Read Chimborazo Highland Quichua ROMANOS 10 Bible Online

ROMANOS 10 - Chimborazo Highland Quichua bible

ROMANOS 10

¹Huauquicuna, israelcuna quishpirishca canaman chayachun nishpami, ñuca shungupica chai yuyailla Diosta mañacuni.

²Paicuna Dios yuyailla cashcataca, ñucapish huillai tucunimi. Chashna cashpapish Diosta rijsina cashca shinatajca mana rijsincunachu.

³Paicuna munashca shinapi justificashca cashun nishpami, Dios justificashca canataca mana yachashun nircacuna. Chashnami Dios justificashca canataca mana cazurcacuna.

⁴Mandashcata pajtachijca Cristomi. Tucui paita crijcunataca Dios justificachunmi chashna rurarca.

⁵Mandashcata rurajcunata justificanamantaca, Moisés quillcashcapica: “Maijanpish cai nishcacunata rurashpami, chaicunamanta causanga” ninmi.

⁶Ashtahuanpish crishcamanta justificanamantaca cashnami nin: Ama cambaj shungupica: “¿Pitaj jahua pachaman huichiyangari?” ningui. (Chashna nishpaca, Cristota uriyachisha nishca shinallatajmi tucungui).

⁷“¿Pitaj ucujta jutcumanca uriyangari?” nishpapish ama ningui. (Chashna nishpaca, Cristota huañushcacunapaj chaupimanta huichiyachisha nishca shinallatajmi tucungui).

⁸Ashtahuanpish ¿Mandashcaca imatataj nin? “Diospaj Shimica cambaj c'uchupi, cambaj shimipi, cambaj shungupipishmi” ninmi. Chaica crinamanta huillaj shimimi, chaitami huillacunchij.

⁹Cambaj shimihuan Jesusca ñucata Mandajmi nishpa, huañushcacunapaj chaupimanta Taita Dios paita causachishcata cambaj shungupi crishpaca, quishpichishcami cangui.

¹⁰Shunguhuanca justificashca cangapajmi crina, ashtahuanpish shimihuanca quishpichishca cangapajmi crinimi nina.

¹¹Quillcachishcapica: “Maijanpish paipi crijtaca, mana pingachishcachu canga” ninmi.

¹²Judiocunapish, griegocunapish chai shinallatajmi. Paillataj tucuicunapaj Mandaj Jesús cashpami, tucui paita mañajcunaman cungapajca achcata charin.

¹³Pi cashpapish Mandaj Jesuspaj shutipi mañajtaca, quishpichingami.

¹⁴Paita manaraj crij cashpaca ¿ima shinataj paitaca mañangacunari? Manaraj paimanta uyashpaca ¿ima shinataj cringacunari? Pi manaraj huillajpica ¿ima shinataj uyangacunari?

¹⁵Cachajcuna mana tiyajpica ¿ima shinataj huillagringacunari? Cashnami quillcashca tiyacun: “¡Sumaj causaita huillajcunapaj, alli huillaita huillajcunapaj chaquicunaca sumajmari!” ninmi.

¹⁶Ashtahuanpish alli huillaitaca, mana tucuicuna cazurcacunachu. Chaimantami Isaiasca: “Jatun Dios, ¿pitaj ñucanchij huillashcataca crishcari?” nin.

¹⁷Chashna cajpica crinaca huillashcata uyashcamantami shamun, chai uyashcaca Diospaj Shimimanta huillashcami.

¹⁸Ashtahuanpish caita tapusha: ¿Manachari uyarcacunari? Ari uyarcacunatajmari: “Tucui cai pachapimi, paicuna rimashcaca uyarirca. Cai pacha tucuricamami, paicuna huillashcaca uyarirca” ninmi.

¹⁹Caitapishmi tapuni: Israelcunaca ¿manachu chaitaca yachashca canga? Puntaca Moisesrajmi: “Manapish ñucapaj caj, yuyai illajcunata ñucapajmi canguichij nishpami, cancunataca p'iñachisha” ninmi.

²⁰Isaiaspish mana manchashpami: “Ñucata mana mashcajcunarajmi japircacuna. Ñucata mana tapujcunamanrajmi ricurircani” ninmi.

²¹Ashtahuanpish israelcunamantaca: “Ñucata mana cazushpa c'ariyajcuna cajpipish, punllantami maquita chutashpa cayacurcanilla” ninmi.