaimi apostolcunata cutin cayashpa macashpaca: — Chai Jesusmantaca cutinca ña amataj huillanguichijchu — nishpa mandashpaca cacharishpa cacharcallacunami.

⁴¹Paicunaca mandajcunapuralla tandanacushcacunapaj ñaupajmantaca, Jesucristomanta llaquita apajcunatajmi cashcanchij nishpami cushicushpa llujshircacuna.

⁴²Chashna cashpami paicunaca Taita Diospaj huasipipish, huasin huasintapish Jesucristomi Quishpichij nishpa punllanta yachachinata huillanataca mana saquircacuna.