Read Chimborazo Highland Quichua ROMANOS 14 Bible Online

ROMANOS 14 - Chimborazo Highland Quichua bible

ROMANOS 14

¹Crishcapi irquilla cajtaca chasquinguichijlla, ashtahuanpish ama caita chaita paihuan rimanacungapaj chasquinguichijchu.

²Maijan crijcunaca, tucui imatapish micunallami nincunami. Crishcapi irquicunaca, chagrapi p'ucushcallatami micuncuna.

³Tucui imatapish micujca, mana tucuita micujtaca ama yanganchichun. Shinallataj mana tucuita micujpish, tucuita micujtaca ama juchachichun. Diosmi paitapish chasquishca.

⁴Canca, shujtajpajta rurajta juchachingapajca ¿pitaj canguiyari? Alli cangapajpish, mana alli cangapajpish paita Mandaj Jesuspajmi ruracun. Ashtahuanpish sinchiyachinapaj poderyuj Mandaj Jesús sinchiyachijpimi, paipish sinchiyanga.

⁵Maijanca shuj punllallami, shujtaj punllacunamanta yalli alli ninmi. Maijanca tucui punllacuna chai shinallatajmi ninmi. Cada quiquin ima shina yuyashca shina sinchi catichun.

⁶Shuj punllallami caishuj punllacunamanta yalli alli nijca, Mandaj Jesuspajmi chashnaca yuyan. Maijanpish ima punllatapish chai shinallatajmi nijpish, Mandaj Jesuspajllatajmi chashna nin. Tucui imatapish micujca, Taita Diosta pagui nishpa micushcamanta, Mandaj Jesuspaj allipajmi micun. Mana tucuita micujpish, Taita Diosta pagui nishcamantaca, Mandaj Jesuspajllatajmi mana tucuita micun.

⁷Ñucanchijca, pi mana ñucanchijpajllataj causanchijchu, ni pi mana quiquinpajllataj huañunchijchu.

⁸Causacushpapish, Mandaj Jesuspajmi causacunchij, huañushpapish Mandaj Jesuspajmi huañushun. Chaimanta causacushpapish, huañushpapish Mandaj Jesuspajllatajmi canchij.

⁹Chaipajmi Cristoca huañurca, causarirca. Huañushcacunapaj, causajcunapajpish Mandaj cangapajmi cutin causarirca.

¹⁰Shina cajpica canca, ¿ima nishpataj crij huauquitaca juchachingui? Mana cashpaca canpish, ¿ima nishpataj crij huauquitaca yanganchingui? Imalla rurashcata Cristo ricuchicun ñaupajpica, tucuicunamari ricurigrina canchij.

¹¹Cashnami quillcashca tiyacun: “Jatun Diosca ñucaca causacunimi ninmi. Tucuicunami ñuca ñaupajpi cungurishpa, paicunapaj shimihuan Taita Diosmi cangui” ningacuna.

¹²Chashnami ñucanchijca, cada quiquin imallata rurashcataca Diosman huillashun.

¹³Chaimanta caishuj chaishuj ama ashtahuan juchachinacushunchijchu. Ashtahuanpish huauquita ñitcachinata, tsagnarichishpa urmachinataca ama yuyashun ninacuichij.

¹⁴Ñucaca Mandaj Jesuspi shunguta churashcamantaca, imapish paillatajca mana mapa cashcatami yachani. Ashtahuanpish maijan mapa cashcata yuyajpajca mapami.

¹⁵Ashtahuanpish can micushcamanta cambaj huauqui llaquirishca cajpica, c'uyangui nishca shinaca ña mana puricunguichu. Can imatapish micushcamanta, ñataj chai huauqui chingarinman. Cristoca paimantapishmi huañurca.

¹⁶Cancunapaj alli cashcataca, ñataj piman mana allichu nichinguichijman.

¹⁷Dios mandashca cajcunaca, mana micuna ubyana yuyailla canachu. Ashtahuanpish jucha illaj Espiritumantaca cashcata rurana, sumaj causai, cushicuimari.

¹⁸Cristopajta chashna rurajca Dios munashcata rurajmi, gentecunapish alli crijmi nishcami.

¹⁹Chaimanta sumaj causaiman, sinchiyanaman caishuj chaishuj shuj yuyailla catishunchij.

²⁰Dios allichishpa churashcataca, can imatapish micushcahuan ama chingachinguichu. Tucui ima micunapish chuyatajmi. Ashtahuanpish shujtajcunata ñitcachij micuita micunami mana alli.

²¹Aichata micushpapish, vinota ubyashpapish, cambaj huauquita p'iñachina, irquiyachina, ñitcachina cajpica, chaicunata mana ruranami ashtahuan alli.

²²¿Canca tucui imatapish micunalla cashcataca chashnataj cashcatachu cringui? Chashna crinaca Diospaj ñaupajpi cambajllami alli. Imata rurajpipish, paipaj yuyai mana juchachishpa allimi nijpica cushicunmi.

²³Ashtahuanpish caita chaita yuyashpa micushpaca, paillatajmi llaqui tucun. Pai crishca shina shuj yuyailla mana micushcamantami chashna tucun. Tucui imatapish pai crishca shina shuj yuyailla mana rurashcaca juchami.