Read Chimborazo Highland Quichua ROMANOS 13 Bible Online

ROMANOS 13 - Chimborazo Highland Quichua bible

ROMANOS 13

¹Jatun mandajcunataca tucuicuna cazuchun. Mandajca Dios churashcamantami tiyan. Dios mana churashca mandajca, mana tiyanchu.

²Chaimanta maijanpish mana cazujca, Dios churashca mandajtami c'ariyan. Chai mana cazujcunaca, paicunapaj llaquipajllatajmi chashna ruran.

³Mandajcunaca allita rurajta manchachingapaj mana canchu, ashtahuanpish millaita rurajta manchachingapajmi. ¿Mandaj mana manchachishca causasha ninguichu? Shinashpaca allita ruraiyari, alli nishcami cangui.

⁴Mandajca cambaj allipajllataj Diospajta rurajmi. Chaimanta millaita rurashpaca manchanami cangui, espadataca mana yanga apanchu. Mana allita rurajta cashcatataj ricuchishpa llaquichingapajmi apan.

⁵Mana llaquichishca canallamanta cazunachu cangui, ashtahuanpish cambaj yuyaillapitaj cazunaca alli cashcamantami cazuna cangui.

⁶Chaimantami tributotapish paganguichij. Mandajcunaca, Diospajta rurajcuna cashpami, tucui chai ruranacunataca punllanta ruracuncuna.

⁷Imallamanta pagana cashcata pagaichij: Tributotaca, tributota japijman, impuestotaca, impuestota japijman, cumurina cajtaca cumurichij, alli nina cajtaca alli nichij.

⁸Piman ama imata debichijchu, ashtahuanpish caishuj chaishuj c'uyanacunallata debinguichij. Shujtajta c'uyajmi Mandashcataca pajtachishca.

⁹Mandashcapica: “Ama huainayangui, ama huañuchingui, ama shuhuangui, ama llullashpa huillangui, shujtajcunapajta ama munangui” ninmi. Ima shujtaj mandashca tiyajpipish: “Quiquin c'uyarij shinallataj shujtajcunatapish c'uyangui” nishcallapimi pajtan.

¹⁰C'uyajca, shujtajtaca ima millaita mana ruranchu. Chashna cajpica shujtajta c'uyajmi, Mandashcata pajtachin.

¹¹Cunanca ima punllacuna cashcata yachashcamantaca, ñamari dormicushcamanta jatarina canchij. Ñucanchijta quishpichina punllaca, cri punllapi cashcata yalli c'uchupimari.

¹²Tutaca pacarigrinmari, punllapish chayamugrinmari. Amsapaj ruraicunataca shitashunchij, achijpaj macanacunata churarishunchij.

¹³Punllapi shina alli purishunchij. Jatun micui ubyaitapish ama rurashunchij, ama machashunchij, aicha munailla canata jarcarishunchij, cacharishcacuna ama cashunchij, ama macanacushunchij, ama envidiashunchij.

¹⁴Chaipaj randica Mandaj Jesucristota churarichij. Aicha munaicunata rurashpa cushicujcunaca ama caichijchu.