Read Chimborazo Highland Quichua ROMANOS 15 Bible Online

ROMANOS 15 - Chimborazo Highland Quichua bible

ROMANOS 15

¹Sinchi crijcunaca, irqui crijcuna mana apai tucushcacunataca c'uyaihuanmi apana canchij. Mana ñucanchijpajlla alli canata yuyanachu canchij.

²Cada quiquinmi ñucanchijca, shujtajpaj imapish alli canapaj, paita sinchiyachinapaj ayudana canchij.

³Cristopish paipaj allipajllaca mana rurarcachu. Ashtahuanpish cashnami quillcashca tiyacun: “Canta c'amijcuna c'amishcacunaca, ñucatami llaquichirca” nishca shinami tucurca.

⁴Chashna cajpica ñaupaman Quillcachishcacunaca, ñucanchijta yachachingapajmi quillcashca carca. Mana p'iñarishpalla, cushijlla, shuyana yuyailla canata yachachingapajmi quillcachirca.

⁵Mana p'iñarinata, cushicuita cuj Diosllataj, cancunapurapica Cristo Jesús shina shuj yuyailla causanata cuchun.

⁶Chashna cashpami shuj shinalla, shuj rimashca shinallapi ñucanchijta Mandaj Jesucristopaj Dios Yayataca jatunyachinguichij.

⁷Chaimanta Diosta jatunyachingapaj Cristo ñucanchijta chasquishca shinallataj, cancunapish caishuj chaishuj chasquinacuichij.

⁸Cashnami nini: Cristo Jesusca, circunsicionta rurashcacunata servingapajmi shamurca. Ñaupa yayacunaman cusha nishcata pajtachishpaca, Diosca mana llulla cashcata ricuchingapajmi chashna shamurca.

⁹Mana judiocunapish paicunata Dios llaquishcamanta, paita jatunyachichunmi Jesusca shamurca. Quillcashcapipish cashnami nin: “Mana judiocunapurapimi, canmantaca huillasha, cambaj shutitami cantasha” ninmi.

¹⁰Shinallataj: “Mana judiocunaca, Diospaj cajcunahuan cushicuichigari” ninmi.

¹¹Cutin shinallataj: “Jatun Diostaca tucui mana judiocunapish, alabaichigari. Tucui pueblocunallataj, paitaca jatunyachichigari” ninmi.

¹²Shinallataj Isaiaspish: “Isaipaj sapimi retoñanga. Paimantami tucui mama llajtacunata mandangapajca llujshinga. Mana judiocunaca paipi yuyaita churashpami shuyangacuna” ninmi.

¹³Cancuna pai yuyailla cashca Diosllataj paipi crijcunamanca cushi canata, sumaj causaita, jundachichun. Chashna cashpami, jucha illaj Espiritupaj poderhuanca Diospi ashtahuan shunguta churanguichij.

¹⁴Ñuca huauquicuna, cancunallataj allita ruranahuan, tucui yachaihuan jicharicuj cashcataca yachanitajmi. Chashna cashpami caishuj chaishuj cunanacui tucunguichij.

¹⁵Ashtahuanpish huauquicuna, mai maipica mana manchashpami, cancunata yuyachishpa cunangapajca quillcarcani. Dios ñucataca, mana c'uyaipajta c'uyashpa,

¹⁶mana judiocunapajpi Jesucristopajta rurashpa, Diospaj alli huillaita mingashcata alli apachun cushcamantami chashna yuyachini. Mana judiocunatapish jucha illaj Espíritu jucha illajta rurajpi, Dios munashca shina ofrenda cachunpishmi chashna quillcani.

¹⁷Cristo Jesuspi cashpa Diospajta rurashcamantami jatunyarinata charini.

¹⁸Ñucallamantatajca imata mana rimashachu. Ashtahuanpish Cristo imallata ñucata rurachishcatami rimasha. Mana judiocunata Diosta cazunaman pushangapaj imallata huillashcata, imallata rurashcatami rimasha.

¹⁹Diospaj Espiritupaj poder rurachijpimi poderyuj ricuchinacunata, mancharinacunatapish rurarcani. Chashnami Jerusalenmanta callarishpaca, tucui llajtacunapi Iliricocama Cristomantaca alli huillaita huillashpa jundachircani.

²⁰Chashna huillacushpaca, shujtaj callarichishcapi ama huillangapaj nishpami, Cristomanta pi manaraj huillashca llajtacunapi alli huillaita huillana yuyaita charishcamanta chai yuyailla huillacuni.

²¹Ashtahuanpish cashnami quillcashca tiyacun: “Paimanta huillashcata nunca mana chasquijcunarajmi paitaca ricungacuna. Shinallataj paimanta nunca mana uyajcunarajmi entendingacuna” nishca shinami rurarcani.

²²Caicunamantami cancunapajman shamusha nicushpapish, tauca cutin jarcarircani.

²³Cunanca, cai llajtacunapi huillanataca ñami tucuchishcani. Chaimanta achca huatacuna ñaupaman cancunapajman shamusha nicushcamantaca,

²⁴Españaman ricushpami cancunata ricushpandij pasana yuyailla cani. Cancunahuan tandanacushpa cushicushca q'uipa ñucata ayudashpa cachajpica, chaimanta rishallami.

²⁵Ashtahuanpish cunanca, jucha illajcunapaj ayudata tandashcatami saquingapaj Jerusalenmanraj rigrini.

²⁶Jerusalenpi caj jucha illajpurapi caj huajchacunaman cunapajmi, Macedoniapi, Acayapi caj crijcunaca, alli shunguhuan ofrendata tandachishpa cachanata yuyarircacuna.

²⁷Chaita ruranaca paicunapica allimi ricurirca. Mana judiocunaca, judiocunamanta Diospaj allicunata japijcunami tucurcacuna. Chaimantami paicunapish judiocunamanca, cai pachapi charishcacunahuan ayudanataj carcacuna.

²⁸Cai rurana cashcata ña tucuchishpa ofrendacunata paicunapaj maquipitaj cushpami Españamanca risha. Chaiman pasacushpami cancunapajman chayashpa risha.

²⁹Cancunapajman ñuca shamushpaca, Cristomanta alli huillai cushca yallitaj allicunahuan, shamuna cashcatami yachani.

³⁰Ashtahuanpish huauquicuna, ñucanchijta Mandaj Jesucristomanta, Espiritupaj c'uyaimantapish ñucamanta Taita Diosta mañashpa ayudachunmi cancunataca rogani.

³¹Judeapi caj mana crisha nijcunamanta huaquichichun, Jerusalenpi caj jucha illajcunapajta rurangapaj ñuca apashca ofrendatapish alli chasquichun mañanguichij.

³²Dios munashca shina cancunapajman cushicuihuan chayashpa, cancunapurapi samaringapaj mañapaichij.

³³Sumaj causaita cuj Dios tucui cancunahuan cachun. Chashna cachun.