Read Chimborazo Highland Quichua HECHOS 9 Bible Online

HECHOS 9 - Chimborazo Highland Quichua bible

HECHOS 9

¹Sauloca Mandaj Jesusta caticujcunata p'iñashpa, huañuchishpa manchachinataca mana saquircachu. Chaimi curacunata jatun mandaj curapajman shamushpa,

²paitaca: Damasco pueblopi caj sinagogacunaman yaicungapajmi quillcacunata mañarca. Jesusta caticujcunata c'aricunatapish, huarmicunatapish Jerusalenman prezu apamungapajmi chashna mañarca.

³Chaimantaca Damascoman rishpa ñalla chayagricujpica, jahua pachamanta ñapish achij nircallami.

⁴Chaipi Saulo pambaman urmashpaca: — Saulo, Saulo, ¿ima nishpataj ñucataca p'iñashpa llaquichina yuyailla llaquichicungui? — nijta uyashpami,

⁵Sauloca: — Amito ¿Pitaj cangui? — nijpi chai rimajca: — Ñucaca, can p'iñashpa llaquichina yuyailla llaquichicun Jesusmi cani. Garrucha puntapi huagra jaitashpa chugririj shinami canllataj llaqui tucucungui — nircami.

⁶Chaimi Sauloca manchaihuan chujchushpa: — Amito ¿imatataj ñucataca rurachun munangui? — nijpi, Mandaj Jesusca: — Jatarishpa chai pueblollamantaj yaicuilla. Chaipimi can imata rurana cashcataca huillanga — nirca.

⁷Saulohuan ricuj runacunaca, rimashcallata uyashpa pita mana ricushpaca upayajtami mancharircacuna.

⁸Sauloca pambamanta jatarishpa ñahuita pascashpaca, imata mana ricui tucurcachu. Chaimi paitaca maquimanta aisashpalla, Damascoman pusharcacuna.

⁹Chaipimi quimsa punllacunata imata mana ricui tucushpa, imata mana micushpa, imata mana ubyashpa tiyacurca.

¹⁰Damascopica, Jesusta caticuj Ananías shuti runami tiyarca. Paimanmi Mandaj Jesusca, muscuipi shina ricurishpaca: — Ananías — nijpi, paica: — Caipimi cani, Mandaj Jesús — nirca.

¹¹Chaipimi Mandaj Jesusca: — Jatari, Derecha shuti ñanman ri. Judaspaj huasipi Tarsomanta caj Saulo runata tapui. Paica chaipimi Taita Diosta mañashpa shuyacun.

¹²Chai Sauloca cantaca muscuipi shinami paipajman yaicucujta ricurca. Pai cutin ricuchun cambaj maquita paipaj jahuapi churacujtapishmi ricurca — nircami.

¹³Chaimi Ananiasca: — Mandaj Jesús, chai Saulo runaca Jerusalenpi causaj can agllashcacunataca p'iñashpa llaquichicun nishpa taucacuna nijtami uyarcani.

¹⁴Cunan caipipish cambaj shutipi tucui mañajcunata prezungapajmi, curacunata mandaj curacuna cushca quillcashcata charicun — nircami.

¹⁵Chaimi Mandaj Jesusca: — Rilla, paitaca mana israelcunamanpish, jatun mandajcunamanpish, israelcunamanpish ñucamanta huillaj cachunmi agllarcani.

¹⁶Ñucamanta pai imalla llaquicunata apanataca ñucami paiman ricuchisha — nircami.

¹⁷Ananiasca Saulo shuyacun huasiman rishpa yaicushpa Saulopaj jahuapi maquita churashpaca: — Huauqui Saulo, can caiman shamucujpi ricurij Mandaj Jesusmi can cutin ricuchun, Taita Diospaj Espirituta chasquichunpish ñucataca cacharca — nircami.

¹⁸Chashna nincami Saulopaj ñahui lulunmantaca, chalhuapaj escamacuna shina urmajpi, cutin ricurca. Chaimanta jatarishpaca bautizarircami.

¹⁹Chai q'uipami micushpa cutin sinchiyarirca. Chaipimi Sauloca, achca punllacunata Damascollapitaj Jesusta catijcunahuan saquirirca.

²⁰Chashna alli tucuihuanmi Sauloca, Cristoca, Taita Diospaj churimari nishpa sinagogacunapi huillai callarirca.

²¹Chashna huillacujta tucui uyajcunaca achcata mancharishpami: — ¿Manachu cai runaca, Jerusalenpi Jesusmanta tucui huillajcunata llaquichij? Cunanpish curacunata mandajcunapajman prezu apangapajmi caimanpish shamurca — nircacunami.

²²Shina nijta uyashpaca Sauloca ashtahuan ashtahuanmi mana manchashpa “Jesusmari Quishpichij Cristoca” nishpa huillarca. Chaimi Damascopi causaj judiocunaca musparishca saquirircacuna.

²³Achca punllacuna q'uipami, judiocuna tandanacushpaca Saulota huañuchinata yuyarircacuna.

²⁴Paicuna chashna mana allita yuyacushcatami Sauloca yachaj chayarca. Chaimi punllapish, tutapish chai pueblomanta llujshina pungucunapi paita huañuchingapaj chapacurcacuna.

²⁵Chaimi Jesusta caticujcunaca Saulotaca shuj canastapi churashpa chai pueblomanta pata jahuata tuta uriyachishpa cacharcacuna.

²⁶Jerusalenman chayashpaca, Jesusta caticujcunahuanmi Sauloca tandanacusha nirca. Ashtahuanpish paicunaca Jesuspaj yachacuj canata mana crishpami, paitaca mancharcacuna.

²⁷Paicuna manchacujpipish Bernabeca, Saulota apostolcunapajmanmi pushamushpami ñanpi ima shina Mandaj Jesús ricurishpa paihuan rimashcata, Damascopi mana manchashpa Jesusmanta huillashcatapish Bernabeca parlarca.

²⁸Chaimi Jerusalenpica caishuj yachacujcunahuan tandanacushpa tucui pueblota purishpa,

²⁹Mandaj Jesuspaj shutipi mana manchashpa huillarcacuna. Chaipica griego rimaita rimaj judiocunahuanmi rimanacurcacuna. Paicunaca Saulotaca huañuchinatami yuyarcacuna.

³⁰Caishuj crijcuna chaita yachashpaca, Saulotaca Cesarea pueblocama pushashpami, Tarsoman cacharcacuna.

³¹Judeapi caj tucui llajtacunapi, Galileapi, Samariapi tandanacushca crijcunaca sumajtami causarcacuna. Paicunaca Mandaj Jesusta manchashpa ashtahuan yachashpami sinchiyarcacuna. Jucha illaj Espíritu yuyachijpimi, Jesusta catijcunaca ashtahuan mirarircacuna.

³²Pedroca tucuicunata ricushpa puricushpaca, Taita Dios agllashca Lidapi causajcunatapishmi ricugrirca.

³³Chaipica Eneas shuti runatami mana cuyurijta ruraj ungüihuan pusaj huatata ungushca camapi siricujta ricurca.

³⁴Chaimi Pedroca: — Eneas, cantaca Jesucristomi alliyachin. Jatari, cambaj camata allichi — nincami Eneasca jatarirca.

³⁵Chaitaca Lidapi, Saronpi tucui causajcunami ricurcacuna. Chai llajtapi causajcunaca Mandaj Jesusta crishpami ñaupa causaita saquircacuna.

³⁶Jope pueblopipish Jesusta catij Tabita shuti shuj huarmimi causarca. (Tabita nishcaca griegopica, “Dorcas” nisha ninmi). Paica huajchacunata llaquishpa, imatapish cushpa, allicunata rurashpa causaj huarmimi carca.

³⁷Chai huarmi ungushpa huañujpica, armachishpa alli pilluchishpami altibajo shuj ucupi churarcacuna.

³⁸Pedro puricun Lida pueblopish, Jope pueblo c'uchullapimi carca. Chaimantami Jesusta caticujcunaca Lida pueblopi Pedro cajta yachashpaca Jopeman utca shamupai nichun ishqui runacunata cacharcacuna.

³⁹Chai runacuna “jacupai nijpica” Pedroca paicunahuan rircallami. Pai chaiman chayajpica, huañushca siricun ucumanmi pusharcacuna. Chaipica viuda huarmicunami Dorcas causacushparaj rurashca churanacunata Pedroman ricuchishpa huacarcacuna.

⁴⁰Pedroca tucuicunata chaimanta llujshichishpa, cungurishpa Taita Diosta mañashpaca huañushcapaj ladoman muyurishpami: “¡Tabita, jatari!” nijpica ñahuita pascashpa, Pedrota ricushpa tiyarirca.

⁴¹Chaimi Pedroca maquita cushpa jatarichijpi Jesusta caticujcunata, viudacunatapish cayashpa causajta ricuchirca.

⁴²Jope pueblopica tucuicuna chaita yachaj chayashpaca, achcacunami Mandaj Jesusta crircacuna.

⁴³Pedroca, achca punllacunatami, Jope pueblopica carata ñutujllata ruraj Simonpaj huasipi saquirirca.