Read Chimborazo Highland Quichua HECHOS 6 Bible Online

HECHOS 6 - Chimborazo Highland Quichua bible

HECHOS 6

¹Chai punllacunapica achcacunami yachacujcuna tucushpa mirarircacuna. Griego rimaita rimaj crijcunami hebreo rimaita rimaj crijcunataca ñucanchijpura viudacunamanca, punllanta micunataca mana alli chaupinguichijchu nishpa juchachircacuna.

²Chaimi chunga ishqui apostolcunaca, tucui yachacujcunata cayashpa: — Taita Diospaj Shimita huillanata saquishpa, ñucanchijllataj cancunaman caranaca mana allichu.

³Chaimanta huauquicuna cancunapuramanta alli causaj, jucha illaj Espirituhuan junda, alli yachaj, canchis runacunata mashcaichij. Paicunaman cai trabajotaca mingangapaj.

⁴Paicuna chaita rurajpimi, ñucanchijca Taita Diosta mañanatapish, paipaj Shimita huillanatapish mana saquishpa chai yuyailla rurashun — nircacunami.

⁵Paicuna chashna nishcaca tucuicunapajmi alli carca. Chaimi jucha illaj Espirituhuan junda, alli crij Estebanta agllarcacuna. Shinallataj Felipeta, Procorota, Nicanorta, Timonta, Parmenasta, Antioquiamanta Nicolastapishmi agllarcacuna. Chai Nicolasca judiocuna yachachishcata catijmi ñaupamanca carca.

⁶Paicunataca apostolcunapajmanmi pushamurcacuna. Pushajpi paicunapaj jahuapimi apostolcuna maquita churashpa Taita Diosta mañarcacuna.

⁷Jatun Diospaj Shimita apostolcuna ashtahuan huillashpa catijpimi, Jerusalenpica achca yachacujcuna tucushpa ashtahuan mirarircacuna. Curacunapish achcacunami Jesusta crinaca allimi nishpa crircacuna.

⁸Estebanca Taita Diospaj mana c'uyaipajta c'uyaihuan, imatapish rurai tucunahuan junda cashpami, judiocunapurapica jatun mancharinacunata, pi mana ruraipajcunatapish rurarca.

⁹Chaipimi esclavomanta “cacharirishcacuna” paicuna tandanacuna sinagogapi cajcunapura maijancuna jatarishpaca Estebanhuan rimanacungapaj tandanacurcacuna. Paicunaca Cirenemanta, Alejandriamanta, Ciliciamanta, Asiamantapishmi carcacuna.

¹⁰Taita Diospaj Espíritu yachachijpi rimacujpimi, paihuanca mana ch'imbapurai tucurcacuna.

¹¹Chaimantami paicunaca maijan runacunaman cullquita cushpa: — “Ñucanchijca cai runataca Moisestapish, Taita Diostapish p'iñashpa c'amicujtami uyarcanchij” ninguichij — nishpa yachachircacuna.

¹²Chaipi causajcunatapish, cunaj yuyajcunatapish, mandashcacunata quillcajcunatapishmi chashnallataj yachachishpa umashpa tandachircacuna. Chaipica Estebanta japishpami mandajcunapuralla tandanacushcaman pushamurcacuna.

¹³Llullashpa huillanguichij nishcacunatapish chaiman pushamujpi paicunaca: — Cai runaca Taita Diospajlla huasitapish, Moisés mandashcatapish c'aminataca mana saquinchu.

¹⁴Nazaretmanta Jesusmi cai Taita Diospaj huasitapish chingachinga. Moisés ñucanchijta yachachishcatapish chingachishpa shujtajyachingami nijtami uyarcanchij — nircacunami.

¹⁵Chaimi mandajcunapuralla tandanacushca tiyacujcuna Estebanpaj ñahuita ricushpaca, angelpaj ñahui shina cajtami ricurcacuna.