Read Chimborazo Highland Quichua ROMANOS 5 Bible Online

ROMANOS 5 - Chimborazo Highland Quichua bible

ROMANOS 5

¹Crishcamanta justificashcacuna cashpami, ñucanchijta Mandaj Jesucristomanta Dioshuan sumaj causaita charinchij.

²Paita crishcamantami, mana c'uyaipajta c'uyashcata chasquishcanchij. Chaipimi sinchicuna canchij. Chaimantami Diospaj sumaj cashcata chasquina yuyailla cushicucunchij.

³Mana chaillachu, ashtahuanpish llaquicunapipishmi cushicucunchij. Llaquicunaca mana p'iñarijta ruraj cashcatami yachanchij.

⁴Mana p'iñarij canaca crijtaj cashcata ricuchinami, crijtaj cashcata ricuchijca shuyana yuyaillami.

⁵Shuyaj yuyailla canaca mana pingachinchu. Diosca paipaj jucha illaj Espirituta ñucanchijman cushpami, paipaj c'uyaitaca ñucanchij shungupi tallirca.

⁶Cristoca ñucanchijllataj mana quishpiripaj cajpimi, pai huañuna punlla chayajpica, Diosta mana rijsijcunamanta huañurca.

⁷Cashcata rurajmantapish pi mana huañusha ninmanchu. Shina cajpipish alli cajmantaca, maijan huañusha ninmanchari.

⁸Ashtahuanpish ñucanchijca juchayujcuna cajpiraj Cristo ñucanchijmanta huañujpimi, Diosca ñucanchijta c'uyaj cashcataca ricuchin.

⁹Tucuimanta yallica Cristopaj yahuarhuan justificashcacunami canchij. Chashna cashpami, Dios p'iñarishpa llaquichinamantaca quishpichishca cashun.

¹⁰Diosta p'iñajcuna cajpipish, paipaj Churi huañushcamantami, Diosca ñucanchijhuan alli tucurca. Ashtahuancarin ña alli tucushca cashcamantaca, Jesús causacushcamantaca quishpichishcami cashun.

¹¹Mana chaillachu, Dioshuan alli tucunataca ñucanchij Mandaj Jesucristomanta chasquishcamantami Taita Diospica cushicunchij.

¹²Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca.

¹³Mandashca manaraj tiyajpimi, juchaca cai pachapica ña tiyarca. Mandashca mana tiyashcamantami chai juchataca imata mana nishca.

¹⁴Chashna cajpipish, Dios mandashcata Adán p'aquishca shina mana p'aquishpapish juchallijcunataca, Adanmanta Moisescamami huañuica mandarca. Adanca shamuna cajta ricuchijmi carca.

¹⁵Ashtahuanpish Dios cushcaca, mandashcata p'aquishcata yalli ashtahuan allimari. Dios mandashcata shuj runa p'aquishcamantaca, achcacunami huañurcacuna. Mana c'uyaipajta c'uyashpa shujlla runa Jesucristomanta Dios cushcaca, achcacunapaj yallitaj allipajmi shamurca.

¹⁶Dios cushcaca, shuj runa juchallishca shinaca mana canchu. Ima shina rurashcata ricuchishpa llaquichinaca shuj juchallamantami, jatun llaquiman cachangapajtaj shamurca. Ashtahuanpish Dios cushcaca, mandashcata achcacuna p'aquishcamantami justificangapaj shamurca.

¹⁷Mandashcata shuj runa p'aquishcamantami, huañuica mandai callarirca. Ashtahuanpish Diosca mana c'uyaipajta c'uyashpa yallijta cushcamantami, justificashcata chasquincuna. Chaicunami shujlla Jesucristomanta shamuj causaipica mandangacuna.

¹⁸Mandashcata shuj runa p'aquishcamantami, tucuicunata jatun llaquiman cachanaca callarirca. Chashnallatajmi shuj cashcata ruraj runamantaca, justificashpa tucuicunaman causaita cunapish callarirca.

¹⁹Shuj runa mana cazushcamantami, achcacuna juchayujcuna tucurcacuna. Chashnallatajmi shuj runa cazushcamantaca, achcacuna cashcata rurajta rurashca tucungacuna.

²⁰Jucha ashtahuan mirarichunmi, Mandashcaca yaicushca. Jucha ashtahuan mirarijpica, Dios mana c'uyaipajta c'uyanacarin yallitajmi mirarirca.

²¹Ima shinami juchaca huañuiman apangapaj mandacurca, chai shinallatajmi ñucanchij Mandaj Jesucristomantaca, mana c'uyaipajta c'uyaipish justificashcacunataca huiñai causaita cushpa huiñaipaj mandanga.